Mungasaniya Chimangu Chinanga Kuti Kuchitika Nkhondu Ndipuso Vinthu Vachiwawa
Gary yo kali wenga msilikali wangukamba kuti, “Ndechendasambiri Bayibolu ndaziŵanga cha kuti ntchifukwa wuli pacharu pe nkhaza, pachitika vinthu vambula urunji kweniso pe masuzgu nganandi. Kweni sonu nde ndi chimangu cha mumtima. Ndiziŵa kuti Yehova Chiuta wazamunozga vinthu pacharu ndipu tazamujanga mwachimangu.”
Ndi Gary pe cha yo we ndi maŵanaŵanu ngenanga. Tiyeni tikambiskani mo Bayibolu lawovye so ŵanthu anyaki.
BAYIBOLU LIKAMBA KUTI: “Yimwi Yehova, ndimwi wamampha ndipuso wakunozgeka kugowoka.”—Salimo 86:5.
MO LEMBA LENILI LAWOVYE: “Lemba lenili litindisimikiziya kuti Yehova ngwalisungu. Ndiziŵa kuti iyu ngwakunozgeka kundigowoke pa vinthu vosi vo ndikuchita pa nyengu yo ndachitangaku nkhondu.”—Wilmar, wa ku Colombia.
BAYIBOLU LIKAMBA KUTI: “Ndilenga kuchanya kufya ndi charu chapasi chifya; vinthu vakali vazamukumbukika so cha, ndipu vazamuseremu so cha mumtima.”—Yesaya 65:17.
MO LEMBA LENILI LAWOVYE: “Sonu ndisuzgika maŵanaŵanu chifukwa cha vinthu vakofya vo ndinguwona pa nyengu yo ndagwiranga ntchitu ya usilikali. Kweni lemba ili litindikumbusa kuti pambula kuswera yapa Yehova wazakundiwovya kuti ndilekengi kusuzgika ndi maŵanaŵanu ngaheni ndipuso ndazamuleka kulotanga vinthu vakofya. Vinthu viheni venivi vazamutuwamu mumaŵanaŵanu ndipuso mumtima mwangu. Iyi ndi mphasu yamampha ukongwa!”—Zafirah, wa ku United States.
BAYIBOLU LIKAMBA KUTI: “Mu mazuŵa ngaki, ŵanthu arunji azamubiriŵira, ndipu chimangu chazamuja chikulu mpaka po mwezi wazamuleke kuŵapu.”—Salimo 72:7.
MO LEMBA LENILI LAWOVYE: “Kanandi ndiŵanaŵaniya mazu nga pa lemba lenili. Pambula kuswera yapa, nkhondu zosi zimalengi kweniso masuzgu ngo ŵanthu akumana nangu chifukwa cha nkhondu ngamalengi ndipu tazamufipanga mtima cha kuti abali ŵidu abayikengi.”—Oleksandra, wa ku Ukraine.
BAYIBOLU LIKAMBA KUTI: “Ŵanthu ŵinu wo akufwa azamukuŵa ndi umoyu. . . . Yukani kweniso danirizani mwalikondwa, yimwi akuja mufuvu!”—Yesaya 26:19.
MO LEMBA LENILI LAWOVYE: “Abali ŵangu anandi akubayika pa nkhondu yakulimbana ndi Atutsi. Kweni lemba lenili litindisimikiziya kuti ndazakuŵawona so. Ndilindizga ndi mtima wosi kuzivwa so mazu ngawu asani aziyusika!”—Marie, wa ku Rwanda.
BAYIBOLU LIKAMBA KUTI: “Kwaja kanyengu kamanavi ndipu ŵanthu aheni azamuŵaku so cha . . . Kweni akufwasa azamulonde charu chapasi, ndipu azamukondwa ukongwa ndi chimangu chikulu.”—Salimo 37:10, 11.
MO LEMBA LENILI LAWOVYE: “Chinanga kuti nkhondu yikumala kunu kwidu, kweni kuchitika mbwenu vinthu vambula urunji kweniso ŵanthu aheni ŵeche ŵaka. Mavesi ngenanga, ngatindiwovya ukongwa. Yehova wawona chechosi ndipu wavwisa vo ndikumana navu. Iyu walayizga kuti pambula kuswera masuzgu ngosi ngamalengi ndipu vosi venivi vazamuluwika.”—Daler, wa ku Tajikistan.
Ŵanthu wo akonkhoska vo vikuŵachitikiyapu mumagazini iyi, ŵe mugulu la Akaboni aku Yehova mamiliyoni wo Bayibolu laŵawovya kusaniya chimangu. Bayibolu laŵawovya kuziŵa vo angachita kuti amalani ndi suzgu la kutinkhana kweniso kusankhana chifukwa chakupambana mtundu, charu ndipuso fuku. (Aefeso 4:31, 32) Akaboni aku Yehova achitaku cha vandali kweniso viwawa va mtundu wewosi.—Yohane 18:36.
Akaboni aku Yehova atovyana nge ŵanthu a mubanja limoza. (Yohane 13:35) Mwakuyeruzgiyapu, Oleksandra yo wakonkhoskapu vo vingumuchitikiya kukwamba kwa magazini iyi, wanguthaŵiya kucharu chinyaki limoza ndi mku waki chifukwa cha nkhondu. Iyu wangukamba kuti: “Tati tajumpha paboda, nyengu yeniyo tinguwona Akaboni aku Yehova a kucharu cho tinguthaŵiya ndipu angutilondere. Yiwu angutiwovya kuziŵiriya umoyu wasonu mucharu cho tinguja nge ŵanthu akuthaŵa kwawu.”
Titikudanani kuti muzi ku maunganu ngidu ko mwazamusambira mo mungasaniriya chimangu pasonu panu kweniso mwazamukuvwa vo Bayibolu lilayizga vakukwaskana ndi charu cha chimangu cho chituza. Lutani pa jw.org/tog kuti musaniyi malu ngakufupi ndi ko muja ngo kuchitikiya maunganu pamwenga asani mukhumba kuti Kaboni waku Yehova wazikusambizeningi Bayibolu kwawezi mwakugwiriskiya ntchitu buku lakuti Kondwani ndi Umoyu Kwamuyaya!