Jesu a khala Mesiya

Johane a di gu tshumayela khuye: ‘Gu nguta muthu nya khongolo guvbindra eni.’ Tepo Jesu a nga ba ari ni 30 myaga, a di khuga khu Galileya a hongola Joridhani, avbo Johane a nga ba a bhabhatiseya avbo vathu. Jesu a di gu vbweta gu khuye Johane a mu bhabhatisa. Ganiolu, Johane a di embeya Jesu khuye: ‘Kha nyi ninganedwi gu gu bhabhatisa. Khuwe u yedego gu nyi bhabhatisa.’ Jesu khuye: ‘Jehovha o vbweta gu khuye uwe u nyi bhabhatisa.’ Khu kharato, va di hongola Tsongoni wa Joridhani, khavbovbo a ya nega givili gyatshavbo gya Jesu omu nya mati, a mu bhabhatisa.

Hwane nya gu ba Jesu a dugide khu matini, a di gombeya. Ndrani nya tepo yoyo, ndzadzini gu di tulega, khavbovbo liphuvbo la Nungungulu li mu tshigeya kha nga lituva. Jehovha a di ganeya naye khu ndzadzini khuye: ‘Uwe u Gyanana gyangu nya gu gi gole. Nyi ngu tsaka khuwe.’

Tepo liphuvbo la Jehovha li ngata ga Jesu, a di khala Kristo, a gu Mesiya. Kha nga Mesiya, a di hadzi pheya gu gira thumo owu Jehovha a nga mu rumeya gu ta gira mafuni.

Tepo Jesu a nga bhabhatiswa, a di hongola giwulani a ya vbedza 40 matshigu. Tepo a nga wuya, a di hongola a ya wonana ni Johane. Tepo Johane a nga wona Jesu, a di khuye: ‘Eyi Nvutana ya Nungungulu, eyi yi na thumiswago gasi gu divaleya sighoho satshavbo.’ Khu malito yoyo, Johane a di gu yeyedza vathu gu khuye Jesu khuye Mesiya. U ngu dziti gu khuwe ginani gi nga dugeleya Jesu tepo a nga ba ari giwulani? Hongoleni hi si wonani.