Jalidu Lakukhumbika Ukongwa Kuti Munthu Waje Msambizi Wamampha
1. Kumbi jalidu lakukhumbika ukongwa kuti munthu waje msambizi wamampha ndi nili?
1 Kumbi jalidu lakukhumbika ukongwa lo lichitiska kuti munthu waje msambizi wamampha wa Bayibolo ndi nili? Kumbi ndi masambiru ngakucharu? Kuziŵa vinthu? Pamwenga zeru? Awa, ndi jalidu lo lichitiska kuti Dangu lifiskiki, lo liziŵikiska akusambira aku Yesu, kweniso ndi jalidu likulu ukongwa ndipuso lakukondweska pa mijalidu yinayi yikuluyikulu yaku Yehova. (Yoha. 13:35; Ŵaga. 5:14; 1 Yoha. 4:8) Jalidu ili ndi chanju. Asambizi amampha alongo chanju.
2. Kumbi nchifukwa wuli titenere kwanja ŵanthu?
2 Muyanjengi Ŵanthu: Musambizi Mura, Yesu, wayanjanga ŵanthu ndipu chanju chaki chaŵachitiskanga kuti amuvwisiyengi. (Luka 5:12, 13; Yoha. 13:1; 15:13) Asani titanja ŵanthu, tigwiriskiyengi nchitu mpata wewosi wo tingasaniya kuti tipharazgi. Masuzgu nge kutombozgeka ndipuso kukumana ndi ŵanthu wo akana kuvwisiya uthenga widu ngangatitondekeska cha kupharazga. Tiyesesengi kwanja ŵanthu wo titiŵapharazgiya, ndi kusintha upharazgi widu kuti uyanani ndi masuzgu ngawu. Tiyesesengi kupatuwa nyengu yakusambiriya ndi wakusambira Bayibolo pe cha, kweniso kunozgeke umampha techendaluti ku sambiru lelosi.
3. Kumbi kwanja uneneska wa m’Bayibolo kungatiwovya wuli mu uteŵeti?
3 Muyanjengi Uneneska wa m’Bayibolo: Yesu wayanjanga so uneneska wa m’Bayibolo ndipu wawuwonanga nge chuma cha mtengu wapatali. (Mate. 13:52) Asani titanja uneneska, tikambiskanengi ndi ŵanthu ndi mtima wosi, ndipu ivi vichitiskengi kuti akuvwisiya akondwi. Chanju chenichi chitiwovyengi kuti tiŵanaŵaniyengi ukongwa uthenga wakuzirwa wo tipharazga m’malu mwakudandawula ndi vo titondeka kufiska mu uteŵeti, ndipu ivi vitiwovyengi kuti tilekengi kuchita mantha mu uteŵeti.
4. Kumbi tingakuzga wuli chanju?
4 Kuzgani Chanju Chinu: Kumbi tingachita wuli kuti tilutirizgi kwanja ŵanthu? Mwakuŵanaŵaniya chanju cho Yehova ndi Mwana waki alongo ndipuso nja yauzimu ya ŵanthu a m’chigaŵa chidu. (Marko 6:34; 1 Yoha. 4:10, 11) Kuchita sambiru la pakutija ndipuso kulunguruka pa vo tisambira kutiwovyengi kuti tiyanjengi ukongwa uneneska wa m’Bayibolo. Chanju nchimoza mwa vipasu va mzimu. (Ŵaga. 5:22) Mwaviyo, tingapempha Yehova kuti watipaski mzimu utuŵa ndipuso kuti watiwovyi kukuzga chanju chidu. (Luka 11:13; 1 Yoha. 5:14) Mwambula kuphwere kanthu za masambiru ngidu ngakucharu, vo tiziŵa mu gulu laku Yehova, pamwenga zeru zo te nazu, tingaja asambizi alusu asani tilongo chanju.