Uneneska wa Ufumu​—Kugaŵa Chakurya Chauzimu

TIYERUZGIYI kuti munthu yo musambira nayu Bayibolo wawoneka kuti wazizwa chifukwa chakuti wavwisa fundu yo mwaŵerenga kutuliya m’Bayibolo. Ndipu iyu watikufumbani kuti, “Kumbi mung’anamuwa kuti Bayibolo likamba kuti tazamuja ndi umoyu wambula kumala m’Paradayisu pacharu chapasi penipanu?” Yo mwayenda nayu mu uteŵeti wasekere ndipu watimufumba kuti, “Kumbi Bayibolo lakamba kuti wuli?” Wakusambira Bayibolo wapukunya mutu mwakuzizwa ndipu wakamba kuti, “Nkhakwamba kuvwa fundu iyi!” Ndipu imwi mukumbuka kuti wangukamba so mazu ngenanga wati wasambira ŵaka kuti zina laku Chiuta ndi Yehova.

Kumbi imwi vikukuchitikiyanipu vange ivi? Ŵanthu aku Chiuta anandi vikuŵachitikiyapu. Vakuchitika nge venivi vititikumbuska chawanangwa chakuzirwa chakuziŵa uneneska cho tikupaskika. Kumbi chawanangwa chenichi mukuchilonde munthowa wuli? M’chigaŵa ichi tikambiskanengi fumbu lenili. Tiziŵa kuti Ufumu waku Chiuta uliku nadi chifukwa chakuwona mo ŵanthu aku Chiuta alutirizgiya kuvwisa uneneska. Kwa vyaka 100, Yesu Khristu Fumu ya Ufumu uwu wawonesesa kuti ŵanthu aku Chiuta asambizika uneneska.