Nozgani so Ubwezi Winu ndi Yehova

CHAKA chechosi, mbereri zinandi zakuzirwa ziwezeke mumpingu Wachikhristu. Ŵanaŵaniyani “likondwa” likulu lo lituŵa “kuchanya” asani munthu yumoza wawere mumpingu. (Luka 15:7, 10) Asani mwawezeke mumpingu, mungakayikanga cha kuti Yesu, angelu kweniso Yehova, akondwa ukongwa kukuwonani kuti mwawezeke mumpingu. Kweni asani mwanozga so ubwezi winu ndi Yehova, mungakumana ndi masuzgu. Kumbi nganyaki mwa masuzgu ngenanga ndi nanga, ndipu ntchinthu wuli cho chingakuwovyani?

KUMBI MUNGAKUMANA NDI MASUZGU WULI?

Abali ndi azichi anandi asuzgika mbwenu ndi maŵanaŵanu ngaheni pavuli pakuti awere mumpingu. Panyaki muvwisa mo Fumu Davidi yinguvwiya. Chinanga kuti maubudi ngaki ngangugowokereka, iyu wangukamba kuti: “Maubudi ngangu ngandimala nthazi.” (Salimo 40:12; 65:3) Asani munthu wawere kwaku Yehova, wangalutirizga kujimba mulandu kweniso kuchita soni kwa vyaka vinandi. Isabelle wangusezgeka kwa vyaka vakujumpha 20.a Iyu wangukamba kuti: “Vandisuzganga kugomezga kuti Yehova wakundigowoke.” Asani mwagongowa, mungalopwa so mwauzimu. (Nthanthi 24:10) Mungazomerezanga cha kuti venivi vikuchitikiyeni.

Anyaki afipa mtima kuti aŵengi ndi ntchitu yikulu yakunozga so ubwezi wawu ndi Yehova. Antoine wati wawezekiyamu mumpingu wangukamba kuti: “Ndajivwanga kuti ndinguluwa chechosi cho ndasambiranga pa nyengu yo ndenga Kaboni.” Chifukwa cha maŵanaŵanu ngenanga, anyaki angaziŵaniza kuchita vinandi pakuteŵete Yehova.

Mwakuyeruzgiyapu, munthu yo nyumba yaki yabwanganduka ndi chimphepu, wangafipa mtima ukongwa asani waŵanaŵaniya ntchitu yikulu kweniso nyengu yo yikhumbika kuti wayizengi so. Mwakuyanana ŵaka, asani ubwezi winu ndi Yehova ungunangika chifukwa chakuti munguchita ubudi ukulu, mungajivwa kuti mwe ndi ntchitu yikulu yakuti munozgi so ubwezi wenuwu. Kweni chovyu chilipu.

Yehova watitikambiya kuti: “Sonu zani, tiyeni tikambiskani kuti tinyoloski vinthu.” (Yesa. 1:18) Yimwi mwachita kali ntchitu yikulu kuti ‘munyoloski vinthu.’ Yehova watikuyanjani chifukwa chakuchita venivi. Chifukwa chakuti mukuwere kwaku Yehova, Iyu wangamumuka mwanthazi Satana yo watimunyoza!—Nthanthi 27:11.

Chifukwa chakuti mukundere kali kwaku Yehova, iyu walayizga kuti wanderengi kufupi ndi yimwi. (Yako. 4:8) Chinanga kuti ve viyo, mukhumbika kuchita vinandi kuluska ŵaka kuti abali ndi azichi aziŵi kuti mwaŵere mumpingu. Mukhumbika kulutirizga kwanja Awusemwi kweniso Mubwezi winu, Yehova. Kumbi mungachita wuli venivi?

JANI NDI VILATU VO MUNGAFISKA PO MUNOZGA SO UBWEZI WINU NDI YEHOVA

Jani ndi vilatu vo mungafiska. Tikayika cha kuti mweche kukumbuka fundu zakwambiriya zo mungusambira zakukwaskana ndi Yehova kweniso vo wakulayizga kunthazi. Kweni sonu mutenere kwamba so kuchita vinthu vauzimu nge mo mwachitiyanga pakwamba, nge kupharazga uthenga wamampha kweniso kucheza ndi abali ndipuso azichi ŵinu kaŵikaŵi. Ŵanaŵaniyani vilatu ivi.

