Mucharu cha Uzi, mwajanga munthu munyaki yo wasopanga Yehova. Zina laki wenga Yobu. Iyu wenga ndi chuma kweniso banja likulu. Yobu wenga walisungu ndipu wawovyanga ŵanthu akavu, anthukazi wo alumu ŵawu angutayika kweniso ŵana alanda. Kumbi iyu watingi wakumanengi ndi masuzgu cha chifukwa chakuti wachitanga vinthu vamampha?

Yobu waziŵanga cha kuti Satana Dyaboli wawonanga vo wachitanga. Yehova wangukambiya Satana kuti: ‘Kumbi wamuwona mteŵeti wangu Yobu? Pacharu chapasi, palivi munthu munyaki wakuyanana ndi iyu. Iyu watindivwiya ndipuso wachita vinthu vamampha.’ Satana wangumuka kuti: ‘Mbuneneska kuti Yobu watikuvwiyani. Mutimuvikiliya kweniso mutimutumbika. Mukumupasa malu kweniso viŵetu. Mulondeni vosi ndipu walekengi kukusopani.’ Yehova wanguti: ‘Ungamuyesa Yobu. Kweni ungamubayanga cha.’ Ntchifukwa wuli Yehova wanguzomereza kuti Satana wayesi Yobu? Iyu waziŵanga kuti Yobu walutirizgengi kuja wakugomezgeka.

Satana wangwamba kwesa Yobu ndi ngozi zakupambanapambana. Chakwamba, wangugwiriskiya ntchitu ŵanthu wo adanikanga kuti Asabiya kuti akabi abulu ndi ng’ombi zaki. Pavuli paki, motu ungotcha mbereri zosi zaku Yobu. Gulu linyaki lenga la Akadiya, ilu linguba ngamila. Ateŵeti aku Yobu wo aliskanga viŵetu venivi angubayika. Pavuli paki, Yobu wanguvwa nkhani yakuchitiska chitima ukongwa. Ŵana ŵaki wosi angufwa chifukwa nyumba yo achitiyangamu phwandu yinguŵawiya. Venivi vingumuŵaŵa ukongwa Yobu kweni wanguleka cha kusopa Yehova.

Satana wakhumbanga kuti Yobu wasuzgiki kujumpha penapa. Iyu wanguchitisa kuti liŵavu laki losi liŵi ndi vilonda ndipu wavwanga kuŵaŵa ukongwa. Yobu waziŵanga cha chifukwa cho ivi vamuchitikiyanga. Chinanga kuti venga viyo, iyu wangulutirizga kusopa Yehova. Chiuta wawonanga vosi ivi ndipu wangukondwa chifukwa chakuti Yobu wangugomezgeka.

Pavuli paki, Satana wangutumiza anthulumi atatu kuti akayesi Yobu. Yiwu angumukambiya kuti: ‘Utenere kuti wachita ubudi ndipu ubisa. Chiuta watikulanga.’ Yobu wangukamba kuti: ‘Palivi chiheni chechosi cho ndachita.’ Pavuli paki, Yobu wangwamba kuŵanaŵana kuti Yehova ndiyu wachitisanga masuzgu ngenanga ndipu wangukamba kuti watimuchitiya vinthu umampha cha.

Elihu wenga munamana paku wosi, iyu wavwisiyanga vo akambiskananga. Pavuli paki, wanguti: ‘Vo mosi mwakamba, vaboza. Yehova we ndi nthazi ukongwa kuluska mo isi tingaŵanaŵaniya. Iyu wangachita cha chinthu chiheni. Wawona vosi ndipu watovya ŵanthu asani akumana ndi masuzgu.’

Venivi vati vachitika, Yehova wangukamba ndi Yobu. Iyu wanguti: ‘Kumbi wengaku po ndapanganga kuchanya ndi charu chapasi? Ntchifukwa wuli ukamba kuti ndichita umampha cha vinthu? Chinanga kuti ulongoro, kweni uziŵa cha chifukwa cho vinthu vichitikiya.’ Yobu wanguzomereza kunanga kwaki ndipu wangukamba kuti: ‘Ndingunanga. Ndinguvwa zaku yimwi, kweni sonu ndipu ndakuziŵani ukongwa. Palivi cho mungatondeka kuchita. Mundigowoke chifukwa cha vo ndingukamba.’

