Mitshamuselo yi gomogo omu nya mabhuku ma khumbugidwego omu nya Gibhukwana nya mitshangano nya thumo ni mavbanyelo
4-10 NYA NOVEMBRO
DZITHOMBA NYA LITO LA NUNGUNGULU | 1 JOHANE 1-5
“Mu nga goli litigo, ambari esi si guromo tigoni”
(1 Johane 2:15, 16) Mu nga goli litigo, ambari esi si guromo tigoni. Muthu a gu gola litigo, lihaladzo la Babe li mwalo avbo gwaye. 16 Satshavbo si guromo mafuni: Gudogoreya nya givili, ni gudogoreya nya maho, ni gu dzi gugumugisa khu kotani nya silo nya mafu, satshavbo sesi kha siti khu ga Babe, aholu, sa guta khu mafuni momu.
w05 1/1 paj. 10, ndri. 13
Hongoleni hi pimedzeya giyeyedzo gi tshidwego khu Jesu
Adzina vambe va nga pimisa gu khavo khandri satshavbo tigoni si nga vivba. Ambari ulolo, litigo ni sithanithani salo khu gu vbevbuga si nga hi tsolopeteya gu thumeya Jehovha. Nigu, gimwalo gilo gi lumbago litigo gi giredwego gu hi pwananisa ni Nungungulu. Gimbe khu gu, ha gu endzedzeya lihaladzo lathu khu silo nya litigo, ambari na sa sa vivba, si ngu tshuka si hi bedza omu nya kudzudzwani. (1 Thimoti 6:9, 10) Vbavbandze nya isoso, silo nya singi tigoni si kunede nigu si nga hi khuduseya. Ha gu khaleya khu gu wona dzivhidhiyu ni milongoloko ya nya omu nya televhizawu yi tshingisago mayunga, dzithomba, mwendro wubhayi, silo soso hi nga si wona na sa sa vivba, ganiolu si ngu ghoha. Ha gu dzi tshanganisa ni vathu va golago dzithomba, mwendro va si vbwetigu gu vbindwra khu dzinogosi, anethu hi nga tshuka hi thaphedwa khu gimonywana gyogyo. — Matewu 6:24; 1 Vakorinto 15:33.
(1 Johane 2:17) Mafu ma ngu vbindra, gumogo ni satshavbo sile si godwago khu vathu, aholu, oyu a girago guhaladza ga Nungungulu, a na vbanya kala gupindruga.
w13 15/8 paj. 27, ndri. 18
Wona gu khuwe u yede gu khala muthu nyo khale kharini
Gimbe gilo gi hi phasago gu mba haladza “esi si guromo tigoni” khu gu hi si divali malito ya Johane nyo khuye: “Mafu ma ngu vbindra, gumogo ni satshavbo sile si godwago khu vathu, aholu, oyu a girago guhaladza ga Nungungulu, a na vbanya kala gupindruga.” (1 Johane 2:17) Mithumo ya Sathane yo wonega nga khatshi kha yi na nga vbindra nigu khya lisinesine. Ganiolu, iyo kha yi na nga pfoledwa khu lidambo. Gimwalo gilo tigoni gi thangedwago khu Sathane gi pindrugago. Guti isoso si na hi phasa gu mba kanganyiswa khu milaphwi ya Dhiyabhulosi.
Kemba dzithomba nya liphuvbo
(1 Johane 2:7, 8) Sigodwa sangu, nayo yoyu nyi mi lovelago, khandri wuphya. Nayo wa gale, owu mu wu hakhidego guhegulani. Nayo wa gale khu mahungu mu ma pwidego gukhugela guhegulani. 8 Aholu nayo nya wuphya nyi mi lovelago, kholu lisine laye la gu dzi yeyedza ga Kristo, ni ga enu nenu. Kholu, gidema gi ngu vbindra, guwonegela nya lisine gu ngu wenengedza.
