Yesu Wawonanga Kuti Zina Laku Yehova Ndakuzirwa Ukongwa

1-2. (a) Kumbi Yesu wanguchitanji ndi usiku wa zuŵa lo wangubayikiya? (b) Kumbi tikambiskanengi mafumbu nanga munkhani iyi?

PENGA pa Chinayi ndi usiku pa Nisani 14, mu 33 C.E. ndipu Yesu wenga pafupi kuperekeka, kumbika mulandu, kuyeruzgika kuti ngwakunanga, kutombozgeka kweniso kubayika. Pa nyengu iyi ndipu wamaliza ŵaka kurya chakurya chamazulu chapade limoza ndi akutumika ŵaki akugomezgeka muchipinda chamuchanya. Ŵati amaliza kurya, Yesu wangukambiya akutumika ŵaki mazu ngakumaliya ngakuchiska. Ndipu ŵati aja kamanavi kutuwa muchipinda chenichi, Yesu wangupereka pempheru lapade ukongwa. Wakutumika Yohane wakulemba pempheru lenili ndipu lisanirika mu Yohane chaputala 17.

² Kumbi pempheru laku Yesu lilongo kuti wafipiyanga ukongwa mtima vinthu wuli pa nyengu yo? Kumbi pempheru lenili lilongo kuti ntchinthu wuli cho chenga chakukhumbika ukongwa pa umoyu waki pa nyengu yosi yo wachitanga uteŵeti waki pacharu chapasi? Tiyeni tikambiskani kumuka kwa mafumbu ngenanga.

“NDAŴAZIŴISA ZINA LINU”

3. Kumbi Yesu wangukambanji vakukwaskana ndi zina laku Yehova, nanga wang’anamuwanganji? (Yohane 17:​6, 26)

³ Yesu wangupemphera kuti: “Ndaŵaziŵisa zina linu.” Iyu wangukamba kaŵi kosi kuti waŵaziŵisa akusambira ŵaki zina laku Yehova. (Ŵerengani Yohane 17:​6, 26.) Kumbi Yesu wang’anamuwanganji? Kumbi wang’anamuwanga kuti wanguŵakambiya zina lo aliziŵanga cha? Kumbukani kuti akusambira aku Yesu ŵenga Ayuda, mwaviyo aliziŵanga kali zina laku Chiuta lakuti Yehova. Zina lenili lasanirikanga maulendu masawuzandi mu Malemba nga Chiheberi. Mwaviyo, Yesu wang’anamuwanga kuŵakambiya zina laku Chiuta cha, kweni kuŵaziŵisa mijalidu yo Yehova we nayu. Yesu wanguwovya akusambira ŵaki kumuziŵa umampha Yehova, vo visazgapu kuziŵa khumbu laki, vo wachita kweniso mijalidu Yaki. Ndi Yesu pe yo watimuziŵa umampha ukongwa Yehova kuluska weyosi.

4-5. (a) Kumbi ndi vinthu wuli vo vingachitiska kuti zina la munthu munyaki lije lakuzirwa ukongwa kwaku isi? Kambani chakuyeruzgiyapu. (b) Kumbi akusambira aku Yesu anguliziŵa wuli zina laku Yehova?

⁴ Tiyeruzgiyi kuti mu mpingu winu mwe mura munyaki zina laki David kweniso iyu ndi dokotala yo wachita opaleshoni. Ndipu yimwi mutimuziŵa mubali mwenuyu kwamba kali. Kweni zuŵa linyaki, mwatama ukongwa mwamabuchibuchi. Mwaviyo, mwaluta kuchipatala ko mubali yo wagwira ntchitu, ndipu iyu watikuwovyani mpaka kuja so umampha. Chifukwa cha venivi, mutimuyanja ukongwa mubali mwenuyu kuluska kali ndipu asani mwavwa ŵaka zina laki, mukumbuka vo iyu wakukuchitiyani! Yapa sonu David mungayamba kumuwona kuti ndi mubali ŵaka cha, kweniso ndi dokotala yo wakutaska umoyu winu.

