Nthowa Zakusazgiyaku Uteŵeti

PA NYENGU yo Yesu watumanga akusambira ŵaki kuti akapharazgi Ufumu, wanguŵakambiya kuti: “Ntchitu yakuvuna njikulu kweni antchitu mbamana.” Chifukwa chakuti ntchitu yenga yikulu, iyu wanguŵakambiya so kuti: “Pemphani Mweneku wa ntchitu yakuvuna kuti watumizi antchitu ku ntchitu yaki yakuvuna.” (Mate. 9:37, 38) Yesu wangukambiya akusambira ŵaki mo angachitiya uteŵeti wawu. Iyu wanguŵakambiya kuti: “Mwechendamalizi kuzunguliya mumatawuni ngosi nga Isirayeli, Mwana wa munthu wazengi.” Mazu ngenanga, ngangulongo kuti akhumbikanga kugwira ntchitu yeniyi mwaliŵi.—Mate. 10:23.

² Mazuŵa nganu so, te ndi ntchitu yikulu yakupharazga uthenga wamampha wa Ufumu. Titenere kupharazga uthenga wenuwu umaliru wechendazi chifukwa nyengu ye pafupi kumala! (Mariko 13:10) Te ndi ntchitu yakupharazga nge yo Yesu ndi akusambira ŵaki ŵenga nayu kweni chifukwa chakuti isi tikhumbika kupharazga pacharu chosi chapasi, ntchitu yidu njikulu ukongwa. Tilipu ŵanthu amanavi kuyeruzgiya ndi ŵanthu mabiliyoni wo ŵe pacharu chapasi, kweni tigomezga kuti Yehova watiwovyengi. Uthenga wamampha wa Ufumu, upharazgikengi pacharu chosi chapasi ndipu pa nyengu yo Yehova wakhumba, umaliru ufikengi. Kumbi isi tidanjizgengi Ufumu waku Chiuta pa umoyu widu kuti tifiski ntchitu yeniyi? Kumbi ndi nthowa nizi zo tingasazgiyaku uteŵeti widu?

³ Yesu wangukonkhoska vo Yehova wakhumba kuti ateŵeti ŵaki achitengi. Iyu wanguti: “Uyanjengi Yehova Chiuta waku ndi mtima waku wosi, ndi umoyu waku wosi, ndi maŵanaŵanu ngaku ngosi, ndi nthazi zaku zosi.” (Mariko 12:30) Tikhumbika kuteŵete Chiuta ndi umoyu widu wosi. Ivi ving’anamuwa kuti, titenere kulongo kuti titijipereka ndi mtima wosi ndipuso tikujipatuliya nadi kwaku Yehova mwakuchita vosi vo tingafiska mu uteŵeti waki. (2 Timo. 2:15) Pe vinthu vinandi vo tosi tingachita mwakukoliyana ndi mo vinthu viliri pa umoyu widu kweniso malusu ngidu. Tiyeni tiwoni vinyaki vo munthu wangachita ndipu sankhani vo mukhumba kuchita kuti musazgiyeku uteŵeti winu.

KUTEŴETE NGE MUPHARAZGI MU MPINGU

⁴ Ŵanthu wosi wo asambira uneneska ŵe ndi udindu wakupharazga uthenga wamampha. Iyi ndi ntchitu yakukhumbika ukongwa yo Yesu wangupaska akusambira ŵaki. (Mate. 24:14; 28:19, 20) Munthu yo waja wakusambira waku Yesu Khristu, kanandi watamba kukambiya anyaki uthenga wamampha asani wawuvwa ŵaka. Venivi ndivu Andireya, Filipu, Koneliyasi ndi anyaki anguchita. (Yoha. 1:40, 41, 43-45; Machi. 10:1, 2, 24; 16:14, 15, 25-34) Kumbi ivi ving’anamuwa kuti munthu wangakambiya anyaki uthenga wamampha wechendabatiziki? Hinya! Asani munthu amuzomereza ŵaka kuja mupharazgi wambula kubatizika mu mpingu, watamba kupharazga kunyumba ndi nyumba. Iyu wangapharazga so mu nthowa zinyaki mwakukoliyana ndi vo wangafiska ndipuso mo vinthu viliri pa umoyu waki.

