Malifalensi nga Nkhani za Unganu wa Umoyu Widu Wachikhristu Ndipuso Uteŵeti
MARCH 13-19
CHUMA CHAKUTULIYA M’MAZU NGAKU CHIUTA | YEREMIYA 5-7
“Anguleka Kuchita Khumbu Laku Chiuta”
w88 4/1 11-12 ¶7-8
Yeremiya Wenga Mchimi yo Wapharazganga Cheruzgu Chaku Chiuta Chinanga Kuti Ŵanthu Amuvwiyanga Cha
7 Yehova wanguchenjeza kuti: “Ndipu azamuchita nawi nkhondu, kweni azakukuwina cha.” (Yeremiya 1:19) So ntchifukwa wuli Ayuda ndipuso akulamuliya akhumbanga kupumana ndi mchimi uyu? Chifukwa chakuti uthenga waki wavumbuwanga vinthu viheni vo achitanga pakusopa. Yeremiya wangugongowa cha. Iyu wangukamba kuti: “Wonani! Mazu ngaku Yehova nganyozeka, ndipu akondwa nangu cha. Pakuti kwamba munamana mpaka mura watijisaniriya phindu mwachinyengu. Kwambiya mchimi mpaka wasembi [wo akhumbikanga kuti awovyengi ŵanthu kuti aje ndi mijalidu yamampha] nawu achita vinthu vachinyengu.”—Yeremiya 6:10, 13.
8 Mbuneneska kuti yiwu awovyanga ŵanthu kuti aperekengi sembi, ndipuso aziŵanga umampha mo angasope mwauneneska kweni achitanga viyo cha. Yiwu alondonga ukongwa miyambu kuluska mijalidu yamampha. Pa nyengu yeniyi, alongozgi achiyuda apusikanga ŵanthu kuti aŵawovyengi kuti ajengi mwachimangu. Yiwu aŵakambiyanga kuti: “Pe chimangu! Pe chimangu!” kweni pengavi chimangu. (Yeremiya 6:14; 8:11) Mwaviyo, yiwu apusisanga waka ŵanthu kuti agomezengi kuti ŵe pachimangu ndi Chiuta. Yiwu awonanga kuti pengavi chakofya chifukwa chakuti ŵenga mtundu wo Yehova wanguwutaska, kweniso ungulonda msumba wakupaturika wo mwenga nyumba yakusopiyamu. Kweni kumbi Yehova wawonanga so viyo?
w88 4/1 12 ¶9-10
Yeremiya Wenga Mchimi yo Wapharazganga Cheruzgu Chaku Chiuta Chinanga Kuti Ŵanthu Amuvwiyanga Cha
9 Yehova wangukambiya Yeremiya kuti wami pakhomu la nyumba yakusopiyamu kuti wapereki uthenga Waki ku ŵanthu wo aserenga munyumba yakusopiyamu. Iyu waŵakambiyanga kuti: “Mungangagomezanga cha mazu ngaboza ngakuti, ‘Iyi ndi nyumba yaku Yehova, nyumba yaku Yehova, nyumba yaku Yehova!’ . . . mazu yanga ngakuwovyeningi cha.” Ayuda ŵengavi chivwanu ndipu agomezanga ukongwa vakuwoneka ndi masu kweniso achitanga vinthu mwakujikuzga munyumba yakusopiyamu. Yiwu anguluwa mazu ngaku Yehova ngakuŵachenjeza ngakuti: “Kuchanya ndiwu mpandu wangu wachifumu ndipu charu chapasi mphakukanda malundi ngangu. Sonu yepani nyumba yo mwandizenge mwaŵanthu imwi?” Yehova, Mweneku Wachilengedu Chosi watingi watondekengi cha kuchita vo wakhumbanga pa nyumba yakusopiyamu chinanga kuti ŵanthu ayiwonanga kuti yenga yakuzirwa ukongwa.—Yeremiya 7:1-8; Yesaya 66:1.