⁵ Mwakuyanana ŵaka, akusambira aku Yesu aliziŵanga kali zina laku Yehova. Kweni yiwu angwamba kuwona kuti zina lenili ndakuzirwa ukongwa kwaku yiwu chifukwa Yesu wanguŵawovya kumuziŵa umampha Yehova. Ntchifukwa wuli tikamba viyo? Chifukwa chakuti Yesu walongonga mijalidu ya Awisi kuziya mu vo wakambanga kweniso kuchita. Mwaviyo, akutumika ‘angumuziŵa’ umampha Yehova chifukwa chakuti avwisiyanga vo Yesu wasambizanga kweniso awonanga mo iyu wachitiyanga vinthu ndi ŵanthu.—Yoha. 14:9; 17:3.

“ZINA LINU LO MUKUNDIPASKA”

6. Kumbi Yesu wang’anamuwanganji po wangukamba kuti Yehova wakumupaska zina Laki? (Yohane 17:​11, 12)

⁶ Wachipemphere akusambira ŵaki, Yesu wangupempha Yehova kuti: “Avikiliyeni chifukwa cha zina linu lo mukundipaska.” (Ŵerengani Yohane 17:​11, 12.) Kumbi venivi ving’anamuwa kuti Yesu wangwamba kudanika kuti Yehova? Awa. Wonani kuti mu pempheru laki, Yesu wangukamba kuti “zina lidu” cha, kweni wanguti “zina linu.” Mwaviyo, Yesu wangwamba kudanika kuti Yehova cha. Nanga wang’anamuwanganji po wangukamba kuti wakupaskika zina laku Chiuta? Chakwamba, Yesu wamiyanga Yehova kweniso walongoronga mumalu mwaki. Iyu wanguza mu zina la Awisi ndipu wanguchita vakuziziswa mu zina lenili. (Yoha. 5:43; 10:25) Kusazgapu yapa, zina lakuti Yesu ling’anamuwa kuti “Yehova Mbutaski.” Mwaviyo, vo zina laku Yesu ling’anamuwa visazgapu zina laku Yehova.

7. Ntchifukwa wuli tikamba kuti Yesu walongoronga mumalu mwaku Yehova? Kambani chakuyeruzgiyapu.

⁷ Kuti tivwisi chifukwa cho tikambiya kuti Yesu walongoronga mumalu mwaku Yehova tiyeni tiwoni chakuyeruzgiyapu ichi. Pulezidenti wangatuma munthu munyaki kuti wakamumiyi. Mwaviyo, asani munthu yo walongoro, waja ndi mazaza nga pulezidenti yo wamutuma. Mwakuyanana ŵaka, Yesu wangumiya Yehova ndipu walongoronga ku ŵanthu mu zina Laki.—Mate. 21:9; Luka 13:35.

8. Ntchifukwa wuli Yehova wangukamba kuti zina Laki lenga “mwaku” Yesu wechendazi pacharu chapasi? (Ekisodo 23:​20, 21)

⁸ Bayibolu likamba kuti Yesu ndi Mazu, chifukwa Yehova wamutumanga kuti wakambiyengi angelu kweniso ŵanthu vakuti aziŵi pamwenga achiti. (Yoha. 1:​1-3) Viwoneka kuti mungelu yo Yehova wangutuma kuti wakawovyengi Ayisirayeli pa nyengu yo ŵenga muchipululu wenga Yesu. Yehova wachikambiya Ayisirayeli kuti avwiyengi mungelu yo, wanguŵakambiya so chifukwa cho atenere kuchitiya viyo. Iyu wanguti: “Chifukwa zina langu le mwaku iyu.”a (Ŵerengani Ekisodo 23:​20, 21.) Zina laku Yehova lenga “mwaku” Yesu chifukwa wamiyanga Yehova ndipuso wangutowesa zina la Awisi ndi kupereka ukaboni wakuti nyengu zosi Yehova wachita cho ntchakwenere.

