Kumbi Mungagomezga Visopa pa Nkhani ya Nkhondu?

Alberto wangugwira nchitu ya usilikali kwa vyaka 10. Iyu wangukamba kuti: “Mliska widu watilombiyanga ndipu wakambanga kuti, ‘Chiuta we namwi.’ Ndazizwanga chifukwa, ‘Ndakanga kuchibaya ŵanthu penipo Bayibolo likamba kuti “ungabayanga cha.”’”

Pa Nkhondu Yachiŵi ya Pacharu Chosi, Ray wagwiranga nchitu musitima ya asilikali ya m’maji. Nyengu yinyaki wangufumba mliska kuti: “Mutuza munu musitima kuzirombe gulu la asilikali ndipuso mutiŵarombe kuti akapundi. Kumbi arwani ŵawu achita cha venivi?” Mliska yo wangumuka kuti, vo achita Ambuya ungavivwisisa cha.

Asani mwakhorwa cha ndi kwamuka kwenuku, mwe mwija cha.

VO BAYIBOLO LISAMBIZA

Yesu wakukamba kuti limoza mwa marangu ngakulungakulu ngaku Chiuta ndakuti “wanjengi mwanasi waku nge ndiwi wamweni.” (Marko 12:31) Kumbi Yesu wangukamba kuti tiyanjengi anyidu chifukwa cha ko aja pamwenga charu cho atuliya? Awa. Iyu wangukambiya akusambira ŵaki kuti: ‘Mwaku ichi ŵanthu wosi ŵaziŵengi kuti mwe akusambira ŵangu, asani mwe ndi chanju yumoza ku munyaki.’ (Yohane 13:34, 35) Akusambira ŵenaŵa, atingi aziŵikengi chifukwa cha kwanjana ukongwa. Yiwu atingi akanengi kubaya ŵanthu ndipuso atingi ajengi akunozgeka kupereka umoyu wawu chifukwa cha anyawu.

Akhristu akwambiriya, achitanga vinthu mwakukoliyana ndi vo Yesu wangukamba. Buku linyaki likukamba kuti: “Alongozgi akwambiriya achisopa kusazgapu Tertullian ndi Origen, anguzomerezga kuti Akhristu akananga kubaya ŵanthu, venivi vinguchitiska kuti akani kusere m’gulu la asilikali la Aroma.”—The Encyclopedia of Religion.

KUMBI AKABONI AKU YEHOVA ACHITA WULI?

Pakuti Akaboni aku Yehova asanirika pafupifupi mu vyaru vosi, yiwu angasanirika mu vyaru vo viyambana. Kweni atesesa kulutirizga kuja ndi chanju cho chitiŵaziŵikiska kuti mbakhristu auneneska.

Mwakuyeruzgiyapu, m’chaka cha 1994, Ahutu ndi Atutsi ku Rwanda, abayananga chifukwa cha kusankhana mtundu kweni Akaboni aku Yehova achitangaku cha venivi. Akaboni afuku linyaki abisanga Akaboni anyawu afuku linyaki. Kuchita viyo kanandi kwaŵikanga umoyu wawu pa ngozi. Nyengu yinyaki, Akaboni ŵaŵi achihutu angubisa Akaboni achitutsi kweni anguŵako. Gulu la Ahutu la Interahamwe militia lingukamba kuti, “Mukhumbika kubayika chifukwa munguwovya Atutsi kuti athaŵi.” Vakuchitiska chitima kuti Akaboni ŵaŵi achihutu angubayika nadi.—Yohane 15:13.

Kumbi muŵanaŵana kuti vo Akaboni aku Yehova anguchita vikoliyana ndi vo Yesu wangukamba pa nkhani ya kupereka umoyu widu chifukwa cha anyidu?

[Chithuthuzi papeji 5]

[Kukonkhoska Chithuthuzi]

Based on U.S. Army photo

[Fundo yo yakonkhoskeka papeji 5]

Kumbi alongozgi avisopa asambiza kuti Akhristu ajengi ndi chanju chauneneska?