w13 15/9 paj. 10, ndri. 14
Sidundrugiso sa Jehovha si ngu tumbega
Milowo nya giGreki nya wuKristo ya gu wumbwa khu sidundrugiso si hi kutsago gu yeyedzana lihaladzo. Jesu a di khuye nayo nya wuvili nya wukhongolo gu “haladza muthu kwanu kha nga idzo u dzi haladzago khidzo.” (Mat. 22:39) Khu gufana, nandra wa Jesu, Jakobe, a di khuye lihaladzo ‘nayo nya Wufumu.’ (Jak. 2:8) Mupostoli Johane lovide khuye: “Sigodwa sangu, nayo yoyu nyi mi lovelago, khandri wuphya. Nayo wa gale, owu mu wu hakhidego guhegulani. Nayo wa gale khu mahungu mu ma pwidego gukhugela guhegulani.” (1 Johane 2:7, 8) Johane a di gu thula ginani khu “nayo wa gale”? A di gu thula nayo nya lihaladzo. Uwo khwa “gale” kholu Jesu a di wu ningede myaga hwane gu khugeya “guhegulani.” Ganiolu wu diri “wuphya” kholu gu di gu lombega lihaladzo nya tshimatshima, agu lihaladzo eli vapizani va nga hadzi gu li vbweta khu gu gimbiya nya tepo. Kha nga vapizane va Kristo, vbavbandze nyo kanakane hi ngu ninga lisima gu hakha sigengedzo si hi phasago gu potsa liphuvbo nya hodza sago nyi na hodza sangu, eli li fumeyago litigo muhuno, a gu liphuvbo li nga hadzi khikhitheya lihaladzo lathu khu vambe.
(1 Johane 5:16, 17) Muthu a gu wona ndriyaye na gu gira gighoho gi si mu yisigo gufani, a na mu lombelele, Nungungulu a na mu vbanyisa. Nombelo yoyu wa gu phasa basi a gu bani ari gighoho nyamba yisa gufani. Gyomo gighoho gi yisago gufani. Kha nyiri kheni lombelelani khigyo. 17 Guvivba gwatshavbo gighoho, aholu, somo sighoho si si yisigo gufani.
it-3 paj. 243, ndri. 3
Gudivaleya
Khya lisima gu gombeya khu vambe na hi gu lomba divalelo wa Nungungulu, ambari khamo khu libandla latshavbo. Mosi giride isoso khu litigo la Israyeli, a dawuleya sighoho si giridwego khu litigo latshavbo, ni gu bwe a lomba midivalelo. Jehovha hlamude nombelo wowo. (Mit 14:19, 20) Solomoni nuye tepo a nga ba a hendzeledza nyumba ya Nungungulu, lombide ga Jehovha gu khuye a divaleya vathu vaye va gu tshuka va ghoha, ganiolu va dzi laya khiso va giridego. (1Dzf 8:30, 33-40, 46-52) Ezira nuye giride sasimweso tepo a nga lomba gu khuye Jehovha a divaleya maJudha. Nombelo waye nyo dugeye monyoni wu phaside vathu gu dzi laya gasi va feya gu divaledwa khu Jehovha. (Ezr 9:13–10:4, 10-19, 44) Jakobe kutside mudwali khu liphuvboni gu rana madhota nya libandla gasi ma ta mu gombeleya, nigu a gu ba a giride gighoho, “Pfhumu yi na mu ninga womi, yi mu tsetselela siwono saye esi a giridego.” (Jak 5:14-16) Ambari ulolo, gu ni “gighoho gi yisago gufani,” a gu gu ghoheya liphuvbo nya guage; gighoho nya gu gire khagwenye, egi gi si divaledwigo. Mukristo kha yeli gu gombeleya ava va girago sighoho soso. — 1Jo 5:16; Mt 12:31; Heb 10:26, 27; wona ESPÍRITO; PECADO.
