MUTU 18
18“Ukali Wangu Ukulu Wazamukole”
FUNDU YIKULU: Kuyukiya kwaku Gogi kuyuska ukali waku Yehova; Yehova wavikiliya ŵanthu ŵaki pa nkhondu ya Aramagedoni
1-3. (a) Kumbi ‘ukali ukulu’ waku Yehova wazamuchitiskanji? (b) Kumbi sonu tikambiskanengenji?
YERUZGIYANI kuti muwona anthulumi, anthukazi kweniso ŵana, ama pamoza ndipu atumba sumu ya Ufumu. Pavuli paki, mura wapemphera kutuliya pasi pa mtima, wapempha Yehova kuti waŵavikiliyi. Abali ndi azichi wosi mu mpingu ŵe ndi chigomezgu chosi kuti Yehova waŵaphweriyengi. Kweni chinanga kuti ve viyo, yiwu akhumbika kupembuzgika ndipuso kuchiskika. Kubwalu, kuvwika chiwawa cha nkhondu. Ndipu Aramagedoni yayambapu!—Chivu. 16:14, 16.
2 Pa nkhondu ya Aramagedoni, Yehova wazamuyeruzga ŵanthu ndi ‘ukali ukulu.’ (Ŵerengani Ezekiyeli 38:18.) Iyu wazamupunguliya ukali waki ukulu, pagulu limoza la asilikali cha pamwenga pa mtundu umoza, kweni pa ŵanthu anandi wo aja pacharu chapasi. Pa zuŵa lenili, mathupi nga ŵanthu wo azamubayika ndi Yehova “ngazamutuwa kuchigoti chinyaki kufika kuchigoti chinyaki cha charu chapasi.”—Yere. 25:29, 33.
3 Pakuti Yehova ndi Chiuta wachanju yo waziŵika kuti ‘ngwalisungu kweniso wawezi’ ndipuso “wambula kukwiya liŵi,” kumbi ntchinthu wuli chazamuchitiska kuti wachiti venivi mwamabuchibuchi ndi ‘ukali ukulu’? (Eki. 34:6; 1 Yoha. 4:16) Tiyeni tiwoni mo kwamuka kwa fumbu ili, kungatipembuzgiya, kungatiwovye kuja ndi chiganga kweniso kutichiska pa ntchitu yidu yakupharazga mazuŵa nganu.
Kumbi Ntchinthu Wuli cho Chazamuyuska ‘Ukali Ukulu’ Waku Yehova?
4, 5. Kumbi ukali waku Chiuta upambana wuli ndi ukali wa ŵanthu ambula kufikapu?
4 Chakwamba, tikhumbika kuziŵa kuti ukali waku Yehova uyanana cha ndi ukali wa ŵanthu ambula kufikapu. Asani munthu wakwiya ukongwa kanandi ukali waki watiwuweza cha ndipu pakumaliya paki wachita chinthu chinyaki, ndipu patuŵa kamampha cha. Mwakuyeruzgiyapu, Kayini mwana wakwamba waku Adamu, “wangukwiya ukongwa” chifukwa Yehova wangukana sembi yaki kweni wangukondwa ndi sembi yo Abelu wangupereka. Kumbi ndi vinthu wuli vo vinguchitika pavuli paki? Kayini wangumubaya mvurwa waki yo wenga murunji. (Gene. 4:3-8; Ahe. 11:4) Ŵanaŵaniyani so vaku Davidi, yo Bayibolu likamba kuti wenga munthu wakukoliyana ndi mtima waku Yehova. (Machi. 13:22) Chinanga kuti Davidi wenga munthu wamampha, kweni wanguja kamanavi kuchita ubudi ukulu, wati wavwa kuti Nabala yo wenga wakukhupuka kweniso wenga ndi charu chikulu, wamunyoza kweniso wanyoza anthulumi ŵaki. Davidi ndi asilikali ŵaki ŵati aŵira ndi ukali, “angumangiriya malipanga ngawu,” ndipu akhumbanga kuchibaya Nabala yo wenga wambula kuwonga kweniso munthulumi weyosi wa munyumba yaki. Mwamwaŵi, Abigelu muwolu waku Nabala, wanguŵeyere Davidi ndi ŵanthu wo wenga nawu kuti aleki kuchiweze vo Nabala wanguchita. (1 Samu. 25:9-14, 32, 33) Mphakuvwika kuti Yehova wangukambiya Yakobe kulemba kuti: “Ukali wa munthu ubala urunji waku Chiuta cha.”—Yako. 1:20.
