SAMBIRU 09
Mupempherengi Kwaku Chiuta Kuti Ubwezi Winu ndi Iyu Uje Wakukho
Kumbi muwona kuti mukhumbika ulongozgi wewosi pa umoyu winu? Kumbi mwe ndi mafumbu ngo mukhumba kuti ngamukiki? Kumbi mukhumba kupembuzgika pamwenga kuchiskika? Kumbi mukhumba kuti mujivwengi kuti mwe pafupi ukongwa ndi Yehova? Pempheru lingakuwovyani kuti vosi venivi vichitiki. Kweni mungachita wuli kuti mupempherengi munthowa yakwenere? Kumbi Chiuta wavwisiya mapempheru ngosi? Kumbi mungachita wuli kuti Chiuta wavwisiyengi mapempheru nginu? Tiyeni tiwoni.
1. Kumbi titenere kupemphera kwaku yani, nanga ndi nkhani nizi zo tingakamba mu mapempheru ngidu?
Yesu wangukamba kuti titenere kupemphera kwa Awusefwi akuchanya pe mbwenu. Yesu nayu mweneku wapempheranga kwaku Yehova. Wangukamba kuti: “Yimwi mupempherengi viyo: ‘Awusefwi akuchanya . . . ’” (Mateyu 6:9) Asani tipemphera kwaku Yehova, ubwezi widu ndi iyu ukho ukongwa.
Tingapemphera kwaku Yehova nkhani yeyosi yo tiwona kuti njakukhumbika ukongwa. Kuti Chiuta wamukengi mapempheru ngidu, vo tipempha vitenere kukoliyana ndi khumbu laki. “Chechosi cho tingapempha mwakukoliyana ndi khumbu laki watitivwa.” (1 Yohane 5:14) Yesu wangukambapu vinthu vakukhumbika vo tingazumbuwa mu mapempheru ngidu. (Ŵerengani Mateyu 6:9-13.) Kusazgiyapu pa kupempha vo tikhumba, tingaluwanga so cha kumuwonga Chiuta pa vo watichitiya, kweniso kumupempha kuti wawovyi anyidu.
2. Kumbi titenere kupemphera wuli?
Bayibolu likamba kuti “mujuliyeni mitima yinu [Chiuta].” (Salimo 62:8) Mwaviyo, mapempheru ngidu ngatenere kuja ngakutuliya pasi pa mtima. Tingapemphera mwakukweza mazu pamwenga chamumtima, ndipu tingaja po takhumbiya kweni mwaulemu. Tingapemphera nyengu yeyosi kweniso pamalu ngengosi.
3. Kumbi Chiuta wamuka wuli mapempheru ngidu?
Yehova wamuka mapempheru ngidu munthowa zakupambanapambana. Iyu watipaska Bayibolu lo limuka mafumbu ngidu. Kuŵerenga Mazu ngaku Chiuta “[kutimupaska] zeru yo waleka kuziŵa vinandi.” (Salimo 19:7; ŵerengani Yakobe 1:5.) Iyu wangatiwovya kuti tije ndi chimangu chamumtima asani takumana ndi masuzgu. Wangachitiska ateŵeti ŵaki kuti atiwovyi pa nyengu yo tasuzgika ukongwa.
SAMBIRANI VINANDI
Wonani mo mungapemphere munthowa yo yingakondwesa Chiuta ndipuso mo kupemphera kungakuwovyiyani.
4. Vo vikhumbika kuti mapempheru ngidu ngaje ngakuzomerezeka kwaku Chiuta
Kumbi ndi vinthu wuli vo vingalongo kuti mapempheru ngidu ngakuzomerezeka kwaku Chiuta pamwenga cha? Woneriyani VIDIYO.
Yehova wakhumba kuti tipempherengi kwaku iyu. Ŵerengani Salimo 65:2, ndipu pavuli paki kambiskanani mafumbu yanga:
Kumbi muwona kuti “Wakuvwa pempheru” wakhumba kuti yimwi mupempherengi nadi kwaku iyu? Ntchifukwa wuli muwona viyo?
Titenere kuyesesa kugwiriskiya ntchitu fundu zaku Chiuta asani tikhumba kuti iyu wavwengi mapempheru ngidu. Ŵerengani Mika 3:4 ndipuso 1 Peturo 3:12, ndipu pavuli paki kambiskanani fumbu ili:
Kumbi tingachita wuli kuti Yehova wavwisiyengi mapempheru ngidu?
