Malifalensi nga Nkhani za Unganu wa Umoyu Widu Wachikhristu Ndipuso Uteŵeti
APRIL 3-9
CHUMA CHAKUTULIYA M’MAZU NGAKU CHIUTA | YEREMIYA 17–21
“Zomerezani Kuti Yehova Wawumbi Maŵanaŵanu Nginu Kweniso Vakuchita Vinu”
it-2 776 ¶4
Kulapa
Wakuwumba wangasintha chinthu cho wawumba ndipu wangawumba chinyaki asani wawona kuti chakwamba “wachinanga ndi janja laki.” (Yer. 18:3, 4) Mu chakuyeruziyapu ichi, Yehova watijiyeruzgiya ndi munthu yo wananga cho wawumba cha. M’malu mwaki walongo waka kuti iyu we ndi ulamuliru wosi pa ŵanthu. We ndi mazaza ngakusintha asani wawona kuti ŵanthu avwiya marangu ngaki pamwenga cha. Kweniso wangasintha asani wawona kuti atondeka kuwonga lisungu laki ndi urunji waki. (Yeruzgiyani ndi Yes. 45:9; Ŵar. 9:19-21.) Mwaviyo, iyu ‘wangasintha maŵanaŵanu ngaki kuti waleki kulanga ŵanthu nge mo waŵanaŵaniyanga,’ pamwenga ‘wangasintha maŵanaŵanu ngaki pa vinthu vamampha vo watingi wachitiyengi ŵanthu.’ Iyu wangachita ivi asani ŵanthu wo avwiya vo wakhumba pamwenga cha. (Yer. 18:5-10) Mwaviyo, Yehova yo Ngwakuwumba Mura wanangisa cha, kweni munthu yo ndi “dongu,” ndiyu wananga ndipu “wangasintha” mijalidu yaki asani wangakhumba. Pavuli paki, wangasintha maŵanaŵanu ngaki pamwenga kuti wangalapa kwaku Yehova.
APRIL 24-30
CHUMA CHAKUTULIYA M’MAZU NGAKU CHIUTA | YEREMIYA 29–31
“Yehova Wangukambiya Limu za Phanganu Lifya”
it-1 524 ¶3-4
Phanganu
Phanganu Lifya. Cham’ma 600 B.C.E., Yehova wangukambiya limu za phanganu lifya kuziya mwa mchimi Yeremiya. Phanganu ili layanananga cha ndi phanganu la Dangu lo Ayisraele angutondeka kulivwiya. (Yer. 31:31-34) Usiku wakuti wafwengi mawa laki, pa Nisani 14, 33 C.E., Yesu wanguyambisa mwambu wakukumbukiya nyifwa yaki wo udanika kuti Chakurya Chamazulu cha Ambuya. Pa nyengu yeniyi ndipu wangukambiya akusambira ŵaki za phanganu lifya kuti liyambengi kugwira ntchitu chifukwa cha sembi yaki. (Luka 22:20) Pati pajumpha mazuŵa 50 kutuliya po Yesu wanguyusikiya, ndipuso pati pajumpha mazuŵa 10 wati waluta kuchanya kwa Awisi, wanguŵatumiziya mzimu wakupaturika akusambira ŵaki wo anguwungana muchipinda chapachanya ku Yerusalemu.—Mac. 2:1-4, 17, 33; 2 Ŵakor. 3:6, 8, 9; Ŵah. 2:3, 4.
Wo ŵe muphanganu lifya ili ndi Yehova ndi “Yisraele waku Chiuta” yo wakusankhika ndi mzimu mwakukoliyana ndi Khristu, ndipu apanga mpingu pamwenga liŵavu. (Ŵah. 8:10; 12:22-24; Ŵag. 6:15, 16; 3:26-28; Ŵar. 2:28, 29) Phanganu lifya ili lingwamba kugwira ntchitu chifukwa cha ndopa zaku Yesu Khristu (pamwenga kuti sembi ya liŵavu laki) yo wangupereka ndipu yingwamba kugwira ntchitu wati waluta kuchanya. (Mat. 26:28) Mwaviyo, asani munthu wasankhika kuti waluta kuchanya (Ŵah. 3:1), Chiuta watimuŵika mugulu la ŵanthu wo ŵe muphanganu lifya lo ligwira ntchitu chifukwa cha sembi yaku Yesu. (Sumu 50:5; Ŵah. 9:14, 15, 26) Yesu Khristu ndiyu Mwendapakati wa phanganu lifya (Ŵah. 8:6; 9:15) ndipu iyu ndiyu Mbewu yakwamba yaku Abrahamu. (Ŵag. 3:16) Chifukwa chakuti Yesu ndi mwandapakati wa phanganu ili, watovya wosi wo ŵe muphanganu ili kuja chigaŵa cha mbewu chayiyu yaku Abrahamu. (Ŵah. 2:16; Ŵag. 3:29) Yesu wachita ivi mwakuŵagowoke maubudi ngawu ndipu pavuli paki Yehova watiŵawona kuti mbarunji.—Ŵar. 5:1, 2; 8:33; Ŵah. 10:16, 17.