“ADA, KANKHUSKANI ZINA LINU”

9. Kumbi zina laku Yehova lenga lakukhumbika wuli kwaku Yesu? Konkhoskani.

⁹ Nge mo tawone munkhani iyi, zina laku Yehova lenga lakukhumbika ukongwa kwaku Yesu chinanga mphanyengu yo wenga wechendazi pacharu chapasi. Ndipu wati waza pacharu, wangulongo kuziya mu vakuchita vaki kuti zina laku Yehova lenga lakukhumbika ukongwa kwaku iyu. Kukumaliya kwa uteŵeti waki, Yesu wangukamba kuti: “Ada, kankhuskani zina linu.” Nyengu yeniyo ndi yeniyo, Awisi angumuka mwakukweza kutuwa kuchanya kuti: “Ndalikankhuska ndipu ndilikankhuskengi so.”—Yoha. 12:28.

10-11. (a) Kumbi Yesu wangulikankhuska wuli zina laku Yehova? (Wonaniso chithuzi.) (b) Ntchifukwa wuli zina laku Yehova likhumbika kutoweseka kweniso kukankhuskika?

¹⁰ Yesu nayu wangukankhuska zina la Awisi. Kumbi wanguchita wuli venivi? Iyu wakambiyanga ŵanthu anyaki mijalidu yamampha ya Awisi kweniso vo achita. Kweni iyu wanguchita chinthu chinyaki so. Zina laku Yehova lakhumbikanga kutoweseka kweniso wakhumbikanga kulongo ukaboni wakuti Yehova wachita vinthu vakwenere nyengu zosi.b Yesu wangulongo kuti venivi venga vakukhumbika ukongwa kwaku iyu po wangusambiza akusambira ŵaki pempheru lakuwoniyapu. Iyu wangukamba kuti: “Awusefwi akuchanya, zina linu litoweseki.”—Mate. 6:9.

¹¹ Ntchifukwa wuli zina laku Yehova lakhumbikanga kutoweseka kweniso kukankhuskika? Chifukwa chakuti mumunda wa Edeni, Satana Dyaboli wanguyuyuwa kweniso kunyoza Yehova Chiuta. Satana wangukamba kuti Yehova ngwaboza ndipu wanolanga Adamu ndi Heva vinthu vamampha. (Gene. 3:​1-5) Pakukamba venivi, venga nge kuti Satana wakamba kuti Yehova walamuliya umampha cha. Maboza ngo Satana wangukamba, ngachitiska kuti ŵanthu aŵanaŵanengi kuti Yehova ndi Chiuta wamampha cha. Pati pajumpha nyengu, mu nyengu yaku Yobu, Satana wangukamba kuti ŵanthu wo ateŵete Yehova atimuteŵete chifukwa cha vinthu vamampha vo Iyu watiŵapaska. Nyakaboza mwenuyu wangukamba so kuti ŵanthu angalutirizga cha kuteŵete Yehova asani akumana ndi mayeseru chifukwa atimuyanja viŵi cha. (Yobu 1:​9-11; 2:4) Kukamba uneneska pakhumbikanga nyengu kuti viwoneki kuti waboza ndiyani pakati paku Satana ndi Yehova.

