Bayibolu Litovya Pakusankha Chamampha Ndi Chiheni

Tingasimikiza cha kuti vo tasankha mwakutole ŵaka mo isi tivwiya kweniso mo ŵanthu anyaki avwiya vitiyendiyengi umampha. Bayibolu likonkhoska chifukwa cho tikambiya viyo, kweniso le ndi fundu zinyaki zo zingatiwovya. Ilu le ndi ulongozgi wakuthembeka weniwo ungatiwovya kuti tijengi ndi umoyu wamampha kweniso walikondwa.

ULONGOZGI WO TIKHUMBIKIYA

Mu Bayibolu, Yehovaa Chiuta wakonkhoska kuti ŵanthu akhumbika kumuthemba mumalu mwakujithemba ŵija. (Yeremiya 10:23) Ndichu chifukwa chaki wakupereka ulongozgi wamampha wo usanirika mu Bayibolu. Iyu watanja ŵanthu ndipu wakhumba cha kuti tikumani ndi masuzgu pa umoyu widu chifukwa chakusankha vinthu uheni. (Dotoronome 5:29; 1 Yohane 4:8) Kuluska vosi, pakuŵa Mlengi widu, iyu ngwakwenere kutipaska ulongozgi wamampha ukongwa chifukwa we ndi zeru. (Salimo 100:3; 104:24) Chinanga kuti veviyo, Chiuta wachichizga ŵanthu cha kuti ayendiyengi fundu zaki.

Yehova wangupaska ŵanthu akwamba, Adamu ndi Heva, vinthu vosi vo akhumbikiyanga kuti ajengi mwalikondwa. (Genezesi 1:28, 29; 2:8, 15) Iyu wanguŵapaska so ulongozgi upusu, ndipu wakayikanga cha kuti avwiyengi. Chinanga kuti venga viyo, iyu wanguŵapaska mwaŵi wakuti asankhi ŵija kulondo ulongozgi wo angupaskika pamwenga cha. (Genezesi 2:9, 16, 17) Kweni ntchachitima kuti Adamu ndi Heva angusankha kuyende fundu zawu mumalu mwa fundu zaku Chiuta. (Genezesi 3:6) Kumbi ntchinthu wuli chinguchitika pavuli paki? Kumbi ŵanthu akhumbika kusankha ŵija pakati pa chamampha ndi chiheni? Awa. Mbiri yilongo kuti kuleka kulondo fundu zaku Chiuta, kuzisa chimangu pamwenga likondwa cha.—Wakutawula 8:9.

Mwambula kuphwere kanthu ko tituliya, Bayibolu lipereka ulongozgi wamampha wo tosi tikhumbikiya kuti tisankhengi vinthu mwazeru. (2 Timote 3:16, 17; wonani bokosi lakuti “Buku la Ŵanthu Wosi.”) Tiyeni tiwoni mo Bayibolu lichitiya venivi.

Wonani chifukwa cho Bayibolu likambikiya kuti ndi “mazu ngaku Chiuta.”—1 Atesalonika 2:13. Woneriyani vidiyo yakuti Kumbi Ndiyani yo Wakulemba Bayibolu? pa webusayiti ya jw.org.

NTCHIFUKWA WULI ŴANTHU ANYAKI AWONA KUTI BAYIBOLU LINGAŴAWOVYA CHA?

Ŵanthu anyaki akamba kuti mu Bayibolu mulivi ulongozgi wakovya. Yiwu angakamba fundu izi.

Vo ŵanthu anyaki akamba: “Bayibolu litijisuska lija.”

Fundu yauneneska: Chinanga kuti pakwamba vigaŵa vinyaki va Bayibolu vingawoneka nge kuti vikoliyana cha ndi vinyaki, kweni asani mungaŵerenga mo nkhani yo yikwambiya kweniso kuti yikulembeka zuŵanji, mungazomereza kuti yikoliyana.

Kuti muwoni vakuwoniyapu vinyaki, ŵerengani nkhani ya mutu wakuti “Kodi Nkhani za M’Baibulo Zimatsutsana?” pa webusayiti ya jw.org.

Vo ŵanthu anyaki akamba: “Ŵanthu wo akamba kuti alondo Bayibolu achita so vinthu viheni, vo vilongo kuti mu Bayibolu mulivi ulongozgi wo ungawovya munthu kuja ndi mijalidu yamampha.”

Fundu yauneneska: Tingamba mulandu Bayibolu cha pa vinthu viheni vo ŵanthu achita chifukwa chakuleka kugwiriskiya ntchitu fundu zo aŵerenga. Bayibolu likukambiya limu kuti ŵanthu anandi kusazgiyapu alongozgi avisopa wo akamba kuti alondo fundu za mu Bayibolu, azamuchita vakupambana ndi vo Bayibolu likamba. Likamba so kuti “ŵanthu azamunyoza nthowa ya uneneska.”—2 Peturo 2:1, 2.