11-17 NYA NOVEMBRO
DZITHOMBA NYA LITO LA NUNGUNGULU | 2 JOHANE 1–JUDHA
“Hi yede gu dwana gasi hi simama gu emeya lisine”
(Judha 3) Sigodwa sangu, eni nyi di gira tshivba nya gu mi loveleni khu mahungu nya guvbanyiswe hi gu nago gumogo nanu. Nyi di dzipwa gukheni i tshukwana nyi mi lovela olu gasi gu mi tiyiselani litungani mu li dwanago khu kotani nya gukhodwe gu ningidwego sihathwa saye kala gupindruga.
w04 15/9 dzipaji. 11-12, dzindri. 8-9
“Tiyani linani ga Pfhumu”
Kha hi hangwi khu milaphwi ya Sathane, kholu Bhibhiliya yi ngu hi yeyedza milaphwi nya litshina a yi thumisago. (2 Vakorinto 2:11) Tepo Sathane a nga tshanisa mwama nyo tumbege, Joba, a di thumisa sigaradzo nya nga gutsona, gufedwa khu sigodwa, guwugedwa khu valongo, madwali ni gu embedzedwa mapongowongo khu dzipari. Joba a di garadzega ngudzu kala a pimisa gu khuye a di bhangudwe khu Nungungulu. (Joba 10:1, 2) Ambari olu matshigwanaya Sathane a si thumisigo silo sesi khu gu kongoma, iso si ngu tshanisa maKristo nya mangi, nigu Sathane a ngu si londrola.
Matshiguni yaya nyo hegisi hi gomogo umo, dzimhango nya liphuvboni dzi swayegede ngudzu. Ho vbanya matshiguni aya makungo ya liphuvboni ma gamwago khu dzithomba. Dzitelevhizawu ni simbe si thumiswago gasi gu phalalegisa mahungu, sa gu andrisa mapimo nyo khayo wubhayi wu ngu resa gutsaka vbavbandze nyo vange sigaradzo. Ni gu nya vangi va “gugola gu dzi tsakisa khu silo nya mafu guvbindra [gu tsakisa] Nungungulu.” (2 Thimoti 3:1-5) Ha gu mba ‘tiyisela litungani hi li dwanago khu kotani nya gukhodwe gwathu,’ mapimo yaya ma ngu kodza gu hi sugurudza khu liphuvboni.— Judha 3.
Kemba dzithomba nya liphuvbo
(Judha 4) Kholu vambe vathu nyamba khodwa va bede vbakari gwathu nyamba tidwa. Avo va gu vbindrugedza mahungu ma ganelago khu wuhigo wa Nungungulu wathu, va fela gu vhikela mavbanyelo yawe nya guvivbe. Va nyenyide gambe Jesu Kristo a gu uye basi Muhevbudzi ni Pfhumu yathu. Gale ngudzu Milowo nya Guage yi tivisidego gumbembiswa va gu hakhidego.
(Judha 12) Vathu vava siwindri si sihidwego matini omu nya mibuzo nya wundruyi, va gu hodza ni gu leva malevelo nya dzitshoni, nya gukhunguvanyise. Avo va gu dzi havisa vabune wurumba wawe. Va gu khala nga mapfhi nyambana ndzadzi ma pengiswago khu phuvbo; va gu khala nga misimbo yile nya gu, ambari vbamatshigatunu yi si velegigo mihandro; va khade nga misimbo yi sigudwago ni mikhamba yaye, yifa yi banga;
it-1 dzipaji. 62
Mibuzo nya lihalazo
Bhibhiliya kha yi tshamuseyi silo khu mibuzo nya lihaladzo, ni gu gambe kha yi ganeyi gu khiyo yi di gu girwa khu pimo muni. (Judha 12) Kha va rumwa khu Jesu, ambari vapostoli. Si ngu wonega gu khiso mibuzo yeyi yi di siri gigurumedza, mwedro gu khala nyo pindruge. Vambe vari khavo mibuzo yeyi yi di gu girwa khu maKristo nya gu ghanye, avba va nga ba va konvhidhari maKristo-kwawe nya sisiwana. Sasana si fedwego khu vavelegi, dzinoni, sighanyi ni sisiwana va di gu hodza vatshavbo khu wundruyi.
it-1 paj. 456, ndri. 6
Giwindri
Limbe lito nya giGreki, spi·lás, si nga gira na gu thudwa giwindri gi sihadego vbavbatshi nya mati. La gu thumiswa khu Judha gasi gut hula vale va nga ba va dzi tshomegide omu nya libandla nya wuKristo ni mapimo nyo wuSathane. Gufana ni siwindri vbavbatshi nya mati si vangeyago mhango ngalava, anavo vama vovo va diri mhango ga vambe libandlani. A gu ba a ganeya khu vama vovo, Judha wari khuye: “Vathu vava siwindri si sihidwego matini omu nya mibuzo nya wundruyi.” — Judha 12.