Nyengu zosi Yehova wawezaku ukali waki ndipu wakwiya pa vifukwa vakuvwika
5 Mwakupambana ndi ukali wa ŵanthu wo kanandi uchitiska kuti vinthu vinangiki, nyengu zosi Yehova wawezaku ukali waki ndipu wakwiya pa vifukwa vakuvwika. Ndipu chinanga kuti wangakwiya ukongwa, Yehova wachita vinthu mwaurunji. Asani walimbana ndi arwani, iyu wapeye kumoza cha ‘ŵanthu arunji ndi ŵanthu aheni.’ (Gene. 18:22-25) Kusazgiyapu yapa, Yehova wakwiya pa vifukwa vija vakuvwika. Sonu tiyeni tikambiskani vifukwa viŵi kweniso vo tisambirapu.
6. Kumbi Yehova wachita wuli asani zina laki lifipiskika?
6 Chifukwa chakwamba: Zina laku Yehova lifipiskika. Ŵanthu wo akamba kuti amiya Yehova kweni achita vinthu viheni, ananga mbiri yaki ndipu venivi viyuska ukali waki. (Ezeki. 36:23) Nge mo tingusambiriya mu mitu yajumpha ya buku ili, mtundu wa Isirayeli, unguchitiska kuti zina laku Yehova linyozeki ukongwa. Mphakuvwika kuti vo mtundu wenuwu wachitanga vingumukwiyisa Yehova. Kweni iyu wanguwezaku ukali waki, kung’anamuwa kuti wanguŵalanga mwakwenere ŵanthu ŵaki, mwakujumphiska cha. (Yere. 30:11) Ndipu asani ukali waku Yehova wafiska chilatu chaki, iyu walutirizga cha kukwiya ndipu wasunga vifukwa cha.—Salimo 103:9.
7, 8. Kumbi tisambiranji ndi mo Yehova wanguchitiya vinthu ndi Ayisirayeli?
7 Vo tisambirapu: Mo Yehova wanguchitiya vinthu ndi Ayisirayeli, vitititcheŵeska chinthu chakukhumbika ukongwa. Mwakuyanana ndi Ayisirayeli, nasi te ndi mwaŵi wakuziŵika ndi zina laku Yehova. Te Akaboni aku Yehova. (Yesa. 43:10) Vo tikamba kweniso vo tichita, vikwaska mo ŵanthu awone Chiuta yo timiya. Tikhumbika cha kuchitiya dala vinthu viheni ndi kunyozesa zina laku Yehova. Kuchita venivi kungayuska ukali waku Yehova ndipu pambula kuswera wachitengepu kanthu kuti wavikiliyi mbiri yaki.—Ahe. 3:13, 15; 2 Petu. 2:1, 2.
8 Kumbi fundu yakutcheŵeska yakuti Yehova we ndi ‘ukali ukulu,’ yititondekesi kundere kufupi ndi iyu? Awa. Tiziŵa kuti Yehova ngwakuzikira kweniso ngwakugowoka. (Yesa. 55:7; Aro. 2:4) Kweni tiziŵa so kuti iyu wachenya asani mphakwenere kuchita viyo. Ndichu chifukwa chaki titimutumbika Yehova, chifukwa tiziŵa kuti ukali waki ukoliyengi pa ŵanthu wo alapa cha maubudi ngawu ndipu wazomerezengi cha kuti ŵanthu ŵenaŵa alutirizgi kuja pakati pa ŵanthu ŵaki. (1 Akori. 5:11-13) Yehova wakutikambiya mwakuvwika umampha vo vichitiska kuti wakwiyi. Mwaviyo, tingakhwecha kuchita vinthu vo vitimukwiyiska kuziya mu vo tiŵanaŵana kweniso kuchita.—Yoha. 3:36; Aro. 1:26-32; Yako. 4:8.
