Bokosi La Mafumbu
◼ Kumbi ŵana atenere kusambiranji kuti akuwi mwauzimu?
Pe vinandi vo apapi achikhristu achita kuti aleri ŵana ŵawu “mu marangu ngaku Yehova ndipuso visambizu vaki.” (Ŵaef. 6:4; Mazu ngamumphata, NW) Mwakuyeruzgiyapu, apapi awona kuti nkhwamampha kukambiskana lemba la zuŵa ndi mulenji wewosi limoza ndi ŵana ŵawu. Pa nyengu yakusopa kwa pabanja ndipuso pa vakuchitika vinyaki, banja lingawonere vidiyo ndi kukambiskana vo asambirapu. Angakambiskana so nkhani za m’buku lakuti, Zimene Achinyamata Amafunsa ndipuso angachita seŵeru la nkhani za m’Bayibolo. Kweni ŵana atenere kusambizika fundu zikuluzikulu za m’Bayibolo kuti akuwi mwauzimu.—Ŵah. 6:1.
Ŵanaŵaniyani vo tisambiza ŵanthu wo titiŵasaniya m’chigaŵa chidu. Pa ulendu wakwamba pamwenga wachiŵi, tiyesesa kuti tiyambi kusambira nawu Bayibolo mwakugwiriskiya nchitu buku lakuti, Kumbi Bayibolo Lisambizanji Weniukongwa? Asani tamaliza kusambira nawu buku ili, titamba kusambira nawu buku lakuti, “Mujisungi mu Chanju Chaku Chiuta.” Nchifukwa wuli tichita viyo? Chifukwa chakuti buku la Bayibolo Lisambizanji litovya munthu kuti waziŵi visambizu vakwamba va m’Malemba. Buku la “Chanju Chaku Chiuta” litiŵawovya mo angagwiriskiya nchitu fundu za m’Bayibolo pa umoyu wa zuŵa ndi zuŵa. Kusambira nawu mabuku ngosi ngaŵi ngenanga kutovya asonu kuti aje ‘akumererwa’ mwaku Khristu ndipuso ‘akukhozgeka mu chivwanu.’ (Ŵakol. 2:6, 7) Kumbi mabuku ngenanga ngangawovya so cha ŵana ŵidu? Nawu akhumbika kusambira vakukwaskana ndi sembi, Ufumu kweniso vo vichitika asani munthu wafwa. Ŵana akhumbika so kuziŵa chifukwa cho Chiuta wazomerezge masuzgu ndipuso vo vingaŵawovya kuziŵa kuti te munyengu ya umaliru wa mgonezu wunu. Atenere kusimikizga kuti Akaboni aku Yehova asambiza vinthu vauneneska. Ŵana atenere so kuziŵa fundu za m’Bayibolo kweniso kuziŵa “chamampha ndi so chiheni.” (Ŵah. 5:14) Apapi akhumbika kuziŵa fundu zo ŵana ŵawu angazivwisa umampha malinga ndi msinkhu wawu. Kweni ŵana anandi asambira fundu zikuluzikulu za m’Bayibolo chinanga kuti ŵeche anamana.—Luka 2:42, 46, 47.
Fundu za m’buku la Bayibolo Lisambizanji zo zingawovya apapi kusambiza ŵana ŵawu, ziyambengi kusanirika pa Webusayiti ya jw.org. Mabanja ngangasaniya fundu zenizi pa Webusayiti asani angawona po pambeleka kuti ZIMENE BAIBULO LIMAPHUNZITSA > ACHINYAMATA. Fundu zinyaki za m’buku la “Chanju Chaku Chiuta” zazamusazgikiyapu kunthazi pa Webusayiti yeniyi. Kweni tikhoza kugwiriskiya nchitu fundu zo ze m’buku lo te nalu. Apapi angasankha kugwiriskiya nchitu fundu zenizi Pakusopa kwa Pabanja, asani asambira ndi mwana wawu pamwenga asani atimusambiza mo wangachitiya sambiru lapakuyija.