⁵ Asani munthu wabatizika, mwambula kukayika wakhumbisiska kuchita vosi vo wangafiska kuti wawovyi ŵanthu kusambira uthenga wamampha. Anthulumi ndi anthukazi viyo, ŵe ndi udindu wakugwira ntchitu yakupharazga. Titumbikika chinanga tingachitaku vinthu vimanavi pakulutiska panthazi ntchitu yeniyi. Weyosi yo wangasazgiyaku uteŵeti waki mwakuchita mauteŵeti nganyaki, wakondwengi ukongwa.

KUTEŴETE KO KUKHUMBIKA APHARAZGI ANANDI

⁶ Vingachitika kuti chigaŵa cha mpingu winu chipharazgika kaŵikaŵi ndipu uthenga wamampha wapharazgika chigaŵa chosi. Asani ve viyo, mungakhumba kuti musazgiyeku uteŵeti winu mwakusamiya kuchigaŵa chinyaki ko kukhumbika apharazgi anandi. (Machi. 16:9) Asani muteŵete nge mura pamwenga mteŵeti wakovya, pangaŵa mpingu wo ungawonga asani mungachiwuwovya. Wakuwonere dera wangaŵa ndi masachizgu nga mo mungachiwovye mpingu unyaki wa mudera linu. Asani mukhumba kuchiteŵete kuchigaŵa chinyaki mucharu cho muja, ofesi ya nthambi yingakukambiyani vo mungachita.

⁷ Kumbi mukhumba kuchiteŵete kucharu chinyaki? Asani ndi viyo, mukhumbika kuyiŵanaŵaniya umampha nkhani yeniyi ndipu mungakambiskana ndi ŵara a mu mpingu winu. Mwambula kukayika, kusamiya kucharu chinyaki kuchitiskengi kuti imwi ndi yo muluta nayu musinthi vinthu vinyaki. (Luka 14:28) Kweni asani muwona kuti mwamujaku nyengu yitali cha, mungachita umampha kuchiteŵete kuchigaŵa chinyaki cha mucharu cho muja.

⁸ Muvyaru vinyaki, abali wo ŵe ndi maudindu mu mpingu azamu ŵaka sonu mugulu laku Yehova. Abali ŵenaŵa, atijiyuyuwa ndipu azomera kuti abali wo ateŵete kwa nyengu yitali, wo ŵaza mu mpingu wawu ndiwu alongozgengi. Asani ndimwi mura ndipu mukhumba kusamiya kucharu cha viyo, mutenere kukumbuka kuti muluta kuchisere m’malu mwa abali a mpingu wo mulutaku cha, kweni kateŵetiyeni nawu limoza. Kaŵachiskeni kuti aje ndi chilatu chakuja ndi udindu kweniso azomerengi maudindu. (1 Timo. 3:1) Mukazikirengi asani vinthu vinyaki vichitika mwakupambana ndi mo vichitikiya mucharu cho mwatuwa. Chifukwa chakuti mwateŵete kwa nyengu yitali nge mura, kawovyeni abali. Venivi vingaziwovya kuti ŵara a mpingu wo mwateŵetiyanga azifiski kuwuphwere umampha asani imwi mwaziwere kwinu.

⁹ Ofesi ya nthambi yechendakutumiziyeni mazina nga mipingu yo mungachiyiwovya, Komiti ya Uteŵeti ya Mpingu winu yikhumbika kulemba kalata yakukuzomerezani. Kaya ndimwi mura, mteŵeti wakovya, mpayiniya pamwenga mupharazgi, kalata yeniyi njakukhumbika. Komiti ya uteŵeti, yitumizengi kalata yakukuzomerezani limoza ndi kalata yinu yakupempha kusamiya ku mpingu unyaki, ku ofesi ya nthambi ya mucharu cho mukhumba kuchiteŵete.