9, 10. Kumbi Yehova wachita wuli asani ŵanthu ŵaki akugomezgeka awofyezeka? Kambani vakuyeruzgiyapu.
9 Chifukwa chachiŵi: Ŵanthu aku Yehova akugomezgeka awofyezeka. Yehova wakwiya asani arwani ayukiya ŵanthu wo mbakugomezgeka ndipu abisama kwaku iyu kuti waŵavikiliyi. Mwakuyeruzgiyapu, Ayisirayeli ŵati atuwaku ku Ijipiti, Farawo ndi asilikali ŵaki anthazi, anguŵalondo ŵanthu ŵenaŵa wo awonekanga kuti alivi wakuŵawovya, wo ŵenga mumphepeti mwa Nyanja Yiyera. Kweni pa nyengu yo asilikali anthazi ŵenaŵa atchimbizanga Ayisirayeli achijumpha pakati pa nyanja pakumira, Yehova wakhwetuwanga vingelengeli va magaleta ngawu ndipu wanguŵaponya munyanja Ayijipiti. “Palivi chinanga njumoza yo wangupona.” (Eki. 14:25-28) Ukali waku Yehova ungukole pa Ayijipiti, chifukwa cha ‘chanju chaki chambula kumala’ pa ŵanthu ŵaki.—Ŵerengani Ekisodo 15:9-13.
Nge mo mungelu mu nyengu yaku Hezekiya wanguvikiliya ŵanthu aku Chiuta kwa Asiriya, nasi angelu azakutivikiliya (Wonani ndimi 10, 23)
10 Mwakuyanana waka, chifukwa chakuti Yehova watanja ŵanthu ŵaki vinguchitiska so kuti wachitepu kanthu mu nyengu ya Fumu Hezekiya. Asiriya wo ŵenga anthazi kweniso asilikali ankhaza ukongwa pa nyengu iyi, angufika ku Yerusalemu ndipu akhumbanga kuyukiya tawuni yeniyi. Ateŵeti akugomezgeka aku Yehova, awofyezekanga ndi asilikali wo anguzunguliya tawuni yeniyi, vo vatingi vichitiskengi kuti afwi mwakamanakamana kweniso afwi nyifwa yakuŵaŵa ukongwa. (2 Mafu. 18:27) Kuti Yehova wataski ŵanthu ŵaki, wangutuma mungelu yumoza, yo wangubaya asilikali 185,000, usiku wenuwu! (2 Mafu. 19:34, 35) Aŵanaŵaniyani waka mo vinthu venge mumsasa wa Asiriya ndi mlenji waki. Mikondu, vishangu kweniso malipanga venga peposi. Pengavi mbata yo yinguŵayuska ŵanthu ŵenaŵa. Ndipuso pengavi mulongozgi wakuti wakambiyi asilikali kuti afoli ndi kuchita nkhondu. Mumsasa wa Asiriya mwenga waka yii ndipu mathupi nga ŵanthu wo angubayika ngenga peposi.
11. Kumbi tipembuzgika kweniso kuchiskika wuli ndi vakuyeruzgiyapu va mu Malemba, vo vilongo mo Yehova wachitiya asani ŵanthu ŵaki awofyezeka?
