Chiuta Watumbika Ŵanthu wo Atimuvwiya

Mchimi Mozesi wangukamba kuti Chiuta watitumbikengi asani tivwiya marangu ngaki. (Marangu 10:13; 11:27) Tivwiya Chiuta chifukwa chakopa kuti iyu watilangengi cha. Mijalidu yaki yamampha ndiyu yititichitiska kuti timuvwiyengi chifukwa chakuti titimuyanja ndipuso tikhumba cha kuchita vinthu vo vingamuguŵiska. “Kwanja Chiuta kung’anamuwa kusunga marangu ngaki.”—1 Yohane 5:3.

Kumbi kuvwiya Chiuta kungatiwovya wuli? Tiyeni tiwoni nthowa ziŵi.

1. KUVWIYA CHIUTA KUNGATIWOVYA KUTI TIJE NDI ZERU

“Ini Yehova, ndini Chiuta waku, Yo watikusambiza kuti vinthu vikuyende umampha, Yo watikulongozga munthowa yo utenere kwendamu.”—YESAYA 48:17.

Yehova Chiuta, yo ndi Mlengi widu, watitiziŵa umampha ndipu watitipaska ulongozgi wo tikhumbika. Chiuta watitisambiza kuti tisankhengi vinthu mwazeru. Mwaviyo, tikhumbika kusambira Malemba Ngakupaturika kuti tiziŵi vo Chiuta wakhumba kuti tichitengi, pavuli paki tichitengi vo tasambira.

2. KUVWIYA CHIUTA KUNGATIWOVYA KUTI TIKONDWENGI

“Mbakukondwa wo atuvwa mazu ngaku Chiuta ndi kungasunga!”—LUKA 11:28.

Mazuŵa nganu, ŵanthu mamiliyoni nganandi wo avwiya Mazu ngaku Chiuta ndiwu asaniya likondwa chayilu. Mwakuyeruzgiyapu, ŵanaŵaniyani munthu munyaki wa ku Spain yo wenga ndi mtima wakunjoŵi ndipu wayanjanga kuchitiya ŵanthu nkhaza kusazgapu muwolu waki. Nyengu yinyaki wanguŵerenga vo mchimi Mozesi wangulemba vakukwaskana ndi jalidu lakufwasa, lo Yosefi mwana waku Yakobe wenga nalu. Yosefi wanguguliskika nge kapolu ndipu wanguŵikika mujeri chinanga kuti pengavi cho wangunanga. Kweni iyu wangulutirizga kuja wakuzika, kuja mwachimangu kweniso kugowoke anyaki. (Chiyambo, machaputala 37-45) Munthu wa ku Spain uyu wangukamba kuti: “Kuŵanaŵaniya vinthu vo vinguchitikiya Yosefi kungundiwovya kuti ndije wakufwasa, walisungu ndipuso wakujiko. Mwaviyo, sonu ndikondwa ukongwa.”

Malemba Ngakupaturika ngatitipaska ulongozgi wa mo titenere kuchitiya vinthu ndi anyidu. Venivi ndivu tikambiskanengi ukongwa mu nkhani yakulondopu.