Ŵanthu wo Atovya Anyawu Atumbikika

Ŵanthu anandi pacharu chosi asuzgika kusaniya chakurya kweniso malu ngakugona. Anyaki akhumbika ŵaka kuŵawovya kuziŵa vo vichitikengi kunthazi. Kumbi Chiuta wangatitumbika wuli asani tiyesesa kuwovya wo asuzgika?

VO MALEMBA NGAKUPATURIKA NGAKAMBA

“Yo wachitiya lisungu munthu wakusika, wabwerekesa Yehova, ndipu Iyu wamuweziyengi pa vo wachita.”—NTHANTHI 19:17.

KUMBI KUWOVYA ŴANTHU WO ASUZGIKA KUNG’ANAMUWANJI?

Yesu wangukonkhoska ntharika ya munthu yo wangukumana ndi ankhungu wo angumupuma ndipu angumuleka wepafupi kufwa. (Luka 10:29-37) Munthu walisungu wanguma ndipu wanguwovya munthu yo wangupwetekeka. Iyu wanguchita ivi chinanga kuti wapambananga nayu mtundu.

Munthu walisungu uyu wangumupaska munkhwala pe cha pamwenga vinthu vinyaki vakuliŵavu, kweni wangumupembuzga ndi kumuwovya kuti mtima waki uwere mumalu.

Kumbi ntharika iyi yititisambizanji? Vo Yesu wangukamba vilongo kuti tikhumbika kuchita vosi vo tingafiska kuti tiwovyi anyidu. (Nthanthi 14:31) Malemba Ngakupaturika ngatitikambiya kuti pambula kuswera yapa Chiuta watuzgengepu ukavu ndi masuzgu nganyaki ngosi. Kweni tingajifumba kuti, kumbi Chiuta watuzgengepu wuli masuzgu ndipuso zukwanji? Nkhani yakulondopu yikonkhoska vitumbiku vo Mlengi winu wachanju wakusungiyani.