Gomezgani Kuti Mwazamutaskika pa Nyengu yo Mugonezi Wunu Wazamumaliya

Pambula kuswera yapa Yehova walekengi kuzikira ndi vinthu viheni vo vichitika mucharu ichi. Visopa vaboza vazamubwangandulika, vyaru vo vazamukoliyana vazamuyukiya ateŵeti aku Chiuta ndipu Yehova wazamubaya ŵanthu aheni pa Aramagedoni. Akhristu alindizga nyengu yakukondweska yeniyi.

Tiziŵa vosi cha vakukwaskana ndi chisuzgu chikulu. Mwakuyeruzgiyapu, tiziŵa cha zuŵa chayilu lo chisuzgu chikulu chazamukwambiya. Tiziŵa cha chifukwa cho chazamuchitiska a ndali kuti ayukiyi chisopa. Tiziŵa cha kuti vyaru vazamuyukiya ateŵeti aku Chiuta kwa nyengu yitali wuli ndipuso vo vazamuchitika. Kweniso tiziŵa cha nthowa yo Yehova wazamugwiriskiya ntchitu kuti wabayi ŵanthu aheni pa Aramagedoni.

Malemba ngatitikambiya vo vingatiwovya kuti tije ndi chiganga ndi vo vichitikengi munthazi. Mwakuyeruzgiyapu, tiziŵa kuti tija kukumaliya kwa “mazuŵa ngakumaliya.” (2Ti 3:1) Tiziŵa kuti kuyukilika kwa chisopa ‘kwazamudumulizgika’ kuti chisopa chauneneska chizileki kubwangandulika. (Mt 24:22) Tiziŵa kuti Yehova wazamutaska ŵanthu ŵaki. (2Pe 2:9) Ndipuso tiziŵa kuti yo Yehova wasankha kuti wabayi ŵanthu aheni ndi kuvikiliya a mzinda ukulu pa Aramagedoni ngwanthazi kweniso ndi murunji.​—Chv 19:11, 15, 16.

Ŵanthu “azamukufwa chipoyu chifukwa cha mantha” ndi vo vazamuchitika munthazi. Kweni asani tiŵerenga Bayibolu ndi kuŵanaŵaniyapu mo Yehova wangutaskiya ŵanthu ŵaki munyengu yakali kweniso mo wavumbuliya vinthu vo vazamuchitika munthazi, ‘tingama ndi kuyunuska mitu yidu,’ chifukwa chakuti utaski widu we pafupi.​—Lk 21:26, 28.