SAMBIRU 42
Vo Bayibolu Likamba pa Nkhani ya Nthengwa Ndipuso Kuleka Kuto Pamwenga Kuyirwa
Muvigaŵa vinyaki, ŵanthu agomezga kuti munthu wakondwa pijapija asani wato pamwenga wayirwa. Kweni mbanthu wosi cha akutorana wo akondwa, ndipuso mbanthu wosi cha wo akuleka kuto pamwenga kuyirwa wo aleka kukondwa. Uneneska ngwakuti Bayibolu likamba kuti kuto, kuleka kuto, kuyirwa ndipuso kuleka kuyirwa, vosi ndi mphasu yakutuliya kwaku Yehova.
1. Kumbi kuleka kuto pamwenga kuyirwa nkhwamampha munthowa nizi?
Bayibolu likamba kuti: “Yo wato pamwenga kuyirwa wachita umampha kweni yo waleka kuto pamwenga kuyirwa wachita umampha ukongwa.” (Ŵerengani 1 Akorinto 7:32, 33, 38.) Ntchifukwa wuli Bayibolu likamba kuti munthu yo wasankha kuleka kuto pamwenga kuyirwa “wachita umampha ukongwa”? Munthu wambula kuto pamwenga kuyirwa waŵavi udindu wakuphwere vo munyaki wakhumba. Mwaviyo, tingakamba kuti waja ndi mpata ukulu wakuchitiya vinandi. Mwakuyeruzgiyapu, anyaki asankha kuchita vinandi pakuteŵete Yehova ndipu aluta kuvigaŵa vakutali kuti akapharazgengi uthenga wamampha. Kweniso yiwu atuŵa ndi nyengu yinandi yakusambiriya, ndipu venivi vitiŵawovya kuti aje pa ubwezi wakukho ndi Yehova.
2. Kumbi kutorana mwakulondo dangu nkhwamampha munthowa nizi?
Mwakuyanana ndi wo asankha kuleka kuto pamwenga kuyirwa, ŵanthu wo atorana asaniya so vitumbiku. Bayibolu likamba kuti “ŵaŵi aluska yumoza.” (Wakutawula 4:9) Venivi ndivu nadi vichitikiya Akhristu wo agwiriskiya ntchitu fundu za mu Bayibolu mu nthengwa yawu. Ŵanthu wo atorana mwakulondo dangu alayizgana kuti ayanjanengi, atumbikanengi kweniso aphweriyanengi kwamuyaya. Venivi vichitiska kuti ajivwengi kuti mbakuvikilirika kuluska ŵanthu wo akusomphorana waka pamwenga wo ajaliya waka limoza. Ndipu ŵana ŵawu nawu atijivwa kuti mbakuvikilirika.
3. Kumbi Yehova watiyiwona wuli nthengwa?
Yehova wachikwatisa nthengwa ya ŵanthu akwamba wangukamba kuti: “Munthulumi wazamuleka awisi ndi anyina ndipu wazakujibatika ku muwolu waki.” (Genezesi 2:24) Yehova wakhumba kuti munthulumi ndi muwolu waki ayanjanengi kweniso kuti angalekananga cha kwa umoyu wawu wosi. Iyu wazomereza kuti nthengwa yingamala pijapija asani yumoza wachita chigololu. Asani venivi vachitika, Yehova wazomereza kuti yo ngwambula kunanga wangasankha kumalisa nthengwa pamwenga cha.a (Mateyu 19:9) Yehova wazomereza cha kuti Akhristu atongi muta.—1 Timote 3:2.
SAMBIRANI VINANDI
Wonani vo mungachita kuti mukondwengi kweniso kuti mukondwesengi Yehova kwali mwe pa nthengwa pamwenga cha.
4. Yigwiriskiyeni ntchitu umampha mphasu yinu yakuleka kuto pamwenga kuyirwa
Yesu wawonanga kuti kuleka kuto pamwenga kuyirwa ndi mphasu. (Mateyu 19:11, 12) Ŵerengani Mateyu 4:23, pavuli paki kambiskanani fumbu ili:
Kumbi Yesu wanguyigwiriskiya wuli ntchitu mphasu yaki yakuleka kuto pakuteŵete Awisi ndipuso ŵanthu?
Akhristu ambula kuto pamwenga kuyirwa nawu angakondwa asani agwiriskiya ntchitu umampha nyengu yawu nge mo Yesu wanguchitiya. Woneriyani VIDIYO, pavuli paki kambiskanani fumbu lo le mumphata.
Kumbi Akhristu ambula kuto pamwenga kuyirwa angayigwiriskiya wuli ntchitu nyengu yawu?
Kumbi muziŵa?
Bayibolu likamba cha vyaka vo munthu wangatore pamwenga kuyirwiya. Kweni lichiska kuti munthu wakhumbika dankha kujumpha “pa unamana.” Ivi ving’anamuwa nyengu yo wachinyamata watuŵa ndi chilakulaku chikulu chakugonana cho chingachitiska kuti watondeki kuchita vinthu mwazeru.—1 Akorinto 7:36.
5. Sankhani mwazeru munthu wakutorana nayu
Kusankha munthu wakutorana nayu, ntchimoza mwa vinthu vakukhumbika ukongwa pa umoyu winu. Ŵerengani Mateyu 19:4-6, 9, pavuli paki kambiskanani fumbu ili:
Ntchifukwa wuli Mkhristu wakhumbika cha kuchita vinthu mwakuthaŵiriya asani wakhumba kuto pamwenga kuyirwa?