(Judha 14, 15) Khu kotani yawe, Enoki nuye, gitugulwana nya livbandre na sivili ga Adhamu, profetide khu kotani yawe, khuye: “Wonani, Pfhumu a dita gumogo ni mabutho nya mazanazana nya sihathwa saye, 15 a ta lamula vatshavbo, ni gu tsayisa vatshavbo va si thavigo Nungungulu, khu kotani nya mithumo yawe yatshavbo nya guvivbe, ni magana yawe yatshavbo nya guthise ma ganedwego khu sighohi si ngamba khodwa va nga bani va yuyutela khayo.”
wp17.1 paj. 12, ndri. 1
“Uye tsakiside Nungungulu”
Enoki a di gu profeta ginani? Bhibhiliya yari khiyo: “Khu kotani yawe, Enoki nuye, gitugulwana nya livbandre na sivili ga Adhamu, profetide khu kotani yawe, khuye: “Wonani, Pfhumu a dita gumogo ni mabutho nya mazanazana nya sihathwa saye, a ta lamula vatshavbo, ni gu tsayisa vatshavbo va si thavigo Nungungulu, khu kotani nya mithumo yawe yatshavbo nya guvivbe, ni magana yawe yatshavbo nya guthise ma ganedwego khu sighohi si ngamba khodwa va nga bani na gu yuyutela khayo.” (Judha 14, 15) Giprofeto gegi gi di lowa nga khatshi silo si nga ba si giregide, nga khatshi Nungungulu a di giride silo sesi si nga tshamusedwa. Vaprofeti nya vangi va landredego Enoki, va di profeta khu silo nga khatshi si di giregide. Muprofeti a di gu ganeya kharato gasi gu yeyedza lisine nyo tiye nya giprofeto gyogyo! — Isaya 46:10.
wp17.1 paj. 12, ndri. 3
“Uye tsakiside Nungungulu”
Gukhodwa ga Enoki go hi gira hi dzi wudzia khethu: Ina nyi ngu wona litigo lele guya khedzi Jehovha a li wonago khidzo? Mahungu nya gulamule ma tshumayedwego khu Enoki, ma ngari ni tshivba yayimweyo kala muhuno. Jehovha tadziside giprofeto gya Enoki tepo a nga resa Ndrambi nya yikhongolo matshiguni ya Nowa gasi gu mbembisa vathu nyo vivbedwe khu myonyo. Ganiolu, gumbembiswa gogu, gu di ninga mahemanyana nya gumbembiswa nya gukhongolo gutago. (Matewu 24:38, 39; 2 Pedro 2:4-6) Jehovha ni dzingilozi dzaye nya dzingidzingi, va dongide gu lamula litigo leli li tadego khu wuvivbi. Hatshavbo gu vbwetega hi vegeya gwadi gupima gigengedzo gegi gya Enoki ni gu bwe hi bhuleya vambe maningano khesi sitago. Adzina valongo ni dzipari dzathu va na hi khedza khu livberu. Hi nga tshuka hi dzipwa honga. Ganiolu Jehovha gima nga bhangula Enoki; ni gu gambe, gima kha na nga bhangula sithumi saye nyo tumbege muhuno!
