Jesu a agisa tempele

Hwane nya gu ba gu vbindride ngima na bhabhatisidwe, Jesu a di hongola Jerusalema. Gu diri ni vathu nya vangi ngudzu dhoropani momo va nga ba va ta hodza Phasika. Avbo nya festa yoyo, va di gu gira miningelo khu sifuyo omu nya tempele. Vambe va di guta ni sifuyo sawe. Ganiolu, vambe va di gu renga umo mule Jerusalema.

Tepo Jesu a nga hongola tempeleni, a di wona vathu na va gu rengisa sifuyo. Va di gu rengisa silo sawe nyumbani ga Jehovha! Isoso kha sa mu tsakisa Jesu. A di gira gisephu khu dzingodzi a tutumisa dzinvuta ni dzimombe dzi nga ba dziri omu tempeleni, a bwe a theseleya dzimedza dza ava va nga ba torokareya dzitsapawu — dzitsapawu dzawe dzi thegeleya vbavbatshi. Jesu a di embeya ava va nga ba va rengisa, khuye: ‘Dusani satshavbo sesi khomu! Mu nga dzegi nyumba ya Papayi wangu mu yi gira wulanga nya gu rengiseye umo.’

Ava va nga ba vari omu nya tempele va di hlamala ngudzu khesi Jesu a nga gira. Vapizane vaye va di dundruga giprofeto gi ganeyago khu Mesiya, nya gu khigyo: ‘Nyi na yi gola ngudzu nyumba ya Jehovha.’

Hwane nya gu ba yi vbindride tepo yoyo, omu nya mwaga nya wu 33 Matshiguni Yathu, Jesu a di agisa tempele khu tepo nya wuvili. Kha nga ba a dzumeya gu diga vathu va si yeyedzi githawo khu nyumba ya Papayi waye.