10 Yeremiya wangulutiriza kuŵachenya mwanthazi kuti: “Kumbi mungaba, kubaya ŵanthu, kuchita ureŵi, kulapa mwachinyengu, kupereka sembi kwaku Bala ndipuso kulondo achiuta anyaki wo muleka kuŵaziŵa, . . . ndipu mungakamba kuti, ‘Titaskikengi’ chinanga kuti muchita vinthu vaukazuzi?” Ayuda wo ŵenga ‘mtundu wakusankhika ‘ndi Chiuta, aŵanaŵananga kuti wazomereza vosi vo achitanga, chikulu atuza ndi sembi kunyumba yakusopiyamu. Chinanga kuti yiwu amuwonanga nge da yo walekele mwana waki, kweni anguzizwa ndi mo Yehova wanguŵalangiya chifukwa cha vakuchita vawu.—Yeremiya 7:9, 10; Chituwa 19:5, 6.
Kufufuza Fundu Zakuzirwa za M’Bayibolu
w88 4/1 13 ¶15
Yeremiya Wenga Mchimi yo Wapharazganga Cheruzgu Chaku Chiuta Chinanga Kuti Ŵanthu Amuvwiyanga Cha
Yuda Wangulangika
15 Cham’ma 632 B.C.E., Ufumu wa Asiriya unguthereskeka ndi Alkadiya kweniso Amedi. Egipiti nayu wangumala nthazi kumwela kwa Yuda. Ayuda awopanga ukongwa asilikali akutuliya kumpotu. Ndichu chifukwa chaki Yeremiya wangukambiya Ayuda anyaki kuti: “Wonani, ŵanthu atuliyengi kumpotu . . . Yiwu mbankhaza ndipu alivi lisungu. . . . Ŵama pamuzeri kunozgeke kuchita nawi nkhondu iwi mwana munthukazi waku Ziyoni.” Pa nyengu iyi, ufumu wa Babiloni ndiwu wenga wanthazi ukongwa pacharu chosi. Mwaviyo, Chiuta wangugwirisiya ntchitu ufumu wenuwu kuti walangi Ayuda ambula kugomezeka.—Yeremiya 6:22, 23; 25:8, 9.
MARCH 20-26
CHUMA CHAKUTULIYA M’MAZU NGAKU CHIUTA | YEREMIYA 8–11
“Ŵanthu Atumbikika Asani Alongozgeka ndi Yehova Pe”
it-1 555
Vinkhaka
Mumunda wa vinkhaka ajinthangamu mapolu pamwenga kuzengamu vipilala, ndipuso vinthu vinyaki kuti awofyezengi nyama zo zaryanga vinkhaka mumunda. Mwaviyo, mchimi Yeremiya wanguyeruziya “vakuwofyeze va mumunda wa vinkhaka” ndi angoza wo ŵanthu agwirisiyanga ntchitu pakusopa.—Yer. 10:5.
MARCH 27–APRIL 2
CHUMA CHAKUTULIYA M’MAZU NGAKU CHIUTA | YEREMIYA 12–16
“Ayisraele Angumuluwa Yehova”
it-1 1121 ¶2
Chiunu
Yehova wangukamba kuti nyumba ya Yisraeli ndipuso Yuda ye nge lamba yo wamangika ukongwa muchiunu chaki, kuti aje ŵanthu ŵaki wo amutumbikengi kweniso kukweza zina laki. (Yer. 13:11) Uchimi ulongo kuti Yesu Khristu wazamulamuliya mwaurunji ndipuso mwakugomezeka nge lamba yo wamangika muchiunu chaki. Ivi vilongole limu kuti Yesu Khristu wachita vinthu vosi mwaurunji ndipuso mwakugomezeka. Mwakuyanana ndi lamba yo watovya kuti chakuvwala chikho muchiunu, kuchita vinthu mwaurunji kutimuwovya kuti wafiski udindu wo Yehova wakumupasa nge Wakuyeruzga.—Yes. 11:1, 5.