Woneleya mapimo mwendro gudzipwa gwago

ZANGA

LITSHINA NYA NAYO NYA BHIBHILIYA: “Uye a hwelago gu goroga, a ngu vbindra ndrena.” — Mavingu 16:32.

SO THULA GINANI: Hi ngu phasega ngudzu ha gu dzi garadzeya gu woneleya mapimo mwendro gudzipwa gwathu. Lisine gu hatshavbo khu dzitepo nyo khaguri hi ngu ba hi goroga, ganiolu ha gu mba woneleya zanga yathu hi na tshuka hi dzi lewuga na hiri maragani. Wugevisisi nyo khaguri wo yeyedza gu khuwo muthu a gu ba a gorogide, hungo waye kha wu thumi gwadi mwendro, kha na nga pimisa silo nya sadi; a ngu tshuka a ganeya mwendro gu gira silo a na hegisago khu gu dzi laya khiso.

GINANI U YEDEGO GU GIRA: Hevbuleya gu woneleya zanga yago na yi nga si gu rangudzi. Vambe vathu vari khavo muthu nya zanga tiyide, ganiolu khu lisine lakone kha tiya. Bhibhiliya yari khiyo: “Muthu a gumba kodza gutimisela, a gu fanana ni lidhoropa likhokhola laye li khungumugidego.” (Mavingu 25:28) Ndziya nya yadi nya gu woneleye zanga, khu gu hiti satshavbo si pategago avba nya mahungu nyo khaguri, na hi nga si ganeyi mwendro gu gira gilogyo. “Muthu nya mapimo kha vbiredzeli gu goroga, wuzundzo waye, khu gutsetselela sihoso.” (Mavingu 19:11) Wugengeyi gu pheya khu guti satshavbo si pategago, adzina saye isoso si na rudzisa myonyo yathu.

GUBONGA

LITSHINA NYA NAYO NYA BHIBHILIYA: “Khalani vathu va kodzago gubonga.” — Vakolosi 3:15.

SO THULA GINANI: Si ganedwe gale ni gale gu pwani muthu nyo bonge khuye basi a manago gutsaka. Esi si ngu fakazwa ambari khu vathu va tshukidego va fedwa mwendro gu luza gilogyo khu ndziya nyo vbise ngudzu. Vari khavo egi gi va phasidego gu emisana ni gudzipwa gwavo, gu manega ni gubonga khesi va gu naso kala olu, na siri gu khaleya gu dundrugeya esi va si luzidego.

GINANI U YEDEGO GU GIRA: Tshigu ni tshigu, gira sasamedzo mwendro gu dundrugeya khu silo u si bongago. Kha gu lombi nari silo nya sikhongolo. Drudrugeya khu silo nyo vbevbuge, nya nga wenengedzo nyo mbure nya lihani, gu bhula ni muthu u mu golago, ambari kamo khu gu ba u wugide ni womi. Silo nya nga esi si nga tangadzisa monyo wago wa gu dzi ninga tepo nyo dundrugeye khiso ni gu bwe u yeyedza gubonga khu gu ba uri naso.

U nga phasega ngudzu khu gu u dundrugeya khedzi u bongago khidzo khu gu ba uri ni valongo ni dzipari nya dzadi. Tepo u tugulago egi u gi tsakeyago ga muthoyo, mu embeye; u nga gira isoso khovbe ni khovbe mwendro khu gu mu loveya lidangaliya, e-mail, mwendro mesaji. Isoso si nga tiyisa gupwanana gwanu ni gu gambe u na gupwa gutsaka gu manwago khu gu ninga. — Mithumo 20:35.

MAMBE MATSHINA NYA NAYO NYA BHIBHILIYA

POTSA MAYUNGA.

“Guphela nya guganedzisane gukhwatshi gu phusuga nya mati nya tsongo wa guphela gutala; khu guralo, khuga u hongole na mu si gu pheli mayunga.” — MAVINGU 17:14.

POTSA GU GARADZEGA KHU WUMINDRU.

“Mu nga dzi garadzi khiso sa mindru, kholu litshigu la mindru li nagya ni sigaradzo saye, kha nga mu dzitigo nya gukhenu litshigu ni litshigu la gugya ni dzaye.” — MATEWU 6:34.

U NGA GANEYI MWENDRO GU GIRA GILO NYA MBA PHEYA KHU GU PIMISA.

“Maalakanyo nya yadi ma na gu vhikela, gupimisa, gu na gu sayisa.” — MAVINGU 2:11.