KUPHARAZGA MU CHINENERU CHINYAKI

¹⁰ Kuti musazgiyeku uteŵeti winu, mungakhumba kusambira chineneru chinyaki kusazgapu chineneru chamanja. Asani mukhumbisiska kuchita viyo, mungakambiskana ndi ŵara pamwenga wakuwonere dera. Yiwu angakukambiyani vo mungachita kweniso kukuchiskani. Mwakulondo ulongozgi wa ofesi ya nthambi, madera nganyaki ngajalikiska makilasi nga vineneru vinyaki kuti apharazgi ndi apayiniya, asambirengi mo angapharazgiya mu chineneru chinyaki.

UTEŴETI WA UPAYINIYA

¹¹ Apharazgi wosi akhumbika kuziŵa vo munthu wangachita kuti waje mpayiniya wakovya, wa nyengu zosi, wapade ndipuso kuti wachiti mauteŵeti nganyaki nga nyengu zosi. Mpayiniya, wakhumbika kuja Mkhristu wakubatizika, wajalidu lamampha yo wangapharazga uthenga wamampha kwa maora ngo watenere kufiska. Komiti ya Uteŵeti ya Mpingu ndiyu yizomereza mupharazgi kuti waje mpayiniya wakovya ndipuso wa nyengu zosi kweni apayiniya apade, asankhika ndi ofesi ya nthambi.

¹² Mupharazgi wangachita upayiniya wakovya kwa mwezi umoza, myezi yinandiku yakujalizana pamwenga wangalutirizga mpaka po wawone kuti wami dankha, mwakukoliyana ndi mo vinthu viliri pa umoyu waki. Apharazgi anandi a Ufumu atanja kuchita upayiniya wakovya pa vakuchitika vapade, nge nyengu ya Chikumbusu pamwenga mwezi wo wakuwonere dera wacheze mpingu wawu. Anyaki achita upayiniya wakovya mu myezi yo apumuwa ku ntchitu. Apharazgi akubatizika wo asambira sukulu, angachita upayiniya asani ajala sukulu. Apharazgi angasankha kuchita upayiniya wakovya wa maora ngamanaku mu mwezi wa March ndi April kweniso mu mwezi wo wakuwonere dera wacheze mpingu wawu. Kaya vinthu ve wuli pa umoyu winu, asani mwe ndi mijalidu yamampha ndipu muwona kuti mungafiska maora ngo ngakhumbika kweniso mungachita upayiniya wakovya kwa mwezi umoza pamwenga kujumpha, ŵara angakondwa kukuzomerezani kuja mpayiniya wakovya.

¹³ Kuti muje mpayiniya wa nyengu zosi, mukhumbika kuziŵa asani mungazifiska maora ngo ngakhumbika pa chaka. Nge mpayiniya wa nyengu zosi, mukhumbikengi kuchita vinthu mwakukoliyana ndi mpingu winu. Apayiniya aphamphu atovya ukongwa mu mpingu. Yiwu atovya abali ndi azichi kuti ayanjengi kupharazga ndipuso achiska apharazgi anyaki kuti ayambi upayiniya. Mwechendalembi fomu yakupempha upayiniya wa nyengu zosi, mutenere kuja mupharazgi wa chakuwoniyapu chamampha ndipu patenere kujumpha myezi 6 kutuliya po mukubatizikiya.

¹⁴ Apayiniya apade kanandi asankhika kutuliya mwa apayiniya a nyengu zosi wo alongo kuti mbaphamphu mu uteŵeti. Yiwu atenere kuja akunozgeka kuchiteŵete kwekosi ko ofesi ya nthambi yingaŵatuma. Kanandi atumizika kumizi yo ye kutali ko angasaniya ŵanthu wo akhumba kusambira Bayibolu ndipu ajalikiska mipingu yifya. Nyengu zinyaki, apayiniya apade atumizika ku mipingu yo yikhumbika kuti ayiwovyi kupharazga chigaŵa chawu chosi. Apayiniya apade anyaki wo mbara, atumizika ku mipingu yimanayimana chinanga kuti mipingu yo, yifiska kupharazga chigaŵa chaki chosi. Yiwu apaskika ndalama zimanavi kuti aguliyengi vinthu vo akhumbika. Apayiniya apade anyaki ateŵete kwa nyengu yimanavi.