Bayibolu lingakuwovyani kuziŵa mijalidu yo mukhumbika kuŵanaŵaniya asani musankha munthu wakutorana nayu. Chakukhumbika ukongwa ntchakuti mukhumbika kusankha munthu yo watanja Yehova.b Ŵerengani 1 Akorinto 7:39 ndipuso 2 Akorinto 6:14. Pavuli paki kambiskanani mafumbu yanga:
Ntchifukwa wuli tikhumbika kutorana ndi Mkhristu munyidu pe?
Kumbi muwona kuti Yehova wangavwa wuli asani tingatorana ndi munthu yo watanja Yehova cha?
Asani nyama ziŵi zakupambana mtundu azimangiriya goli limoza, zisuzgika. Mwakuyanana waka, Mkhristu yo wasankha kutorana ndi munthu yo waleka kwanja Yehova, wakumana ndi masuzgu nganandi
6. Muwonengi nthengwa nge mo Yehova watiyiwone
Kali ku Isirayeli, anthulumi amalisanga nthengwa pa vifukwa vambula kuvwika. Ŵerengani Malaki 2:13, 14, 16, pavuli paki kambiskanani fumbu ili:
Ntchifukwa wuli Yehova watinkha kumalisa nthengwa pa vifukwa vambula kuvwika?
Chigololu kweniso kumalisa nthengwa vichitiska kuti yo waleka kunanga kweniso ŵana asuzgiki
Woneriyani VIDIYO, pavuli paki kambiskanani fumbu lo le mumphata.
Asani mukutorana ndi Kaboni cha, kumbi mungachita wuli kuti vinthu viyendengi umampha mu nthengwa yinu?
7. Mugwiriskiyengi ntchitu fundu zaku Yehova pa nkhani ya nthengwa
Munthu wangakhumbika kuyesesa ukongwa kuti wagwiriskiyengi ntchitu fundu zaku Yehova zakukwaskana ndi nthengwa.c Kweni Yehova watiŵatumbika ukongwa ŵanthu wo agwiriskiya ntchitu fundu zaki. Woneriyani VIDIYO.
Ŵerengani Aheberi 13:4, pavuli paki kambiskanani mafumbu yanga:
Kumbi muwona kuti fundu zaku Yehova pa nkhani ya nthengwa zakovya? Ntchifukwa wuli muwona viyo?
Yehova wakhumba kuti Akhristu akalembesengi ku boma asani atorana kweniso asani amalisa nthengwa yawu, ndipu lenili ndilu dangu lo le muvyaru vinandi. Ŵerengani Tito 3:1, pavuli paki kambiskanani fumbu ili:
Asani mukuto pamwenga kuyirwa, kumbi musimikiza kuti nthengwa yinu mukulembesa ku boma?
MUNTHU MUNYAKI WANGAFUMBA KUTI: “Ntchifukwa wuli tikhumbika kutorana mwadangu? Kumbi pe suzgu yeyosi asani ŵanthu angaleka kutorana mwadangu?”
Kumbi mungamuka wuli?
KUMBI MWASAMBIRANJI?
Kaya munthu we pa nthengwa pamwenga cha, vosi ndi mphasu yakutuliya kwaku Yehova. Weyosi wangakondwa mbwenu asani wachita vinthu mwakukoliyana ndi vo Yehova wakhumba.
Kuweriyamu
Kumbi munthu wangachita wuli kuti wayigwiriskiyengi ntchitu umampha nyengu yaki asani ngwambula kuto pamwenga kuyirwa?
Ntchifukwa wuli Bayibolu likamba kuti tikhumbika kutorana ndi Mkhristu munyidu pe?
Kumbi Malemba ngazomereza kuti ŵanthu akutorana angamalisa nthengwa pa chifukwa chimoza nichi?
FUFUZANI
Kumbi kuto pamwenga kuyirwa “mwa Ambuya pe” kung’anamuwanji?
Woneriyani mavidiyo ngaŵi ngo ngangakuwovyani kusankha mwakwenere pa nkhani ya nthengwa kweniso munthu wakutorana nayu.
Woneriyani vidiyo iyi kuti muziŵi chifukwa cho mubali munyaki wawone kuti vo Yehova wakumupaska viluska vo wakuvileka
Wonani fundu zinyaki zo munthu wakhumbika kuŵanaŵaniya wechendasankhi kumalisa nthengwa pamwenga kupatukana.
“Mutumbikengi ‘Cho Chiuta Wamanga Pamoza’” (Chigongwi cha Alinda, December 2018)
a Wonani Fundu Yakukumaliya 4 kuti muziŵi vakukwaskana ndi kupatukana chinanga kuti munyaki wachita chigololu cha.
b Muvigaŵa vinyaki apapi ndiwu asankhiya ŵana ŵawu munthu wakutorana nayu. Apapi achanju a muvigaŵa venivi, aŵika mtima wawu pa ndalama za munthu yo apenja kusankha cha, pamwenga kutchuka kwaki, kweni aŵanaŵaniya ukongwa ubwezi waki ndi Yehova.
c Asani mujaliya waka limoza ndi munthu munyaki kwambula kutorana mwadangu, mukhumbika kusankha mwija kumuleka, pamwenga kutorana nayu mwakulondo dangu.