Ŵerengani nkhani yakuti “Kodi Chipembedzo Chasanduka Bizinezi Yotentha?” pa webusayiti ya jw.org, kuti muwoni chakuyeruzgiyapu cha alongozgi avisopa wo alondo cha vo Bayibolu lisambiza.

Vo ŵanthu anyaki akamba: “Bayibolu lichiska ŵanthu kuti alekingi kutumbika ŵanthu wo aleka kuyanana nawu.”

Fundu yauneneska: Bayibolu lititichiska kuti titumbikengi ŵanthu wosi. Ilu lizomerezga cha vinthu ivi. . .

kujiwona kuti te akuluska anyidu.—Afilipi 2:3.
kuleka kutumbika ŵanthu wo tipambana nawu vo tigomezga pamwenga fundu zo titende.—1 Peturo 2:17.
kuchichizga anyidu kuti ayendiyengi maŵanaŵanu ngidu.—Mateyu 10:14.

Bayibolu lilongo kuti nyengu zosi Chiuta wachita nawu vinthu mwalisungu ŵanthu kweniso mwaurunji ndipu iyu wakhumba kuti nasi tichitengi viyo.—Aroma 9:14.

Kuti muziŵi vinandi, ŵerengani nkhani yakuti “Kumbi Bayibolu Lingatiwovya Wuli Kuti Tizizipizgiyanengi” pa webusayiti ya jw.org.

MU BAYIBOLU MWE ULONGOZGI WAKU CHIUTA

Bayibolu lititikonkhoske umampha mo Yehova waja wachichitiya vinthu ndi ŵanthu kwamba kali. Vo likamba vititiwovya kuziŵa vinthu vo Chiuta wativiwona kuti vamampha pamwenga viheni, kweniso vo vingatiwovya kweniso vo vingatipweteka. (Salimo 19:7, 11) Fundu zo tisambira zauneneska nyengu zosi ndipu zititiwovya kuti tisankhengi vinthu mwazeru paumoyu widu wa zuŵa ndi zuŵa.

Mwakuyeruzgiyapu, wonani ulongozgi wo usanirika pa Nthanthi 13:20: “Munthu yo watenda ndi ŵanthu azeru wajengi wazeru, kweni yo wachitiya limoza vinthu ndi ŵanthu akupusa wapwetekekengi.” Fundu yeniyi yeche kugwira ntchitu mazuŵa nganu nge mo yagwiriyanga ntchitu mu nyengu yakali. Mu Bayibolu mwe fundu zinandi zakovya ndipuso zakukhumbika ukongwa.—Wonani bokosi lakuti “Ulongozgi wa mu Bayibolu Ngwakovya Nyengu Zosi.”

Kweni nyengu zinyaki mungajifumba kuti, ‘Kumbi ndingaziŵa wuli kuti ulongozgi wa mu Bayibolu weche kugwira ntchitu mazuŵa nganu?’ Nkhani yakulondopu yikonkhoskengi vinthu chayivu vo vikuchitikiyapu ŵanthu anyaki.

a Yehova ndilu zina laku Chiuta.—Salimo 83:18.

ULONGOZGI WA MU BAYIBOLU NGWAKOVYA NYENGU ZOSI

Chinanga kuti Bayibolu likumalizika kulembeka vyaka pafufupi 2,000 vo vajumpha, kweni leche lakovya ukongwa mazuŵa nganu. Kwamba kali, ŵanthu akhumba kuja ndi umoyu wamampha kweniso walikondwa. (Wakutawula 1:9) Ulongozgi wakovya wa mu Bayibolu ungatiwovya kuti tifiski chilatu chenichi.

Kuchita vinthu mwauneneska

“Tikhumba kuchita vinthu vosi mwauneneska”—Aheberi 13:18.
“Yo watuba, wangabanga so cha; kweni wagwiri ntchitu mwaphamphu.”—Aefeso 4:28.

Mo tingajaliya umampha ndi anyidu

“Munthu weyosi wangapenjanga vakukhumba vaki pe cha, kweni walutirizgi kupenja vakukhumba va munyaki.”—1 Akorinto 10:24.
“Lutirizgani kuzizipizgiyana kweniso kugowokiyana ndi mtima wosi.”—Akolose 3:13.

Mo Tingasankhiya Vakuchita

“Munthu wambula kuziŵa vinandi wagomezga mazu ngengosi, Kweni munthu wakuchenje waŵanaŵaniya mo watende.”—Nthanthi 14:15.
“Munthu wakuchenje wawona soka ndipu wabisama, kweni munthu wambula kuziŵa vinandi walutiriya ndipu wakumana ndi masuzgu.”—Nthanthi 22:3.