“Charu chiperekengi vipasu vaki; Chiuta, Chiuta widu watitumbikengi.”—SUMU 67:6
Mungakondwa ndi Vitumbiku Vaku Chiuta
Chiuta wangulayizga mchimi Abrahamu kuti wazamutumbika “mitundu yosi pacharu chapasi” kuziya mu mphapu yaki. (Chiyambo 22:18) Kumbi mphapu yeniyi watingi waŵengi yani?
Vyaka 2,000 vo vajumpha Chiuta wangupaska Yesu yo wenga mphapu yaku Abrahamu nthazi yakuti wachitiyengi vakuziziswa. Vakuziziswa venivi vingulongo kuti layizgu lo Chiuta wanguchita ndi Abrahamu lazamufiskika kuziya mwaku Yesu.—Agalatiya 3:14.
Vakuziziswa vo Yesu wachitanga, vawovyanga ŵanthu kuziŵa kuti Chiuta wakumusankha kuti wamugwiriskiyi ntchitu pa kutumbika ŵanthu. Valongonga so mo Chiuta wazakumugwiriskiya ntchitu pakupaska ŵanthu vitumbiku vambula kumala kunthazi. Wonani mo vakuziziswa vo Yesu wachitanga vilongore mijalidu yaki yapachanya ukongwa.
Lisungu—Yesu wachizganga akutama.
Nyengu yinyaki, munthu yo wenga ndi makhati wangupempha Yesu kuti wamuchizgi. Yesu wangumukwaska ndipu wangumukambiya kuti: “Ndikhumba!” Nyengu yeniyo, makhati ngaki ngosi ngangumala.—Mariko 1:40-42.
Kupaska—Yesu wanguryisa ŵanthu wo ŵenga ndi nja.
Yesu wangukhumba cha kuti ŵanthu awere kwawu ndi nja. Pa vakuchitika vinyaki, Yesu wanguryisa ŵanthu masauzandi nganandi nga ŵanthu mwakuziziswa. Iyu wanguchitiska tiviŵandi timanavi kweniso tisomba timanavi kuti vije vinandi. (Mateyu 14:17-21; 15:32-38) Ŵanthu wosi angurya ndi kuguta mwakuti chakurya chinyaki chingujaku.
Kuchitiya ŵanthu chitima—Yesu wanguyuska akufwa.
Wati ‘wachita chitima,’ Yesu wanguyuska mwana yumoza wa choko cho chengavi munthu munyaki weyosi wakuti wangachiphwere.—Luka 7:12-15.