Kusambira mo Tingajaliya ndi Nkharu Yamampha

Pa nyengu yo sukulu yinyaki yenga pa thiripi, anyamata anyaki angumbika mulandu wakuti angugonana ndi munyamata munyawu wa sukulu. Anyamata ŵenaŵa asambiranga pa sukulu yinyaki yakutchuka ukongwa ku Canada. Venivi vati vachitika, mutolankhani munyaki zina laki Leonard Stern wangulemba mu nyuzipepala ya Ottawa Citizen kuti: “Kuja ndi zeru, kusambira ukongwa kweniso kuja ndi chuma, ndivu cha vingachitiska achinyamata kuti aleki kuchita vinthu viheni.”

Stern wangukamba so kuti: “Kanandi, tilindizga kuti chinthu chakuzirwa ukongwa cho apapi akhumbika kuchita, nkhusambiza ŵana ŵawu kupambanisa pakati pa nkharu yamampha ndi yiheni. Kweni ivi ndivu vichitika cha. M’malu mwaki, viwoneka kuti apapi anandi awona kuti ŵana ŵawu akhumbika kusambira ukongwa kweniso akhumbika kusaniya ntchitu zapachanya kuti asaniyengi ndalama zinandi.”

Mbuneneska kuti kusambira nkhwakukhumbika. Kweni chinanga ngangaŵa masambiru ngapachanya ukongwa, ngangamuwovya cha munthu kuti waleki makhumbiru ngaheni pamwenga vinthu viheni. Sonu ndi nunkhu ko tingasaniya masambiru ngamampha ngo ngangawovya munthu kuti waje ndi nkharu yamampha?

MASAMBIRU NGO NGATOVYA ŴANTHU KUJA NDI NKHARU YAMAMPHA

Bayibolu lenge gilasi. Asani tilereska pagilasi lenili tiziŵa vinthu vo tingafiska kweniso vo titondeka kufiska. (Yakobe 1:23-25) Kweni Bayibolu lititiwovya so munthowa zinyaki. Lititiwovya kusintha nkharu yidu kweniso kuja ndi mijalidu yo yititiwovya kuti tijengi mwachimangu kweniso mwakukoliyana. Mijalidu yeniyi yisazgapu umampha, lisungu, kuzizipizga, kujiko kweniso chanju. Ndipu Bayibolu likamba kuti chanju “chitovya kuti ŵanthu akoliyanengi ukongwa.” (Akolose 3:14) Ntchifukwa wuli chanju ndi jalidu lapade ukongwa? Wonani vo Bayibolu likamba vakukwaskana ndi jalidu lenili.

• “Chanju chizizipizga ndipuso ntchalisungu. Chanju chichita sanji cha. Chanju chitijilumba cha, chitijikuzga cha, chichita vinthu vambula kwenere cha, chikhumba vakuchija cha ndipuso chikwiya cha. Chisunga vifukwa cha. Chikondwa cha ndi vinthu vambula urunji [vinthu viheni], kweni chikondwa ndi uneneska. Chiwundiya vinthu vosi, . . . chikunthiyapu vinthu vosi. Chanju chimala cha.”—1 Akorinto 13:4-8.

• “Chanju chichitiya munyaki vinthu viheni cha.”—Aroma 13:10.

• “Chakukhumbika ukongwa ntchakuti muyanjanengi ukongwa, chifukwa chanju chiwundiya maubudi nganandi.”—1 Peturo 4:8.

Asani mwe pamoza ndi ŵanthu wo atikuyanjani, kumbi mutuvwa wuli? Kumbi mutijivwa kuti mwe akuvikilirika? Kumbi mukondwa? Tikayika cha kuti ndimu muvwiya. Ve viyo chifukwa muziŵa kuti atikukhumbiyani vinthu vamampha, angakuguŵiskani cha.

Chanju chitovya so kuti ŵanthu asinthengi nkharu yawu chifukwa cha kukhumba kuwovya ŵanthu anyaki. Mwakuyeruzgiyapu munthu munyaki yo tamudana kuti George wati waja ndi mzuku, wakhumbisiskanga ukongwa kumaliya nyengu yitali kucheza ndi mzuku waki. Kweni wenga ndi suzgu. George wakweŵanga ukongwa foja ndipu mkosanu waki wakhumbanga cha kuti wakweŵiyengi po pe mwana waki. Kumbi George wanguchita wuli? Chinanga kuti iyu wangukweŵa foja kwa vyaka 50, kweni wanguleka ndi chilatu chakuti wachezengi ndi mzuku waki. Ivi vilongore limu kuti iyu wenga nadi ndi chanju chikulu.

Tikhumbika kusambira kuti tije ndi chanju. Apapi ndiwu ŵe ndi udindu ukulu wakusambiza ŵana ŵawu kuti ayanjengi anyawu. Yiwu akhumbika kuphwere ŵana ŵawu, kuŵavikiliya kweniso kuŵawovya asani ajipweteka pamwenga asani atama. Apapi azeru akambiskana ndi ŵana ŵawu ndipuso atiŵasambiza. Atiŵapaska so ulongozgi asani anangisa, vo visazgapu kuŵasambiza kupambanisa pakati pa fundu zamampha ndipuso ziheni. Ndipu apapi amampha, aja chakuwoniyapu chamampha ukongwa ku ŵana ŵawu.

Kweni vachitima kuti apapi anyaki atondeka kufiska udindu wawu. Kumbi ivi ving’anamuwa kuti ŵana ŵawu angazisintha cha kunthazi? Awa! Chinanga mbanthu arara, kusazgapu wo akukuliya mu mabanja ngo mwengavi chanju, akusintha umoyu wawu ndipu sonu mbanthu alisungu kweniso akuthembeka. Ndipu ŵanthu anyaki wo akusintha, asazgapu wo ŵanthu aŵawonanga kuti angasintha cha. Venivi ndivu tiwonengi mu nkhani yakulondopu.