Mayeseru ngo Yobu wangukumana nangu ngati ngamala, Yehova wangumuchizga ndipu wangumupaska vinthu vinandi kuluska vo wenga navu pakwamba. Yobu wanguja ndi umoyu utali kweniso walikondwa. Yehova wangumutumbika chifukwa chakuvwiya chinanga kuti kwenga kwakusuzga kuchita viyo. Kumbi ujengi nge Yobu ndipu ulutirizgengi kusopa Yehova chinanga ungakumana ndi masuzgu?

Ŵanthu a mu banja laku Yakobe wo ŵenga ku Ijipiti aziŵikanga ndi zina lakuti Ayisirayeli. Yakobe ndi Yosefi ŵati ŵafwa, Farawo munyaki wangwamba kulamuliya. Iyu wachitanga mantha chifukwa Ayisirayeli ayandananga kuluska Ijipiti. Mwaviyo, Farawo wanguchitisa kuti Ayisirayeli aje akapolu. Iyu waŵachichizanga kuti awumbengi vidina kweniso kuti agwirengi ntchitu muminda. Asani Ijipiti atiŵachitiya nkhaza, chiŵerengeru cha Ayisirayeli chakuwanga ukongwa. Venivi vamukondweskanga cha Farawo,ndipu wangulamula kuti asani Myisirayeli wabala mwana munthulumi wabayikengi nyengu yeniyo. Kumbi uŵanaŵana kuti Ayisirayeli anguvwa wuli?

Munthukazi munyaki wachiyisirayeli zina laki Yokibedi, wangubala mwana munthulumi wakutowa. Kuti wavikiliyi mwana waki, iyu wangumuŵika mubasiketi ndipu wanguchiyibisa mumateti mumusinji wa Nile. Miriyamu yo wenga mzichi waki wabonda mwenuyu, wanguja pafupi kuti wawoni vo vichitikengi.

Mwana munthukazi waku Farawo, wanguza kumusinji kuti wazisambi ndipu wanguwona basiketi. Mukati mwa basiketi wangusaniyamu mwana yo waliyanga ndipu wangumuvwiya lisungu. Miriyamu wangumufumba kuti: ‘Nkhakudaniyeni munthukazi kuti wakuleliyeni mwana uyu?’ Mwana waku Farawo wanguzomera ndipu Miriyamu wanguchidana anyina a Yokibedi. Yiwu ŵati ŵaza wanguŵakambiya kuti: ‘Mutoni mwana uyu, mundilere ndikulipireningi.’

Mwana yo wati wakuwa, Yokibedi wanguza nayu ku mwana munthukazi waku Farawo ndipu wangumudana kuti Mozesi. Mwana waku Farawo wangulera Mozesi nge mwana waki chayiyu. Mozesi wangukuwa nge mwana wa Fumu ndipu watingi wachitengi vosi vo watingi wakhumbengi. Kweni Mozesi wangumuluwa cha Yehova. Iyu waziŵanga kuti ndi mu Ijipiti cha kweni ndi mu Isirayeli. Mozesi wangusankha kuteŵete Yehova.

Mozesi wati wafika vyaka 40, wakhumbanga kuwovya ŵanthu a mtundu waki. Iyu wanguwona mu Ijipiti wachipuma kapolu wachiyisirayeli. Mozesi wangupuma mu Ijipiti mwenuyu ndipu wangufwa. Pavuli paki, wanguwundiya liŵavu la munthu yo mumuchenga. Farawo wati waziŵa venivi, wanguyesesa kuti wabayi Mozesi. Kweni Mozesi wanguthaŵiya kucharu cha Midiyani. We kweniko, Yehova wamuphweriyanga.