18-24 NYA NOVEMBRO
DZITHOMBA NYA LITO LA NUNGUNGULU | GUTULEDWA 1-3
“Nyi ngu siti sigiro sago”
(Gutuledwa 1:20) Sihalo nya livbandre na dzimbili dzinyeledzi u nga dzi wonago na nyi pharide khu nyamudye, nuwo nya livbandre na dzimbili dzikandriya nya ndralama, tshamuselo wakone khoyu; Livbandre na dzimbili dzinyeledzi dza gu tshamusela dzingilozi dza Nungungulu nya livbandre na mavili mabandla. Gasi, livbandre na dzimbili dzikandriya dza gu tshamusela livbandre na mavili mabandla”
w12 15/10 paj. 14, ndri. 8
Liphuvbo muni u li yeyedzago?
Gasi gu potsa liphuvbwana lolo, hi nga dundrugeya gu khethu Bhibhiliya ya gu tshamuseya Jesu nari ni “livbandre na dzimbili dzinyeledzi” na pharide khu nyamudye. “Dzinyeledzi” dza gu emeya vawoneleyi va thodzidwego, gupata ni vatshavbo vawoneleyi nya mabandla. Jesu a ngu si kodza gu thangeya “dzinyeledzi” khu gyandza gyaye guya khesi a si wonago na si lulamide. (Gutu. 1:16, 20) Khu kharato, kha nga Hungo nya libandla nya wuKristo, Jesu a ngu woneleya dzihuwo dzatshavbo nya madhota. Ga gu tshuka si lombega gu khiso moyo wa avba nya huwo a ningwa giphaso, Oyu a gu ni maho nya gu ‘ngangameye kha nga nilo’ a na si lulamisa khu tepo ni magirelo yakone. (Gutu. 1:14) Khu monyo watshavbo, hi ngu ninga githawo gi vbwetegago ava va hathidwego khu liphuvbo nya guage. Pawulo a di khuye: “Yingelani vathangeli vanu, mu landrisa sileletelo sawe. Kholu avo khavo va khedziselago gikhati gyatshavbo mihefemulo yanu, va na wudziswa khu Nungungulu khu kotani nya isoso. Mwa gu va yingelani, avo va na thuma na va tsakide, kholu, va gu thuma na va gu garadzega kha si na phasa gilo gwanu.” — Hebh. 13:17.
(Gutuledwa 2:1, 2) Lovela ngilozi nya libandla la Efeso, khuwe: “Wule a pharidego livbandre na dzimbili dzinyeledzi khu nyamudye; wule a vbindrago khu vbakari nya Iivbandre na dzimbili dzikandriya nya ndralama, wari, huye: 2 Nyi ngu siti sigiro sago, mithumo yago ni gutimisela gwago, kholu nyi ngu dziti nya gukheni khu pwanani ni vathu nyamba si vadi; ni vale va dzi ranago vapizane vasiri avo, u va lingide, u va kona muguliphani gwawe.
w12 15/4 paj. 29, ndri. 11
Jehovha a ngu hi sayisa gasi hi feya gu vbuluga
Avba nya giwoniso gi gomogo omu ga Gutuledwa sipimo 2 ni 3, Jesu Kristo a gu khedziseya livbandre na mavili mabandla ya Ásiya Menor. Giwoniso gyo yeyedza gu khigyo Kristo khandri a gu wona basi silo khu vbatshani, ganiolu a gu si wona khu gu vbeleya. Ga dzimbe dzitepo, a gu ganeya khu lina ni lina abwe a zundza mwendro gu ningeya wusingalagadzi sa gu vbwetega. So yeyedza ginani isoso? Gutadzisegani nya giwoniso, livbandre na dzimbili dzinyeledzi dzo emeya tsawa nya maKristo ma todzidwego. Gu khugeya khu 1914, milayo ga livbandre na mavili mabandla ya gu thuma ga mabandla yatshavbo nya sithumi sa Nungungulu mafuni gwatshavbo. Khu kharato, si ngu pwala ha gu khethu Jehovha khu gu thumisa Mwanaye, a ngu thangeya vathu vaye. Ha gu phasega kharini khu gu thangedwa gogo?
