MO MUNGAYAMBIYA KUKAMBISKANA NDI ŴANTHU
SAMBIRU 1
Mukambengi Nkhani zo Zingakondwesa Ŵanthu
Fundu ya mu Bayibolu: “Chanju. . . chikhumba vakuchija pe cha.”—1 Akori. 13:4, 5.
Vo Yesu Wanguchita
1. Woneriyani VIDIYO, pamwenga ŵerengani Yohane 4:6-9. Pavuli paki ŵanaŵaniyani mafumbu yanga:
Kumbi ndi vinthu wuli vo Yesu wanguwona wechendayambi kukambiskana ndi munthukazi uyu?
Yesu wangukamba kuti: “Ndipaskeku maji ngakumwa.” Ntchifukwa wuli yeniyi yenga nthowa yamampha yakwambiya kukambiskana?
Kumbi Tisambiranji Kwaku Yesu?
2. Ŵanthu angakondwa ukongwa asani tingayamba kukambiskana nawu nkhani yo yingaŵakondwesa.
Muyezgengi Yesu
3. Mujengi akunozgeka kusintha. Asani mutamba kukambiskana ndi ŵanthu, mungangangamiyanga nkhani yo mwanozgeke pe cha. Kweni kambiskanani nawu nkhani yo yaziŵika ndi ŵanthu anandi pa zuŵa lo. Mujifumbengi kuti:
‘Kumbi ndi nkhani wuli yo yaziŵika ndi ŵanthu anandi msanawale?’
‘Ndi nkhani wuli yo aneba, ŵanthu wo ndigwira nawu ntchitu pamwenga wo ndisambira nawu sukulu akambiskana?’
4. Mujengi masu. Mujifumbengi kuti:
‘Kumbi ndi vinthu wuli vo munthu uyu wachita pa nyengu iyi? Kumbi watenere kuti waŵanaŵananji?’
‘Kumbi mo wavwaliya, kawonekeru kaki, pamwenga panyumba paki vilongonji vakukwaskana ndi vo wagomezga pamwenga mudawuku waki?’
‘Kumbi iyi yingaŵa nyengu yamampha yakukambiskana nayu?’
5. Muvwisiyengi.
Mungalongoronga ukongwa cha.
Muchiskengi munthu yo kuti wafwatuki kukonkhoska vo ve mumtima mwaki. Mufumbengi mafumbu po mphakwenere.