Kumbi Angelu Angakuwovyani Wuli pa Umoyu Winu?

Zuŵa linyaki ndi musana, Kenneth ndi Filomena wo aja ku Curaçao, anguluta kuchiwona banja linyaki lo asambiranga nalu Bayibolu.

Kenneth wangukamba kuti, “Tati tafika, tingusaniya kuti nyumba njakujara ndipu galimotu pengavi. M’malu mwakuwerere, mtima wangu ungundikambiya kuti ndimbiyi foni munthukazi wa panyumba yo.”

Munthukazi yo wati wamuka foni wangumukambiya kuti murumu waki we kuntchitu. Kweni wati waziŵa kuti Kenneth ndi Filomena ŵe pakhomu paki, wangutuliya kubwalu ndi kuŵakambiya kuti asere.

Ŵati asere, Kenneth ndi Filomena anguziŵa kuti munthukazi yo waliyanga. Kenneth wachipemphera kuti ayambi kusambira Bayibolu, munthukazi yo wangwamba so kuliya. Mwaviyo, Kenneth ndi Filomena angumufumba chifukwa cho waliliyanga.

Munthukazi uyu wangukamba kuti wakhumbanga kujibaya. Kenneth wachimba foni, munthukazi uyu walembiyanga murumu waki kalata yakuti wajibaya. Foni yaku Kenneth ndiyu yingumupangisa kuti waleki. Iyu wanguŵakambiya kuti wasuzgikanga maŵanaŵanu. Mwaviyo, angumuchiska mwakugwirisiya ntchitu Bayibolu. Vo yiwu anguchita vingutaska umoyu waki.

Kenneth wangukamba kuti: “Tiwonga Yehova chifukwa chakutizomerezga kuti tiwovyi munthukazi mwenuyu yo wasuzgikanga maŵanaŵanu. Ndipu titimuwonga so ukongwa chifukwa wangugwirisiya ntchitu mungelu pamwenga mzimu waki wakupaturika wo ungutichiska kuti timbi foni!”a

Kumbi Kenneth ndi Filomena atenere nadi kugomezga kuti Chiuta ndiyu wanguŵawovya kuziya mwa mungelu pamwenga mzimu Waki wakupaturika? Pamwenga vinguchitika ŵaka kuti Kenneth wangumba foni pa nyengu yakwenere?

Tiziŵa umampha cha. Kweni vo tiziŵa vakuti Chiuta wagwirisiya ntchitu angelu kuti awovyi ŵanthu mwauzimu. Mwakuyeruzgiyapu, Bayibolu likamba kuti Chiuta wangugwirisiya ntchitu mungelu kulongozga Filipu kuti wawovyi munthu wa udindu waku Etiopia yo wakhumbanga kuziŵa uneneska.—Mac. 8:26-31.

Visopa vinandi visambiza kuti kwe vakulengeka vauzimu pamwenga kuti mizimu, ndipu yinyaki mwa mizimu yeniyi njamampha ukongwa chifukwa yichita khumbu laku Chiuta ndipuso yivikiliya ŵanthu. Ŵanthu anandi agomezga kuti angelu aliku ndipuso angaŵawovya ukongwa. Kweni anyaki agomezga kuti angelu kulivi.

Kumbi angelu aliku nadi? Asani aliku, kumbi akutuliya nunkhu? Kumbi uneneska wakukwaskana ndi angelu ngwakuti wuli? Kumbi angakuwovyani? Tiyeni tikambisani maukaboni ngakulongo kuti aliku.