Ganelo ya Gigomoni

Hwane nyo ba a hathide 12 vapostoli, Jesu a di tshiga khu gigomoni a hongola ga wulanga gu nga ba gu tshanganide vathu nya vangi. Vathu vovo va di guta khu Galileya, Judhiya, Tire, Sidhoni, Siriya ni gipandre nyo khaguri gya Joridhani. Va dita ni vathu va nga ba va dwala ni vambe va nga ba va tshaniswa khu madhemoni. Jesu a di va hawulugisa vatshavbo. Khavbovbo, a di khala khu bambe nya gigomo a pheya gu ganeya. A di tshamuseya esi hi yedego gu gira ho vbweta gu khala dzipari dza Nungungulu. A di khuye gu vbwetega hi pwisisa lisima nya gu hi thangedwa khu Jehovha womini wathu hi bwe hevbula gu mu haladza. Gu vbwetega hi gira silo nya sadi ga vatshavbo hi bwe hi si kanganyisi muthu, ambari valala vathu.

Jesu a di khuye: ‘Kha si eneyi gu gola dzipari dzathu basi. Gu vbwetega u gola ni ava va gu nyenyago u bwe u divaleya vambe khu monyo watshavbo. Wo tshuka u zangaredwa khu muthu nyo khaguri, dzegeya guya mu lomba divalelo. Gireya vambe esi u vbwetago gu khuwe va gu gireya nuwe.’

Jesu ningide wusingalagadzi nya wadi gambe maningano ni dzithomba. A di khuye: ‘Khya lisima ngudzu gu khala pari ya Jehovha guvbindra gu manega ni dzithomba nya dzingi. Dzitsapawu dzi nga bidwa khu dzimbafa, ganiolu mwalo a na gu beyago wupari wago ni Jehovha. Digani gu garadzega khenu mu na hodza ginani, mu seya ginani, mwendro mu na ambala ginani. Khedzani sinyoni. Nungungulu a ngu si ninga guhodza tepo yatshavbo. Gugaradzega kha gu na nga gu gira u engedzeya matshigu yago nya gu vbanye. Mu nga divali gu khenu Jehovha a ngu siti esi si vbwetegago gwanu.’

Vathu gima va di si gupwi muthu na gu ganeya nga Jesu. Vathangeyi vawe nya wukhongeyi, a gu vaFarisi ni vahevbudzi nya nayo kha va nga ba va hevbude silo nyo fane ni isoso. Khu ginani Jesu a nga ba ari muhevbudzi nya wadi ngudzu? Khu gu esi Jesu a nga ba a hevbudza si di guta khiyo ga Jehovha.