SAMBIRU 4
Kumbi Yesu Khristu Ndiyani?
1. Kumbi umoyu waku Yesu ungwamba wuli?
Kumbi ndi mijalidu niyi yo yinguchitisa kuti Yesu waje wakufikirika?—MATEYU 11:29; MARIKO 10:13-16.
Yesu wapambana ndi munthu munyaki weyosi chifukwa chakuti iyu wenga kuchanya wechendawi nge munthu pacharu chapasi. (Yohane 8:23) Iyu ndiyu wangwamba kulengeka pa vinthu vosi vo Chiuta wakulenga ndipu wawovyananga ndi Chiuta pa ntchitu yakulenga vinthu vinyaki vosi. Yehova wakumulenga yija Yesu kwambula kugwiriskiya ntchitu munthu munyaki weyosi, ndichu chifukwa chaki Yesu wadanika kuti “Mwana wapade” waku Chiuta. (Yohane 1:14) Yesu waŵereŵetanga so mumalu mwaku Chiuta lekani wadanika kuti “Mazu.”—Ŵerengani Nthanthi 8:22, 23, 30; Akolose 1:15, 16.
2. Ntchifukwa wuli Yesu wanguza pacharu?
Chiuta wangutuma Mwana waki pacharu. Kuti ivi vichitiki, iyu wanguto umoyu waku Yesu kuchanya ndi kuwuŵika mumoyu mwaku Mariya yo wenga msungwana wa Chiyuda. Mwaviyo, Yesu wengavi awisi aumunthu. (Luka 1:30-35) Yesu wanguza pacharu (1) kuzisambiza uneneska wakukwaskana ndi Chiuta, (2) kuzitilongo mo tingachitiya khumbu laku Chiuta chinanga kuti tingakumana ndi masuzgu, ndipuso (3) kuzipereka umoyu waki wambula ubudi kuti uje nge “sembi.”—Ŵerengani Mateyu 20:28.
3. Ntchifukwa wuli tikhumbika sembi yakuwombore?
Sembi yakuwombore ndi malipiru ngo munthu wapereka kuti wawombo munthu munyaki yo we ndi mulandu kuti waleki kubayika. (Ekisodo 21:29, 30) Lenga khumbu laku Chiuta cha kuti ŵanthu akotengi ndi kufwa. Kumbi tiziŵa wuli venivi? Chiuta wangumukambiya limu Adamu kuti wafwengi asani wachitengi “ubudi” wo Bayibolu likamba. Mwaviyo, Adamu watingi wafwengi cha asani wanguleka kubuda. (Genezesi 2:16, 17; 5:5) Bayibolu likamba kuti nyifwa ‘yikusere’ mucharu kuporote mwaku Adamu. Mwaviyo, Adamu wakuŵayambuzgiya ubudi ndi nyifwa ŵana ŵaki wosi. Ndichu chifukwa chaki tikhumbika sembi kuti yitiwombo ku chilangu cha nyifwa cho tikuhara kwaku Adamu.—Ŵerengani Aroma 5:12; 6:23.
Kumbi ndiyani yo wenga wakwenere kupereka umoyu waki nge sembi yakutiwombo ku nyifwa? Asani munthu wafwa, watijipereke sembi ya maubudi ngaki. Palivi munthu wambula kufikapu yo wangapereka sembi yakuwombore anyaki.—Ŵerengani Masalimo 49:7-9.
4. Ntchifukwa wuli Yesu wangufwa?
Yesu wapambana ndi isi. Iyu wenga wakufikapu pamwenga kuti wambula kubuda. Mwaviyo, iyu wangufwiya mphulupulu zaki cha, chifukwa palivi cho wangunanga. Mumalu mwaki, Yesu wangufwiya maubudi nga ŵanthu. Yapa Chiuta wangulongo kuti watitiyanja ukongwa taŵanthu pakutitumiya Mwana waki kuti wazitifwiyi. Yesu nayu wangulongo chanju chikulu pakuvwiya Awisi ndi kupereka umoyu waki chifukwa cha maubudi ngidu.—Ŵerengani Yohane 3:16; Aroma 5:18, 19.
Woneriyani vidiyo yakuti Kumbi Ntchifukwa Wuli Yesu Wangufwa?
5. Kumbi Yesu wachitanji sonu?
Pa nyengu yo wenga pacharu chapasi, Yesu wachizganga akutama, wayuskanga akufwa kweniso wawovyanga ŵanthu akusuzgika. Ivi vingulongo vo wazamuchitiya ŵanthu akuvwiya kunthazi. (Mateyu 15:30, 31; Yohane 5:28) Yesu wati wafwa, Chiuta wangumuyuska ndipu wangumupaska so umoyu wauzimu. (1 Peturo 3:18) Yesu wangulindizga kujanja lamaryi laku Yehova mpaka po wangumupaskiya nthazi zakulamuliya nge Fumu pacharu chosi chapasi. (Aheberi 10:12, 13) Pasonupanu, Yesu walamuliya nge Fumu kuchanya ndipu akumulondo ŵaki apharazga uthenga wamampha wenuwu pacharu chosi chapasi.—Ŵerengani Daniyeli 7:13, 14; Mateyu 24:14.
Pambula kuswera yapa, Yesu wagwiriskiyengi ntchitu nthazi zaki nge Fumu kuti watuzgepu masuzgu ngosi pacharu chapasi kweniso ŵanthu wo atambisa masuzgu. Ŵanthu wosi wo agomezga Yesu ndi kumuvwiya azamulonde umoyu wambula kumala mu paradayisu pacharu chapasi.—Ŵerengani Masalimo 37:9-11.