AMISHONALE

¹⁵ Komiti ya Uteŵeti ya Wupu Wakulongozga ndiyu yisankha amishonale ndipu pavuli paki, Komiti ya Nthambi ya mucharu cho amishonale atumizikaku, yitiŵatuma kuti akateŵetiyengi muvigaŵa vo mwe ŵanthu anandi. Yiwu atovya ukongwa pa ntchitu yakupharazga kweniso ntchitu za mu mpingu. Kanandi, amishonale asambizika ku Sukulu ya Apharazgi a Ufumu. Yiwu apaskika nyumba yakujamu ndipu alonde ndalama zimanavi kuti aguliyengi vinthu vakukhumbika.

UTEŴETI WAKUWONERE DERA

¹⁶ Abali wo asankhika ndi Wupu Wakulongozga kuti aje akuwonere madera, asambizika dankha kuti ayiziŵi umampha ntchitu yawu chifukwa atamba dankha kuteŵete nge akukolezge udindu wa wakuwonere dera. Abali yaŵa atanja uteŵeti kweniso abali ŵaŵu. Yiwu mbapayiniya aphamphu, asambira Bayibolu nyengu zosi, akamba nkhani umampha ndipuso akuziŵa kusambiza. Aja chakuwoniyapu chamampha pa nkhani yakulongo mijalidu yo mzimu utitiwovya kuja nayu, achita vinthu mwakujumpha mwesu cha, mbakoroŵa ndipuso achita vinthu mwazeru. Asani mubali ngwakuto, muwolu waki yo ndi mpayiniya waja ndi jalidu lamampha, wachita vinthu umampha ndi ŵanthu kweniso wapharazga mwalusu. Waziŵa udindu waki kuti nge munthukazi wachikhristu wakhumbika kujithereska, wakhumbika cha kuŵereŵeta m’malu mwa murumu waki pamwenga kulongoro iyu pe asani wakambiskana ndi ŵanthu. Akuwonere madera ndi awolu ŵawu aja ndi ntchitu yikulu ndipu wo akhumba uteŵeti wenuwu atenere kuja ambula kutamatama. Apayiniya, achita kupempha cha kuti aje akuwonere madera. M’malu mwaki, akambiya wakuwonere dera wawu kuti akhumba uteŵeti wenuwu ndipu iyu watiŵakambiya vo angachita.

SUKULU ZA MUGULU LAKU CHIUTA

¹⁷ Sukulu ya Apharazgi a Ufumu: Pakhumbika apharazgi a Ufumu anandi kuti akapharazgengi muvigaŵa vo vileka kupharazgika pafupipafupi ndipuso kuti akawovyengi mipingu. Mwaviyo, abali ambula kuto, azichi ambula kuyirwa ndipuso Akhristu akutolana angapempha kuti akasere Sukulu ya Apharazgi a Ufumu. Asani amaliza sukulu yeniyi, atumizika kuvigaŵa va mucharu chawu, ko kulivi apharazgi anandi kuti akateŵetiyengi nge apayiniya a nyengu zosi. Kweni wo angajipereka angapaskika uteŵeti unyaki, mucharu chawu pamwenga mucharu chinyaki. Amanavi angatumizika kuti akateŵetiyengi nge apayiniya apade a kanyengu pamwenga a nyengu zosi. Apayiniya wo akhumba kuchisere Sukulu ya Apharazgi a Ufumu, akhumbika kusanirika pa unganu waku wo akhumba kuluta kusukulu yeniyi, wo uchitika pa unganu wachigaŵa kuti aziŵi vo atenere kuchita.

¹⁸ Sukulu ya Giliyadi: Abali ambula kuto, azichi ambula kuyirwa ndi Akhristu akutorana wo asankhika kuchisere sukulu yeniyi, atenere kuziŵa Chingelezi kweniso akhumbika kuja wo achita uteŵeti wanyengu zosi wapade. Yiwu atovya pa ntchitu yakupharazga muchigaŵa cho apaskika ndipuso atovya pa ofesi ya nthambi yo ateŵetiyapu. Abali ndi azichi ŵenaŵa, alongo kuti akondwa kuteŵete abali ŵawu ndipuso atiŵawovya mwachanju kuti asambiri ndi kugwiriskiya ntchitu ulongozgi wa m’Malemba kweniso wakutuliya ku gulu laku Yehova. Komiti ya Nthambi ya mucharu cho ndiyu yisankha abali ndi azichi akwenere kuti asayini mafomu ngakupempha kuchisere sukulu yeniyi. Ŵanthu wo amaliza sukulu iyi, atumizika kuti akapharazgengi pamwenga atumizika pa ofesi ya nthambi ya mucharu chinyaki pamwenga ya mucharu chawu.