Mukambiskanengi ndi Yehova kaŵikaŵi. Awusemwi aziŵa kuti kulutirizga kujimba mulandu kungachitiska kuti musuzgikengi kupemphera kwaku yiwu. (Aro. 8:26) Chinanga kuti ve viyo, “mufwiyengepu kupemphera,” ndipu mumukambiyengi Yehova kuti mukhumbisiska kuja nayu pa ubwezi. (Aro. 12:12) Andrej wangukamba kuti: “Ndajimbanga mulandu ukongwa kweniso ndachitanga soni. Kweni asani ndapemphera ndavwangaku umampha ndipu ndajanga ndi chimangu chamumtima.” Asani muziŵa cha vo mungakamba mupempheru, ŵanaŵaniyani mapempheru nga Fumu Davidi yo yingulapa, ngo nge pa Salimo 51 kweniso 65.

Musambirengi Bayibolu kaŵikaŵi. Venivi vikuwovyeningi kuti muje ndi chivwanu chakukho kweniso kuti mumuyanjengi ukongwa Yehova. (Salimo 19:7-11) Felipe wanguti: “Chifukwa chakuti ndasambiranga Bayibolu kaŵikaŵi cha, ndingulopwa mwauzimu kweniso ndingumuguwiska Yehova. Ndakhumbanga cha kumuguŵiska so Yehova ndipu ndingusankha kusambira Bayibolu pakundija nyengu zosi kuti ndivikiliriki.” Namwi mungachita so venivi. Asani mukhumba kuti munthu munyaki wakuwovyeni kusaniya nkhani zamampha zo mungasambira pakumwija, mungapempha munthu wakukhwima mwauzimu kuti wakuwovyeni.

Nozgani ubwezi winu ndi abali kweniso azichi ŵinu. Anyaki wo awere mumpingu, afipa mtima kuti abali ndi azichi anyaki aŵawonengi mwambula kwenere. Larissa wangukamba kuti: “Ndachitanga soni ukongwa. Ndajivwanga kuti ndikuguŵiska abali ndi azichi. Maŵanaŵanu ngenanga ngangumala liŵi cha.” Ziŵani kuti ŵara kweniso Akhristu anyaki akukhwima, mbakukhumbisiska kukuwovyani kuti munozgi so ubwezi winu ndi Yehova. (Wonani bokosi lakuti “Vo Ŵara Angachita.”) Yiwu akondwa kuti mukuwere mumpingu ndipu akhumba kuti vinthu vikuyendiyeningi umampha!—Nthanthi 17:17.

Kumbi ndi vinthu wuli vo mungachita kuti muje pa ubwezi ndi abali kweniso azichi? Muchitengi vo abali ndi azichi achita nge kuwungana kweniso kupharazga nawu nyengu zosi. Kumbi venivi vingawovya wuli? Felix wanguti: “Abali ndi azichi akhumbisiskanga kuti ndiwere mumpingu. Ndingujivwa kuti nde wakukhumbika. Yiwu angundiwovya kuti ndijiwonengi kuti Yehova wakundigowoke, nde chigaŵa cha mpingu kweniso kuti ndingalutirizga kumuteŵete.”—Wonani bokosi lakuti “Vo Mungachita.”

MUNGAWERIYANGA VULI CHA!

Satana walutirizgengi kuchitiska kuti mukumani ndi masuzgu nganandi ndi chilatu chakuti muleki kunozga so ubwezi winu ndi Yehova. (Luka 4:13) Nozgekani kunozga ubwezi winu ndi Yehova.

Pa nkhani yakukwaskana ndi mbereri zaki, Yehova walayizga kuti: “Ndazamupenja yo yasoŵa, ndazamuweza yo yalanda, ndazamumanga yo yapwetekeka, ndipu ndazamutchinthisa yambula nthazi.” (Ezeki. 34:16) Yehova wawovyapu ŵanthu anandi wo angusezgeka kunozga so ubwezi wawu ndi Iyu. Ziŵani kuti iyu wakhumba kuti wakuwovyeni kuti mulutirizgi kuja nayu pa ubwezi wakukho ukongwa kuluska kali.