Sathane a linga Jesu

Hwane nya gu ba Jesu a bhabhatisidwe, liphuvbo nya guage li di mu yisa giwulani. A di ya khala 40 matshigu na si hodzi gilo. Khu kharato, a di gupwa ndzala nya yikhongolo. Khavbovbo, Sathane a dita gasi gu ta linga Jesu, a di ta mu embeya khuye: ‘Wa gu ba uri Gyanana gya Nungungulu, ruma siwindri sesi si khala dzipawu.’ Ganiolu, Jesu a di mu hlamula khu gu thumisa Milowo, khuye: ‘Gu lovidwe gu pwani muthu kha na nga vbanya khu pawu basi. Gu vbwetega a engisa satshavbo esi Jehovha a ganeyago.’

Khu gulandreya, Sathane a di linga Jesu, khuye: ‘Wa gu ba uri Gyanana gya Nungungulu, dzi digeledze u thega. Gu lovidwe gu pwani Nungungulu a na rumeya dzingilozi dzaye dzi ta gu hakha.’ Ganiolu, Jesu a di thumisa Milowo gambe, khuye: ‘Gu lovidwe gu pwani u nga lingi Jehovha Nungungulu wago.’

Khavbovbo, Sathane a di mu yeyedza mifumo yatshavbo nya litigo ni dzithomba dzayo ni wuzundzo wakone, khuye: ‘Wa gu nyi khozeya gumogo basi, nyi na gu ninga mifumo yatshavbo yeyi ni wuzundzo wakona.’ Ganiolu, Jesu a di khuye: ‘Khuga khavba Sathane! Gu lovidwe gu pwani gu vbwetega u khozeya Jehovha enga.’

Sathane a di khuga a hongola khavbovbo, gu dita dzingilozi dzi ta phasa Jesu. Gukhugeya avbvobo, Jesu a di pheya gu tshumayela mahungu nya yadi nya Mufumo wa Nungungulu. Wu diri thumo owu a nga rumedwa gu ta thuma uwo mafuni. Vathu va di gu si gola esi Jesu a nga ba a hevbudza, nigu va di gu mu landreya gwatshavbo omu a nga ba va hongola umo.