UTEŴETI WA PA BETELI

¹⁹ Kuteŵete pa Beteli ndi mwaŵi wapade ukongwa. Zina lakuti Beteli, ling’anamuwa “Nyumba yaku Chiuta,” ndipu zina lenili ndakwenere chifukwa pamalu ngenanga agwiriyapu ntchitu yaku Chiuta. Abali ndi azichi wo ateŵete pa Beteli agwira ntchitu zakukhumbika ukongwa, apanga mabuku ngo ngakonkhoska Bayibolu, afwatuliya ndi kungatumiza ku malu ngakupambanapambana. Wupu Wakulongozga wo uwonere ndi kupereka ulongozgi ku mipingu yosi pacharu chapasi, uwona kuti ntchitu zo abali ndi azichi ŵenaŵa agwira zakukhumbika ukongwa. Ateŵeti a pa Beteli anandi wo afwatuliya mabuku, aja ndipuso agwiriya ntchitu yawu kumalu ngo ŵanthu aŵereŵeta chineneru cho afwatuliya. Ivi vitovya so kuti aziŵengi mo ŵanthu aŵereŵete zuŵa ndi zuŵa ndipuso asani atuvwa vo vilembeka m’mabuku ngo afwatuliya.

²⁰ Ntchitu zinandi zo zichitika pa Beteli zikhumba nthazi. Ndichu chifukwa chaki wo adanika kuti akateŵetiyengi pa Beteli akhumbika kuja Akhristu achinyamata akubatizika wo mbakujipereka, ambula kutamatama ndipuso anthazi. Asani pa Beteli yo yiwonere charu chinu pakhumbika ŵanthu ndipu imwi mukhumba kuchiteŵete, mungafumba ŵara a mpingu winu vo mukhumbika kuchita.

NTCHITU YAKUZENGA

²¹ Ntchitu yakuzenga vinthu vakupambanapambana vo vitovya pa ntchitu za Ufumu, mbuteŵeti wakupaturika ndipu uyanana ŵaka ndi ntchitu yakuzenga nyumba yakusopiyamu yaku Solomoni, yo yinguchitika mu nyengu yakali. (1 Mafu. 8:13-18) Abali ndi azichi anandi alongo kujipereka kwawu mwakugwiraku ntchitu yeniyi ndipu agwiriskiya ntchitu nyengu ndi chuma chawu.

²² Kumbi namwi mukhumba kugwiraku ntchitu yeniyi? Asani ndimwi mupharazgi wakubatizika ndipu mukhumba kuchita viyo, abali wo awonere ntchitu yakuzenga muchigaŵa chinu angawonga chovyu chinu ndipu mbakunozgeka kukusambizani chinanga kuti muziŵa vinandi cha. Mutenere kuziŵiska ŵara a mpingu winu asani mukhumba kovya pa ntchitu yeniyi. Apharazgi anyaki akubatizika wo mbakwenere, atijipereka kuluta kuvyaru vinyaki kuchigwira ntchitu yakuzenga nyumba zakupambanapambana zakovye ntchitu za ufumu.