“NDIPEREKA UMOYU WANGU”

12. Kumbi Yesu wenga wakunozgeka kuchitanji chifukwa cha kwanja ukongwa zina laku Yehova?

¹² Chifukwa chakuti wamuyanjanga ukongwa Yehova, Yesu wakhumbanga kuchita vosi vo wangafiska kuti wakwezi ndi kutowesa zina laku Yehova. Yesu wangukamba kuti: “Ndipereka umoyu wangu.” (Yoha. 10:​17, 18) Iyu wenga wakunozgeka kufwa chifukwa cha zina laku Yehova.c Adamu ndi Heva wo ŵenga ŵanthu akwamba akufikapu, angumugarukiya Yehova ndipu angusankha kuja kuchigaŵa chaku Satana. Kweni mwakupambana ndi ŵanthu ŵenaŵa, Yesu wenga wakunozgeka kuza pacharu chapasi ndi kuzilongo kuti watimuyanja ukongwa Yehova. Yesu wanguchita venivi mwakuja wakugomezgeka kwa umoyu waki wosi. (Ahe. 4:15; 5:​7-10) Iyu wangulutirizga kuja wakugomezgeka mpaka po wangufwiya pa chimiti chakutombozgekiyapu. (Ahe. 12:2) Yapa, Yesu wangulongo kuti watanja ukongwa Yehova kweniso zina Laki.

13. Ntchifukwa wuli Yesu wenga wakwenere kulongo kuti Satana ngwaboza? (Wonaniso chithuzi.)

¹³ Vosi vo Yesu wanguchita pa nyengu yo wenga pacharu chapasi, vingusimikiziya kuti Satana ngwaboza, Yehova cha! (Yoha. 8:44) Yesu wamuziŵanga umampha ukongwa Yehova kuluska munthu weyosi. Mwaviyo, asani vo Satana wangukamba vakukwaskana ndi Yehova venga vauneneska, Yesu watingi waziŵengi. Kweni Yesu wangulutirizga kuvikiliya zina laku Yehova vo vilongo kuti vo Satana wangukamba venga vaboza. Chinanga kuti vawonekanga nge kuti Yehova wangumujowo, Yesu wanguŵagarukiya cha Awisi achanju kweni wangujipereka kuti wavikiliyi zina lawu mpaka nyifwa yaki.—Mate. 27:46.d

“NDAMALIZA NTCHITU YO MUKUNDIPASKA KUTI NDIGWIRI”

14. Kumbi Yehova wangumutumbika wuli Yesu chifukwa chakugomezgeka kwaki?

¹⁴ Mupempheru lo wangupemphera usiku wakuti mawa laki wabayikengi, Yesu wangukamba kuti: “Ndamaliza ntchitu yo mukundipaska kuti ndigwiri.” Iyu wamugomezganga ukongwa Yehova ndipu waziŵanga kuti wamutumbikengi chifukwa cha kugomezgeka kwaki. (Yoha. 17:​4, 5) Yesu wanguchita umampha nadi kuŵagomezga Awisi. Yehova wanguzomereza cha kuti Yesu walutirizgi kuja mudindi. (Machi. 2:​23, 24) Iyu wangumuyuska ndi kumupaska udindu wapachanya ukongwa kuchanya. (Afi. 2:​8, 9) Pati pajumpha nyengu, Yesu wangwamba kulamuliya nge Fumu ya Ufumu waku Chiuta. Kumbi Ufumu wenuwu wazamuchitanji? Chigaŵa chachiŵi cha pempheru lakuwoniyapu chikamba kuti: “Ufumu winu uzi. Khumbu linu [Yehova] lichitiki panu pasi, nge kuchanya.”—Mate. 6:10.

15. Kumbi ndi vinthu vinyaki nivi vo Yesu wazamufiska?

¹⁵ Pambula kuswera yapa, pa nkhondu ya Aramagedoni Yesu wachitengi nkhondu ndi arwani aku Chiuta ndi kutuzgapu ŵanthu aheni wosi. (Chivu. 16:​14, 16; 19:​11-16) Pavuli paki, wazamuponya Satana “muchizenji,” mo wazamufiska cha kuchita chechosi. (Chivu. 20:​1-3) Ndipu mu Ulamuliru wa Vyaka 1,000, Yesu wazamuweziyapu chimangu pacharu kweniso kovya ŵanthu kuti aje so akufikapu. Iyu wazamuyuska akufwa ndipuso charu chosi chazamuja paradayisu. Yapa, khumbu laku Yehova lazamufiskika!—Chivu. 21:​1-4.

