Jesu a hevbudza vapizane vaye gu gombeya

Ni gevbini gi nga ba gi girwa khu Vafarisi, va di gu gira gu wonwa khu vathu. Vo gira gilo nya gyadi, va di gu gireya gu wonwa khu vambe. Va di gu gombeya malangani nyo tale vathu gasi va vonwa. Vafarisi va di guti milombelo nyo laphe khu hungo va bwe va yi phindraphindra omu va nga ba va khozeya umo ni omu dzi tshanganago umo dziruwa gasi va pwidwa khu vathu. Khu kharato, vathu va di hlamala tepo Jesu a nga khuye: ‘Mu nga giri milombelo nya nga ya Vafarisi. Vo pimisa gu khavo Jehovha o tsakiswa khu malito yawe nya mangi. Ganiolu, kha ma mu tsakisi. Mo gira nombelo, wu na khale wago ni Jehovha. Mu nga phindraphindri malito ya mamowo. Jehovha o vbweta gu khuye u mu embeya edzi u dzi pwago khidzo monyoni.

Gombeyani kharati: “Papayi wathu wa ndzadzini, lina lago li na agiswe. Wu nate Mufumo wago. Gugola gwago gu na girwe mafuni ni ndzadzini.”’ Jesu gambe va hevbudzide gu gombeya gasi gu mana guhodza ga tshigu ni tshigu, gu divaledwa sihoso sawe ni simbe silo si yelanago navo.

Jesu a di khuye: ‘Mu nga digi gu gombeya. Simamani gu lomba silo nya sadi ga Jehovha, Papayi wanu. Vavelegi vatshavbo va ngu gola gu ninga silo nya sadi sanana sawe. Gyanana gyago gyo gu lomba pawu, u di hadzi gi ninga giwindri? Gyo lomba ndzandzi, u di hadzi gi ninga nyoga?’

Khavbovbo, Jesu a di tshamuseya esi a nga ba a vbweta gu va hevbudza khu malito yaya. A di khuye: ‘Olu enu mu kodzago gu ninga silo nya sadi sanana sanu, so yeyedza gu khiso Papayi wanu Jehovha, a na gira nyo vbindre isoso; a na mu ninga liphuvbo nya guage. Egi gi vbwetegago gu lomba basi.’ U ngu gira esi Jesu a nga ganeya? Ginani u ganeyago omu nya milombelo yago?