²³ Pe nthowa zinandi zo tingawovye pa ntchitu yakuzenga. Apharazgi akubatizika ajalidu lamampha wo ŵe ndi lusu, wo angawovya pa ntchitu zenizi kufupi ndi ko aja angateŵete mu Dipatimenti Yakupanga Mapulanu ndi Kuzenga. Anyaki aluta ku madera ngakutali kuchiwovya kwa nyengu yimanavi. Yiwu asankhika ndi ofesi ya nthambi, kuti aje mugulu la abali ndi azichi wo atijipereka pa ntchitu zakuzenga ndipu atovya kwa masabata ngaŵi pamwenga myezi yitatu. Wo asankhika kuti ateŵete kwa nyengu yitali adanika kuti, ateŵeti a mugulu lakuzenga. Muteŵeti wa mugulu lakuzenga yo watumizika kuchiteŵete kucharu chinyaki wadanika kuti, muteŵeti wa mugulu lakuzenga wakutuliya kucharu chinyaki. Ateŵeti a mugulu lakuzenga kweniso abali ndi azichi wo atijipereka pa ntchitu zakuzenga apanga Gulu Lakuzenga. Gulu lenili ndilu lilongozga pa ntchitu yeyosi yo yikhumbika kugwirika. Ilu liwovyeka ndi Dipatimenti Yakupanga Mapulanu ndi Kuzenga kweniso mipingu yinyaki yo yigwiraku ntchitu yeniyi. Magulu ngakuzenga ngagwira ntchitu zenizi muvigaŵa vakupambanapambana va chigaŵa cha Nthambi ya charu cho.

KUMBI MUKHUMBA KUCHITA UTEŴETI NUWU?

²⁴ Asani mukujipatuliya kwaku Yehova, ndikuti mukhumba kumuteŵete mpaka muyaya. Kumbi imwi mukhumba kuchita uteŵeti nuwu? Kuja ndi vilatu po muteŵete Chiuta, kukuwovyeningi kugwiriskiya ntchitu nthazi ndi chuma chinu mwazeru. (1 Akori. 9:26) Vilatu venivi, vikuwovyeningi kuja pa ubwezi wakukho ndi Chiuta kweniso kuti muŵikengi maŵanaŵanu nginu pa vinthu vakukhumbika ukongwa, po mutesesa kuja akwenere kuchita mauteŵeti nganyaki.—Afi. 1:10; 1 Timo. 4:15, 16.

²⁵ Wakutumika Paulo ntchakuwoniyapu chamampha ukongwa cho tingalondo po titeŵete Chiuta. (1 Akori. 11:1) Iyu wateŵetiyanga Yehova mwaphamphu. Paulo waziŵanga kuti Yehova ndiyu wangumupaska mwaŵi wakumuteŵete mu nthowa zakupambanapambana. Iyu wangulembe Akhristu a ku Korinto kuti: “Khomu likulu lakulongozge ku uteŵeti landijulikiya.” Ndimu so viliri ndi isi. Nasi tingateŵete Yehova mu nthowa zakupambanapambana limoza ndi mpingu, ukongwa pakugwira ntchitu yakupharazga uthenga wamampha wa Ufumu. Kuti Paulo wasere pa “khomu likulu” lenili wakhumbikanga kulimbana ndi ‘akususka anandi.’ (1 Akori. 16:9) Paulo wayesesanga kujisambiza. Iyu wanguti: “Ndipuma liŵavu langu ndipu nditililongozga nge kapolu.” (1 Akori. 9:24-27) Kumbi nasi tichita viyo?

²⁶ Tosi tichiskika kuti tikhumbika kwesesa kufiska vilatu vidu mwakukoliyana ndi mo vinthu viliri pa umoyu widu. Mazuŵa nganu, anandi achita uteŵeti wa nyengu zosi chifukwa chakuti ŵenga ndi vilatu ŵeche anamana. Chinanga kuti ŵenga anamana pa nyengu yo, apapi ŵawu ndipuso ŵanthu anyaki anguŵachiska kuti aje ndi vilatu venivi. Ivi vaŵawovya kuti agwirengi ntchitu yakuzirwa ukongwa yakuteŵete Yehova, mwambula kudandawula. (Nthanthi 10:22) Tingaŵa so ndi chilatu chakuti tipharazgengi sabata yeyosi, tiyambisi kweniso tichitiskengi sambiru la Bayibolu pamwenga tisaniyengi nyengu yinandi yakunozgeke maunganu. Chakukhumbika ukongwa ntchakuti tikhumbika kulutirizga kuja ndi chivwanu chakukho ndipuso kufiska uteŵeti widu. Asani tichitengi viyo, titumbikengi Yehova ndipuso tifiskengi chilatu chidu chikulu chakumuteŵete mpaka muyaya.—Luka 13:24; 1 Timo. 4:7b, 8.