11 Vo tisambirapu: Vakuyeruzgiyapu vo takambiskana vo vilongo mo Yehova wachitiya asani ŵanthu ŵaki awofyezeka, vipereka uthenga wanthazi wakutcheŵeska kwa arwani ŵidu wakuti: “Kulangika ndi Chiuta wamoyu nkhwakofya ukongwa,” asani ukali waki wayuka. (Ahe. 10:31) Kweni kwaku isi ateŵeti aku Yehova, vakuyeruzgiyapu venivi vititichiska kweniso vititiwovya kuja ndi chiganga. Tipembuzgika kuziŵa kuti murwani widu mura, Satana, wazamupunda cha. Pambula kuswera yapa, ‘kanyengu kaki kamanavi’ ko walamuliya kazamumala! (Chivu. 12:12) Mpaka pa nyengu yeniyi, tingateŵete Yehova ndi chingaga, te ndi chigomezgu kuti palivi munthu weyosi, gulu pamwenga boma lo lingatitondekesa kuchita khumbu laku Chiuta. (Ŵerengani Salimo 118:6-9.) Wakutumika Paulo wangusimikiziya fundu yeniyi yo tigomezga mwakukamba kuti: “Asani Chiuta we ndi isi, ndiyani yo walimbanengi nasi?”—Aro. 8:31.
12. Pa nyengu ya chisuzgu chikulu, kumbi ntchinthu wuli cho chazamuchitiska kuti ukali waku Yehova ukole?
12 Pa nyengu ya chisuzgu chikulu, Yehova wazakutivikiliya nge mo wanguchitiya ndi Ayisirayeli wo ŵenga pafupi kukoleka ndi Ayijipiti kweniso Ayuda ku Yerusalemu wo anguzingilizika ndi Asiriya. Asani arwani ŵidu akhumba kutipulutuliya limu, chifukwa chakuti Yehova watitiyanja ukongwa, vazamuchitiska kuti ukali waki ukole. Wo azamuchitiya dala uzereza ukulu wakuti atiyukiyi, azamuja kuti akwaska mboni ya jisu laku Yehova. Venivi vazamuchitiska kuti wachitepu kanthu mwaliŵi ndipu vazakuŵamaliya umampha cha. (Zeka. 2:8, 9) Pa nyengu iyi, azamubayika ŵanthu anandi ukongwa ndipu venivi vazamuja kuti vechendachitikepu. Arwani aku Chiuta, azamuŵavi chifukwa chakuzizwiya asani Yehova wazipunguliya ukali waki paku yiwu. Chifukwa wuli?
Kumbi Yehova Wapereka Uthenga Wakutcheŵeska Nuwu?
13. Kumbi Yehova wapereka uthenga wakutcheŵeska nuwu?
13 Yehova ‘wakwiya luŵi cha’ ndipu wapereka uthenga unandi wakutcheŵeska wakuti wazamubaya ŵanthu wosi wo atimususka kweniso kuwofyeza ŵanthu ŵaki. (Eki. 34:6, 7) Yehova wangugwiriskiya ntchitu achimi nge Yeremiya, Ezekiyeli, Daniyeli, Khristu Yesu, kweniso akutumika nge Peturo, Paulo ndipuso Yohane kuti atcheŵeski ŵanthu vakukwaskana ndi nkhondu yikulu.—Wonani bokosi lakuti “Yehova Watcheŵeska Vakukwaskana ndi Nkhondu Yikulu yo Yituza.”
14, 15. Kumbi ndi ntchitu wuli yo Yehova wachita, ndipu ntchifukwa wuli?
14 Yehova wanguzomereza kuti uthenga wakutcheŵeska wenuwu ulembeki mu Mazu ngaki. Iyu wakuwonesesa so kuti Bayibolu lifwatulikiyengi mu vineneru vinandi kweniso ligaŵikengi ukongwa kuphara buku linyaki lelosi. Pacharu chosi chapasi, iyu wakuŵika gulu la ŵanthu lo litovya ŵanthu kusambira vo angachita kuti aje pa ubwezi ndi Chiuta kweniso lo litcheŵeska za kuza kwa “zuŵa likulu laku Yehova.” (Zefa. 1:14; Salimo 2:10-12; 110:3) Iyu watovya ŵanthu ŵaki kuti afwatuliyengi mabuku ngakusambiziya ŵanthu Bayibolu mu vineneru mahandiredi nganandi kweniso kuti amaliyengi maola mamiliyoni nganandi pakukambiskana ndi ŵanthu vakukwaskana ndi malayizgu ngaki ndipuso uthenga wakutcheŵeska wo usanirika mu Mazu ngaki.
