MO MUNGAYAMBIYA KUKAMBISKANA NDI ŴANTHU
SAMBIRU 5
Muchitengi Vinthu Mwaulemu
Fundu ya mu Bayibolu: “Mazu nginu ngaŵengi ngakunoza nyengu zosi.”—Ako. 4:6.
Vo Paulo Wanguchita
1. Woneriyani VIDIYO, pamwenga ŵerengani Machitidu 17:22, 23. Pavuli paki ŵanaŵaniyani mafumbu yanga:
Kumbi Paulo wanguvwa wuli mumtima chifukwa cha vinthu vakulongo kusopa kwaboza vo wanguwona ku Atene?—Wonani Machitidu 17:16.
Mumalu mwakuŵasuska ŵanthu a ku Atene, kumbi Paulo wangulongoro nawu wuli mwaulemu kuti waŵapharazgiyi uthenga wamampha mwakugwiriskiya ntchitu vo agomezganga?
Kumbi Tisambiranji Kwaku Paulo?
2. Ŵanthu aja ndi mtima wakukhumba kuvwisiya asani tilongoro nawu mazu ngamampha, munthowa yakwenere kweniso pa nyengu yakwenere.
Muyezgengi Paulo
3. Musankhengi mazu ngamampha. Mwakuyeruzgiyapu, asani mukambiskana ndi munthu yo ndi Mkhristu cha, mungakhumbika kusintha mo mungayambiya kukambiskana nayu kwambula kuzumbuwa vakukwaskana ndi Bayibolu pamwenga Yesu.
4. Mungathaŵiriyanga cha kumunyoro vo wanangisa. Muŵazomerezengi kuti akonkhoskengi maŵanaŵanu ngawu mwakufwatuka. Asani akamba fundu yinyaki yo yikoliyana cha ndi vo Bayibolu lisambiza, mungapindananga nawu cha. (Yako. 1:19) Asani muvwisiya pa nyengu yo alongoro, vikuwovyeningi kuziŵa vo agomezga kweniso chifukwa chaki.—Nthanthi 20:5.
5. Muzomerezengi vo wakamba kweniso kumuwonga po mphakwenere. Panyaki wagomezga kuti vo chisopa chaki chisambiza ndivu vauneneska. Asani ndi viyo, muyesesengi kukambiskana nayu fundu zo mosi mukoliyana nazu ndipu pavuli paki kamana ndi kamana muwovyeni kuvwisa vo Bayibolu lisambiza.