Mayeseru

Kumbi mayeseru ntchinthu wuli?

Munthu wayeseka chifukwa chakukopeka ndi chinthu chinyaki ndipu pavuli paki wachita chinthu chiheni. Mwakuyeruzgiyapu, asani mwe ku msika mungakhumbira chinthu chinyaki. Panyaki mungayamba kuŵanaŵana kuti mubi ŵaka chinthu cho ndipu akukoningi cha. Chinanga kuti ve viyo, njuŵi yinu yitikususani. Mwaluŵi mutuzgamu maŵanaŵanu ngenanga ndipu mulutiriza vo mwachitanga. Asani mwachita viyo, ndikuti mwamalana ndi mayeseru ndipu mwangapunda.

VO BAYIBOLU LIKAMBA

Bayibolu likamba kuti munthu weyosi wangayeseka, kaya wachita vinthu vamampha pamwenga viheni. (1 Ŵakorinte 10:13) Kweni nkhani yagona pa mo tichitiya asani tiyeseka. Anyaki aŵanaŵaniya ukongwa vinthu viheni ndipu pakumaliya akumana ndi masuzgu. Kweni anyaki aleka mwaliŵi kuŵanaŵana vinthu viheni.

“Kweni munthu weyosi wateseka asani wakopeka ndipuso wanyengeka ndi khumbiru la mweneku.”—Yakobe 1:14.

Ntchifukwa wuli tikhumbika kuchitapu kanthu mwaliŵi asani tiyeseka?

Bayibolu likonkhosa vo vichitika kuti munthu wachiti ubudi. Lemba la Yakobe 1:15 likamba kuti: “Asani khumbiru [liheni] lame nthumbu, libala ubudi.” Munthukazi yo we ndi nthumbu, wabala asani pajumpha nyengu. Mwakuyanana waka, asani tiŵanaŵaniya ukongwa vinthu viheni vo liŵavu lidu likhumba, vingachitisa kuti tibali ubudi. Chinanga kuti ve viyo, tingafiska kupunda mayeseru pamwenga kuti tingaleka kuŵanaŵaniya vinthu viheni.

MO BAYIBOLU LINGATIWOVYE

Chinanga kuti nyengu zinyaki tiŵanaŵana vinthu viheni, kweni tingaleka kuviŵanaŵaniya. Kumbi tingachita wuli venivi? Titenere kuŵika maŵanaŵanu ngidu pa vinthu vinyaki nge ntchitu, kukambiskana ndi anyidu pamwenga kuŵanaŵaniya vinthu vinyaki vamampha. (Ŵafilipi 4:8) Titenere so kuŵanaŵaniya masuzgu ngo tingakumana nangu asani tingayeseka. Masuzgu yanga ngasazgapu kusuzgika maŵanaŵanu, kutama ndipuso kunanga ubwezi widu ndi Yehova. (Marangu 32:29) Pempheru lingatiwovya so ukongwa. Yesu Khristu wangukamba kuti: “Lutirizani kupemphera kuti muleki kuyeseka.”—Mateyu 26:41.

“Mungalandizgikanga cha: Chiuta ngwakuti wanganyozeka cha. Pakuti chechosi cho munthu wamija, ndichu so wazamuvuna.”—Ŵagalatia 6:7.

Kumbi mungachita wuli kuti mumalani ndi mayeseru?

UNENESKA WAKI

Mayeseru ntchiŵana cho chingachitisa kuti munthu wakupupuluma pamwenga yo waleka kuŵanaŵana umampha wakumani ndi masuzgu ngakofya. (Yakobe 1:14) Ndivu nadi vichitika asani munthu wayeseka kuti wachiti ureŵi. Iyu wakumana ndi masuzgu ngakulu pakumaliya.—Nthanthi 7:22, 23.

MO BAYIBOLU LINGATIWOVYE

Yesu Khristu wangukamba kuti: “Sonu asani jisu laku lakumaryi litikuguŵiska, ulikolowo ndi kulitaya.” (Mateyu 5:29) Yapa Yesu wang’anamuwanga kukolowo jisu chayilu cha. Kweni wang’anamuwanga kuti asani tikhumba kuti tikondwesi Chiuta ndi kuzilonde umoyu wamuyaya, tikhumbika cha kuchita ubudi wewosi. (Ŵakolose 3:5) Mwaviyo, tikhumbika kuchita vinthu mwazeru kuti timalani ndi mayeseru. Mteŵeti munyaki wakugomezgeka waku Chiuta wangupemphera kuti: “Wezani masu ngangu kuti ngaleki kuleresa vinthu vambula phindu.”—Sumu 119:37.

Mbuneneska kuti kujiko nkhwakusuzga. Mphaki kuti Bayibolu likamba kuti, “liŵavu ndakulopwa.” (Mateyu 26:41) Tosi tinganangisa. Chinanga kuti ve viyo, asani tilapa kutuliya pasi pa mtima ndipuso titesesa kuti tingawerezanga cha kuchita vinthu viheni, Mulengi widu Yehova Chiuta wachitengi nasi vinthu ‘mwalisungu ndipuso mwachitima.’ (Sumu 103:8) Fundu yeniyi njakuchiska ukongwa.

“Imwi Ya, mukaŵengi kuti muwonesesa maubudi, Kumbi ndiyani yo watingi wamengi A Yehova?”—Sumu 130:3.