15 Yehova wachitiska kuti ntchitu yosi yeniyi yichitiki “chifukwa wakhumba cha kuti weyosi wanangiki, kweni wakhumba kuti weyosi walapi.” (2 Petu. 3:9) Kukamba uneneska, te ndi mwaŵi ukulu ukongwa wakumiya Chiuta widu wachanju kweniso wakuzikira ndipuso kuchitaku chigaŵa chimanavi pakupharazga uthenga waki! Kweni pambula kuswera, ŵanthu wo akana kuvwisiya uthenga wakutcheŵeska, aŵengevi mwaŵi wakusinthiya.
Kumbi Ndi Zuŵanji po Ukali Waku Yehova “Wazamukole”?
16, 17. Kumbi Yehova wakuŵikiya limu zuŵa lankhondu yakumaliya? Konkhoskani.
16 Yehova wakuŵika zuŵa lankhondu yakumaliya. Iyu waziŵiya limu nyengu yo ŵanthu ŵaki azamuyukirika. (Mate. 24:36) Kumbi Yehova waziŵa wuli nyengu yo arwani ŵaki azumuyukiya?
17 Nge mo tinguwone mu Mutu 17 wa buku ili, Yehova wakambiya Gogi kuti: ‘Ndazamuŵika mbeja munjegheyu zaku.’ Iyu wazamulongozga mitundu kuti yiyukiyi ŵanthu ŵaki. (Ezeki. 38:4) Ivi ving’anamuwa kuti Yehova ndiyu wazamukwambisa kuyukiya kwenuku cha pamwenga kuti wazakuŵalonda wanangwa ŵanthu wo atimususka. Mu malu mwaki, vilongo kuti Yehova waziŵa mo arwani ŵaki azamuchitiya pa nyengu yeniyi chifukwa iyu waziŵa vo ve mumitima.—Salimo 94:11; Yesa. 46:9, 10; Yere. 17:10.
18. Ntchifukwa wuli ŵanthu azamukhumba kuti apumani ndi Wanthazizosi?
18 Pakuti Yehova ndiyu cha yo wazamukwambisa nkhondu iyi pamwenga kuchichizga wo atimususka kuti apumani nayu, nanga ntchifukwa wuli ŵanthu ŵenaŵa azamukwambisa nkhondu kuti apumani ndi Wanthazizosi? Chifukwa chimoza ntchakuti, kakwamba mu mbiri ya ŵanthu, yiwu atenere kuti azakujipusika kuti kulivi Chiuta pamwenga azamuwona kuti wangaseleriyapu cha pa vakuchitika va ŵanthu. Panyaki yiwu azamuŵanaŵana viyo chifukwa chakuti azamuja kuti atuzgapu visopa vosi vaboza pacharu chapasi. Mwaviyo, angaziŵanaŵana kuti asani Chiuta waliku nadi, watingi watondekengi cha kuvikiliya visopa vo vakambanga kuti vimiya iyu. Yiwu azamuziŵa cha kuti wenga Chiuta yo wanguŵika maŵanaŵanu mumitima yawu kuti atuzgepu visopa vo vapusikanga kuti vimiya iyu.—Chivu. 17:16, 17.