Pa nkhondu, magulu ngosi ngaŵi ngo ngalimbana ngapemphera. Kumbi mphakuvwika kugomezga kuti Chiuta wamukengi mapempheru ngenanga?
5. Mapempheru ngidu ngatenere kutuliya mumtima
Ŵanthu anyaki akusambizika kuti aloŵezengi mapempheru ndipu apempherengi mwakuwereza mazu. Kweni ndimu Chiuta wakhumbiya? Ŵerengani Mateyu 6:7, ndipu pavuli paki kambiskanani fumbu ili:
Kumbi mungachita wuli kuti muleki ‘kuwerezawereza’ mazu pakupemphera?
Zuŵa lelosi muŵanaŵaniyengi chinthu chamampha cho Yehova wakuchitiyani ndipu mumuwongengi chifukwa cha chinthu chenicho. Asani mungachita venivi zuŵa lelosi kwa sabata yamphumphu, muwonengi kuti mupempheriyengi vinthu 7 vakupambanapambana kwambula kuwerezawereza mazu.
Ada amampha akhumba kuti mwana wawu wakambiskanengi nawu mwakutuliya pasi pa mtima. Yehova nayu wakhumba kuti tipempherengi kwaku iyu mwakutuliya pasi pa mtima
6. Pempheru ndi mphasu yapade yakutuliya kwaku Chiuta
Kumbi pempheru lingatiwovya wuli pa nyengu yo te pa chimangu ndipuso asani takumana ndi masuzgu? Woneriyani VIDIYO.
Bayibolu lititikambiya kuti pempheru lingatiwovya kuti tije ndi chimangu chamumtima. Ŵerengani Afilipi 4:6, 7, ndipu pavuli paki kambiskanani mafumbu yanga:
Kumbi pempheru lititiwovya wuli chinanga kuti lingatuzgiyapu limu cha masuzgu ngidu nyengu yeniyo?
Kumbi ndi vinthu wuli vo mungayanja kukamba mu pempheru linu?
Kumbi muziŵa?
Mazu ngakuti “ame” ngang’anamuwa kuti “vije viyo” pamwenga kuti “hinya nadi.” Kutuliya kali ukongwa, mazu ngakuti ame ngagwiriskikiya ntchitu pakumaliya pa pempheru.—1 Mbiri 16:36.
7. Musaniyengi nyengu yakupemphere
Nyengu zinyaki tingatangwanika ukongwa mpaka kuluwa kupemphera. Kumbi Yesu waliwonanga wuli pempheru? Ŵerengani Mateyu 14:23 ndipuso Mariko 1:35, ndipu pavuli paki kambiskanani mafumbu yanga:
Kumbi Yesu wachitanga wuli kuti wasaniyengi nyengu yakupemphere?
Kumbi yimwi mungayanja kupemphera nyengu wuli?
ŴANTHU ANYAKI AKAMBA KUTI: “Pempheru litovya viŵi cha, lichitiska waka kuti munthu wavweku umamphaku.”
Yimwi mungamuka wuli asani munthu wakamba viyo?
KUMBI MWASAMBIRANJI?
Mapempheru ngakutuliya pasi pa mtima ngatitiwovya kuti tije pa ubwezi wakukho ndi Yehova, tije ndi chimangu chamumtima kweniso kuti tichitengi vinthu vo vingakondwesa Yehova.
Kuweriyamu
Kumbi titenere kupemphera kwaku yani?
Kumbi titenere kupemphera wuli?
Kumbi pempheru lingatiwovya wuli?
FUFUZANI
Saniyani kwamuka kwa mafumbu ngo ŵanthu anandi afumba ngakukwaskana ndi pempheru.
“Vinthu 7 vo Mukhumbika Kuziŵa pa Nkhani ya Pempheru” (Chigongwi cha Alinda, October 1, 2010)
Wonani vifukwa vikuluvikulu vo tikhumbikiya kupemphera ndipuso vo mungachita kuti mapempheru nginu ngajengi ngamampha ukongwa.
“Ntchifukwa Wuli Ndikhumbika Kupemphera?” (Nkhani ya pa webusayiti)
Kumbi titenere kupemphera kwaku yani? Wonani vo Bayibolu likamba.
“Kumbi Ndikhumbika Kupemphera kwa Atuŵa Mtima?” (Nkhani ya pa webusayiti)
Mu vidiyo iyi, wonani asani nkhwakwenere kupemphera pamalu ngengosi ndipuso nyengu yeyosi.