Vo Tingachita Kuti Tiŵafiki Pamtima Ŵanthu wo Tisambiza
1. Kumbi vo Yesu wasambizanga vaŵakwaskanga wuli akuvwisiya?
1 Yesu Khristu waŵafikanga pamtima ŵanthu wo waŵasambizanga. Nyengu yinyaki, mitima ya akusambira ŵaki “yinguchontheka” wati waŵakonkhoske Malemba mwakuvwika umampha. (Luke 24:32) Weyosi wakhumbika kuvwiya Yehova ndi mtima wosi. Kumbi tingachita wuli kuti tiwovyi ŵanthu wo tisambiza kuti asinthi umoyu wawu?—Ŵar. 6:17.
2. Kumbi kuchita vinthu mwalusu kungawovya wuli kuti timufiki pamtima munthu yo tisambiza?
2 Muchitengi Vinthu Mwazeru: Ŵanthu anandi angasintha cha asani titiŵakambiya ŵaka vinthu vo Yehova watinkha pamwenga vo wakhumba. Kweniso angasintha cha asani titiŵaŵerenge ŵaka malemba nganandi ngakususka vo agomezga. Kuti tiwovyi munthu yo tisambiza, tikhumbika kuziŵa dankha vo wagomezga ndipuso chifukwa cho wativigomezge. Kumufumba mafumbu mwalusu kungawovya kuti wakambi maŵanaŵanu ngaki. (Nthanthi 20:5) Ivi vingawovya kuti tisankhi malemba ngo ngangachontha mtima waki. Mwaviyo, tikhumbika kulongo kuti titimuŵanaŵaniya ndipuso kuchita nayu vinthu mwakuzikira. (Nthanthi 25:15) Ziŵani kuti anyaki asintha liŵi umoyu wawu kweni anyaki asintha liŵi cha. Mwaviyo, tikhumbika cha kuŵachichizga kuti asinthi kweni tikhumbika kuzomereza mzimu wakupaturika waku Yehova kuti uŵawovyi kusintha maŵanaŵanu ndi vakuchita vawu.—Marko 4:26-29.
3. Kumbi tingaŵawovya wuli wo tisambiza kuti aje ndi mijalidu yamampha?
3 Awovyeni Kuti Aje ndi Mijalidu Yamampha: Malemba ngo ngakonkhoska kuti Yehova ngwamampha ndipuso ngwachanju ngangawovya munthu yo tisambiza kuti waje ndi mijalidu yamampha. Tingagwiriskiya ntchitu lemba la Sumu 139:1-4 pamwenga Luka 12:6, 7 kuti timulongo kuti Chiuta waŵanaŵaniya munthu weyosi pakuyija. Asani aziŵa kuti Yehova ngwalisungu, ayambengi kumuyanja ukongwa ndipuso ajiperekengi kwaku iyu. (Ŵar. 5:6-8; 1 Yoh. 4:19) Kweniso, asani aziŵa kuti vakuchita vawu vitimukwaska ukongwa Yehova, angayamba kuchita vinthu vo vingamukondwesa ndi kumupasa ulemu.—Sumu 78:40, 41; Nthanthi 23:15.
4. Kumbi tingayezga wuli Yehova asani tisambiza ŵanthu?
4 Yehova wachichizga ŵanthu cha kuti avwiyengi marangu ngaki. M’malu mwaki, watiŵakambiya umampha wa kuvwiya ulongozgi waki. (Yes. 48:17, 18) Asani tiwovya ŵanthu wo tisambiza kuti asankhengi ŵija vakuchita, ndikuti tiyezga Yehova. Ŵanthu wo asankha ŵija kusintha umoyu wawu aja akukho mwauzimu. (Ŵar. 12:2) Kweniso, aja pa ubwezi wakukho ndi Yehova yo “wayesa mitima” ya ŵanthu.—Nthanthi 17:3.