19. Kumbi ndi vinthu wuli vo vitenere kuti vazamuchitika asani visopa vaboza vazibwangandulika?
19 Asani visopa vaboza vazibwangandulika, nyengu yinyaki Yehova wazamuchitiska kuti ŵanthu ŵaki apharazgi uthenga wanthazi, wo buku la Chivumbuzi litiwuyeruzgiya ndi mwa wa matalala wo nguzitu pafufupi makilogilamu 20. (Chivu. 16:21, mazu ngamumphata) Panyaki uthenga uwu wazamukuŵa wakupharazga kuti andali ndipuso amalonda umaliru wawu wepafupi, ndipu yiwu azamukwiya ukongwa mwakuti azamunyoza Chiuta. Utenere kuti mbuthenga wenuwu wo wazamusoto mitundu kuti yiyukiyi ŵanthu aku Chiuta, kuti yiŵapulutuliyi limu wosi. Yiwu azamuŵanaŵana kuti te ambula kuvikilirika ndipu angatitimbinyuwa mwambula kusuzga. Kweni yiwu azamuwona cho chingukweza pusi muchanya!
Kumbi Yehova Wazamulongo Wuli Ukali Waki?
20, 21. Kumbi Gogi ndiyani, nanga ntchinthu wuli cho chazakumuchitikiya?
20 Nge mo tinguwone mu Mutu 17 wa buku ili, Ezekiyeli wangugwiriskiya ntchitu mazu nga uchimi ngakuti “Gogi wa mucharu cha Magogi,” pakukamba za mitundu yo yazamukoliyana kuti yitiyukiyi. (Ezeki. 38:2) Ŵanthu a mitundu yo yazamukoliyana, kukoliyana kwawu kwazamukuŵa kwa pachanyapachanya. Chinanga kuti azamuwoneka nge kuti mbakukoliyana, kweni mphindanu, kujikuzga ndipuso kwanja ukongwa charu chawu, vazamulutirizga mbwenu kuchitika. Vazamukuŵa vambula kusuzga kuti Yehova wachitiski ‘munthu weyosi kuyukiya mubali waki’ ndi lipanga. (Ezeki. 38:21) Kweni kubwangandulika kwa mitundu, lazamukuŵa soka lakutuliya ku munthu cha.
21 Arwani ŵidu ŵechendabwanganduliki, azamuwona chisimikizu cha Mwana wa munthu. Yiwu atenere kuti azamuwona vinthu vikulu vo vazamulongo nthazi zikulu zaku Yehova kweniso Yesu. (Mate. 24:30) Ŵanthu akususka ŵenaŵa, azamuwona vinthu vo vazamuchitiska kuti asuzgiki ukongwa maŵanaŵanu. Nge mo Yesu wangukambiya limu, “ŵanthu azamukufwa chipoyu chifukwa cha mantha kweniso chifukwa chakulindizga vo vichitikengi pacharu chosi chapasi.” (Luka 21:25-27) Chifukwa cha mantha, yiwu azamuziŵa kuti angunangisa ukongwa kuyukiya ŵanthu aku Yehova. Mwaviyo, yiwu azamuchichizgika kuziŵa kuti Mlengi ndiyu mura wa asilikali yo ndi Yehova wa mizinda. (Salimo 46:6-11; Ezeki. 38:23) Tikayika cha kuti Yehova wazamutuma magulu nga nkhondu ngakuchanya kweniso nthazi za muchilengedu, mu nthowa yakuti wavikiliyi ateŵeti ŵaki akugomezgeka ndi kumaliya limu arwani ŵaki.—Ŵerengani 2 Peturo 2:9.
Asani ŵanthu ŵaki aziwofyezeka, Yehova wazamugwiriskiya ntchitu magulu nga nkhondu nga kuchanya pakupunguwa ukali waki (Wonani ndimi 21)
22, 23. Kumbi mbayani wo azamuvikiliya ŵanthu aku Chiuta, nanga yiwu azamukuvwa wuli chifukwa cha ntchitu yo azamugwira?
Kumbi kuziŵa va zuŵa laku Yehova kutenere kutichiska kuchitanji?