16. Kumbi ndi vinthu wuli vo vazamufiskika kukumaliya kwa Ulamuliru wa Vyaka 1,000?

¹⁶ Kumbi ndi vinthu wuli vo vazamuchitika asani Ulamuliru wa Vyaka 1,000 wazimala? Ubudi kweniso kuleka kufikapu vazamumala. Ŵanthu azamupemphanga so cha kuti Yehova waŵagowoke kuziya mu sembi yaku Yesu. Kweniso kuti ŵanthu aje pa ubwezi ndi Yehova azamukhumbika chovyu cha a 144,000 cha wo aziŵika so kuti asembi pamwenga so Yesu yo ndi Mura Wasembi. Kusazgapu yapa, “nyifwa [yo yikuza chifukwa chaku Adamu], yo ndi murwani wakumaliya, yazamutuzgikapu.” Miwunda yazamuja yambula kanthu. Ŵanthu akufwa azamuyuskika. Weyosi pacharu chapasi wazamuja wakufikapu.—1 Akori. 15:​25, 26.

17-18. (a) Kumbi ntchinthu wuli cho chazamuchitika kukumaliya kwa Ulamuliru wa Vyaka 1,000? (b) Kumbi Yesu wazamuchita wuli asani nyengu yaki yakuti walamuliyi yamala? (1 Akorinto 15:​24, 28) (Wonaniso chithuzi.)

¹⁷ Kumbi ntchinthu wuli so chinyaki cho chazamuchitika kukumaliya kwa Ulamuliru wa Vyaka 1,000? Pa nyengu iyi, chinthu chinyaki chapade ukongwa chazamuchitika. Palivi weyosi yo wazamukayikiya kuti Yehova ngwakupaturika kweniso wachita vinthu mwaurunji. Ntchifukwa wuli tikamba viyo? Mumunda wa Edeni, Satana wangukamba kuti Yehova ngwaboza kweniso walamuliya mwankhaza. Kwambiya pa nyengu yeniyo, ŵanthu wo athamika kweniso kutumbika Yehova, aja achitowesa zina laki. Ndipu pakumaliya pa Ulamuliru wa Vyaka 1,000, zina laku Yehova lazamutoweseke limu. Chifukwa kufika pa nyengu yeniyi, Yehova wazamukuŵa kuti walongo pakweru kuti iyu ndi Da wachanju.

¹⁸ Yapa vazamuwoneke limu kuti Satana ngwaboza. Kumbi Yesu wazamuchita wuli asani nyengu yaki yakuti walamuliyi yamala? Kumbi wazamuyezga Satana ndi kugarukiya Yehova? Awa! (Ŵerengani 1 Akorinto 15:​24, 28.) Yesu wazamupereka Ufumu kwa Awisi. Iyu wazakujithereska ku ulamuliru waku Yehova. Kukamba uneneska, mwakupambana ndi Satana, Yesu ngwakunozgeka kuweze ulamuliru kwaku Yehova chifukwa chakuti watimuyanja ukongwa.

19. Kumbi Yesu wangulongo wuli kuti wawona kuti zina laku Yehova ndakuzirwa ukongwa?

¹⁹ Ndichu chifukwa chaki Yehova wenga wakunozgeka kupaska Yesu zina Laki! Yesu wangulongo mo Awisi aliri. Mwaviyo, kumbi zina laku Yehova lenga lakukhumbika wuli kwaku Yesu? Zina ili lenga lakuzirwa ukongwa kwaku iyu kuluska chinthu chechosi. Yesu wenga wakunozgeka kufwa chifukwa cha zina lenili ndipu wazamuja wakunozgeka kuweze Yehova chechosi pakumaliya pa Ulamuliru wa Vyaka 1,000. Kumbi tingamuyezga wuli Yesu? Nkhani yakulondopu yimukengi fumbu lenili.