“Ufumu Winu Uzi”

Yehova wakulayizga kuti: ‘Kwazamuŵavi kuliya, kuvwa kuŵaŵa, kutama pamwenga nyifwa. Ndazamuleska masozi ngosi mumasu mwawu. Vinthu vosi viheni vo vachitikanga vazamuluwika.’

Yehova wanguŵika Adamu ndi Heva mumunda wa Edeni kuti ajengi mwachimangu kweniso mwalikondwa. Yiwu akhumbikanga kusopa awusewu akuchanya ndipuso kubala ŵana kuti aje pacharu chapasi. Adamu ndi Heva, angumuvwiya cha Yehova, kweni iyu wakusintha mbwenu cha vo wakhumbanga kuchita. Mu buku ili, tawona kuti chechosi cho Chiuta walayizga chifiskika. Ufumu waki uchitisengi kuti pacharu chapasi pazije vinthu vamampha nge mo wangulayizgiya Abrahamu.

Pambula kuswera yapa, Satana, angelu aheni kweniso ŵanthu wosi aheni, abayikengi. Weyosi yo wazamutaskika wazamusopanga Yehova. Tazamutamanga cha pamwenga kufwa. Mumalu mwaki, zuŵa lelosi tazamuyukanga ndi nthazi ndipuso tazamukondwanga ndi umoyu. Charu chazamuja paradayisu. Weyosi wazamuja ndi chakurya chamampha kweniso nyumba yamampha. Ŵanthu azamuyanjanga anyawu, azamuja ankhaza cha pamwenga andewu. Nyama zamudondu zazakutiwopa cha ndipu nasi tazakuziwopa cha.

Vazamuja vakukondweska so ukongwa asani Yehova waziyamba kuyuska ŵanthu wo akufwa. Tazamulonde ŵanthu a munyengu yakali nge Abelu, Nowa, Abrahamu, Sara, Mozesi, Ruti, Esiteri ndi Davidi. Tazamugwiriya nawu limoza ntchitu yakupanga charu chapasi kuja paradayisu. Ndipu nyengu zosi, pazamuja ntchitu zinandi zakukondwesa zo tazamugwiranga.

Yehova wakhumba kuti yimwi muzijemu muparadayisu. Tazakumuziŵa umampha Yehova kuluska mo titimuziŵiya sonu. Mwaviyo, zuŵa lelosi tiyesesengi kuchita vinthu vo vingawovya kuti ubwezi widu ndi Yehova uje wakukho mpaka muyaya!