22 Aŵanaŵaniyani mo Yesu wazamukhumbisisiya kulongozga pa kuyukiya arwani aku Chiuta kweniso kuvikiliya wo atanja Awisi ndipuso kuŵateŵete! Aŵanaŵaniyani so mo Akhristu akusankhika azamuvwiya pa nyengu iyi! Nyengu yinyaki Aramagedoni yechendayambi, Akhristu akusankhika wo azamuja kuti ŵeche pacharu chapasi, azamuyuskikiya kuchanya, ndi chilatu chakuti wosi pamoza akukwana 144,000 akawovyani ndi Yesu pakuchita nkhondu. (Chivumbuzi 17:12-14) Tikayika cha kuti Akhristu akusankhika anandi, ŵenga pa ubwezi wamampha ndi a mbereri zinyaki pa nyengu yo agwiriyanga ntchitu limoza mu mazuŵa ngakumaliya. Ndipu pa nyengu yo azamukuŵa kuchanya, azamukuŵa ndi mazaza kweniso nthazi kuti avikiliyi wo aŵawovyanga mwakugomezgeka pa mayeseru ngawu.—Mate. 25:31-40.
23 Angelu nawu azamuja chigaŵa cha asilikali aku Yesu a kuchanya. (2 Ate. 1:7; Chivu. 19:14) Yiwu akumuwovyapu kali Yesu kutuzgaku Satana ndi viŵanda kuchanya. (Chivu. 12:7-9) Kweniso yiwu anguwovyaku pakuwunganisa ŵanthu wo akhumbanga kusopa Yehova pacharu chapasi. (Chivu. 14:6, 7) Kukamba uneneska, mphakuvwika kuti Yehova wazamuzomereza angelu kuti avikiliyi ŵanthu akugomezgeka ŵenaŵa! Ndipu chakukhumbika ukongwa ntchakuti, wosi mugulu lankhondu laku Yehova, azamuwona kuti ndi mwaŵi ukulu ukongwa kutowesaku zina laki pamwenga mbiri yaki, mwakuwovyaku kunanga arwani ŵaki.—Mate. 6:9, 10.
24. Kumbi mzinda ukulu wa mbereri zinyaki wazamuchita wuli?
24 Chifukwa chakuti a mzinda ukulu wa mbereri zinyaki, azamukuŵa ndi gulu lanthazi la asilikali lo lazamutumika ndi Yehova kuti liŵavikiliyi, azamuŵavi chifukwa chakuchitiya mantha. Mwakuti yiwu ‘azamukuma ndi kuyunuska mitu yawu chifukwa utaski wawu we pafupi.’ (Luka 21:28) Mwaviyo, zuŵa laku Yehova lechendazi, tikhumbika kuyesesa kuchita vo tingafiska kuti tiwovyi ŵanthu anandi kuti aziŵi ndi kwanja Awusefwi alisungu, wo atitivikiliya!—Ŵerengani Zefaniya 2:2, 3.
Pa Aramagedoni, ŵanthu aku Yehova azamuchitaku cha nkhondu. Angelu azakuŵavikiliya pa nyengu yo arwani ŵawu azamuyukiyana ŵijaŵija.—Ezek. 38:21 (Wonani ndimi 22-24)
25. Kumbi tazamukambiskananji mu mutu wakulondopu?
25 Asani nkhondu za ŵanthu zachitika, patuŵa chimtimbaheka kweniso chitima chikulu. Mwakupambana ndi venivi, asani nkhondu ya Aramagedoni yazimala, vinthu vazamuchitika mwandondomeku kweniso pazamuja likondwa. Kumbi vinthu vazamukuŵa wuli asani ukali waku Yehova wazimala, asilikali ŵaki aziweze malipanga mumalu ngaki ndipuso asani chiwawa cha nkhondu yikulu chazimala? Mu mutu wakulondopu, tazamukambiskana vinthu vamampha ukongwa vo vazamuchitika.