Mo Tingalongore Kuti Titanja Anyidu

Taŵanthu tosi te abanja limoza chifukwa tikutuliya kumphapu yaku Adamu. Chinanga kuti ŵanthu amubanja limoza akhumbika kwanjana ndi kutumbikana, kweni vakusuzga mazuŵa nganu kuti ŵanthu ayanjanengi mu mabanja. Kweni Chiuta widu wachanju wakhumba viyo cha.

VO MALEMBA NGAKUPATURIKA NGAKAMBA PA NKHANI YA CHANJU

“Uyanjengi munyaku nge mo utijiyanjiya wamweni.”—ŴALEVI 19:18.

“Lutirizgani kwanja arwani ŵinu.”—MATEYU 5:44.

KUMBI KWANJA ANYIDU KUNG’ANAMUWANJI?

Wonani mo Chiuta watichikonkhoske chanju mu Mazu ngaki pa 1 Akorinto 13:4-7:

“Chanju chizikira ndipuso ntchalisungu.”

Ŵanaŵaniyani fundu iyi: Kumbi mutuvwa wuli asani anyinu azikira kweniso achita namwi vinthu mwaulemu ndipu akwiya cha asani mwanangisa?

“Chanju chichita sanji cha.”

Ŵanaŵaniyani fundu iyi: Kumbi mutuvwa wuli asani ŵanthu anyaki atikukayikiyani pamwenga kukuchitiyani sanji?

Chanju “chikhumba vakuchija pe cha.”

Ŵanaŵaniyani fundu iyi: Kumbi mutuvwa wuli asani anyinu avwisisa maŵanaŵanu nginu ndipu alimbiya maŵanaŵanu ngawu pe cha?

Chanju “chisunga vifukwa cha.”

Ŵanaŵaniyani fundu iyi: Chiuta ngwakunozgeka kugowoke ŵanthu akulapa wo amunangiya. “Iyu wajaliyengi ŵaka kutisaniya vifukwa cha, pamwenga kutisungiya chifukwa.” (Sumu 103:9) Tiwonga ukongwa asani munthu yo tamunangiya watigowoke. Mwaviyo, nasi tijengi akunozeka kugowoke anyidu asani atinangiya.—Sumu 86:5.

Chanju “chikondwa cha ndi vinthu vambula urunji.”

Ŵanaŵaniyani fundu iyi: Asani takumana ndi masuzgu, tingakondwa cha kuti anyidu asekeliyengi masuzgu ngo takumana nangu. Mwakuyanana waka, nasi tikhumbika cha kusekele asani anyidu akumana ndi masuzgu.

Kuti Chiuta watitumbiki, tikhumbika kwanja anyidu munthowa zo takambiskana yapa kwambula kuŵanaŵaniya mo awoneke. Kuwovya ŵanthu wo asuzgika ndiyu nthowa yamampha ukongwa yo tingalongore kuti titanja anyidu.