w01 15/1 dzipaji. 20-21, ndri. 20
Simama gu gimbiya ni hengeledzano ya Jehovha
Gasi gu simama gu gimbiya ni hengeledzano ya Jehovha, gu vbwetega hi pwisisa thumo owu Nungungulu a ningidego Jesu Kristo nga “hungo nya libandla.” (Vaefeso 5:22, 23) Isaya 55:4 wari khuye: “Wonani gukhenu, nyi mi emisede gu khala fakazi ga va nya mayigo, muthangeli ni mwamangulu nya mayigo.” Jesu a ngu dziti edzi a yedego gu thangeya khidzo. Uye gambe a ngu dziti dzinvuta dzaye ni sigiro sadzo. Tepo a nga gevisisa livbandre na mavili mabandla ya Ásia Menor, a di ganeya livbandre dzitepo khuye: “Nyi ngu siti sigiro sago.” (Gutuledwa 2:2, 19; 3:1, 8, 15) Gufana ni Papayi waye Jehovha, Jesu, a ngu siti esi hi si vbwetago. Na nga si ganeyi khu Nombelo nya Giyeyedzo, Jesu a di khuye: “Nungungulu Babe wanu a ngu siti iso si mi kenelelago na mu si gu mu lombi.” — Matewu 6:8-13.
Kemba dzithomba nya liphuvbo
(Gutuledwa 1:7) Mu ngu mu wona, a guta khu mapfhini; vatshavbo va na mu wona, ambari vale va nga mu songago, mafumbu yatshavbo ya mafuni ma na dzi laya khu kotani gwaye. Lisine: Amen.
Mufumo wa Nungungulu wu na fuvisa valala vaye
Guhuweledwa nya mahungu nya gulamule. Valala vatshavbo nya Mufumo wa Nungungulu va na gurumedzwa gu wona gigiro gi na va bangisago novba. Jesu a di khuye: “Va na wona Mwamana wa Muthu na gu tshiga khu vbakari nya lipfhi na tade khu tshivba nya yikhongolo ni gidhumo.” (Marko 13:26) Giwoniso gegi nya gikhongolo, gi na yeyedza gu khigyo Jesu vbohide gasi gu ta huweleya mahungu nya gulamule. Avba nya giprofeto gya gimwego maningano ni matshigu nya guhegise, Jesu ningede mambe mahungu maningano ni gulamula gu na giregago ga tepo yoyo. Mahungu yoyo hi ngu ma mana avba nya giyeyedzo nya dzinvuta ni dziphongo. (Leri Matewu 25:31-33, 46.) Ava va seketeyago Mufumo wa Nungungulu khu gu tumbega va na lamudwa nga “dzinvuta” ni gu va na “khusedza dzithamo [dzawe]” va wona gu khavo “guvbanyiswa [gwawe]” gu vbohide. (Luka 21:28) Ganiolu valala nya Mufumo wa Nungungulu va na lamudwa nga “dziphongo” nigu va na “lila” khu gu wona gu khavo va gu “hongola gusanisekani nya gupindruge.” — Mat. 24:30; Gutu. 1:7.
(Gutuledwa 2:7) “Wule a gu ni dzindzeve a na pwisise esi Liphuvbo li embelago mabandla. Ga wule a na palago, nyi na mu dzumedzisa gu hodza handro nya simbo nya womi wu guromo thembweni ga Nungungulu.”
w09 15/1 paj. 31, ndri. 1
Dzithomba dza omu nya libhuku la Gutuledwa — I
2:7 — Ginani paradhesi mwendro “thembweni ga Nungungulu”? Kha nga olu malito yaya ma yiswago ga maKristo ma todzidwego, avba, paradhesi yi yede gu emeya giemo nya liphuvbo gya ndzadzini — iyo a gomogo Nungungulu khu wugulu. Va nya todzwa nyo tumbege va na tshatshazedwa khu gu hodza “handro nya simbo nya womi.” Avo va na hakha mili nya gu mbafa. — 1 Kor. 15:53.
25 NYA NOVEMBRO – 1 NYA DEZEMBRO
DZITHOMBA NYA LITO LA NUNGUNGULU | GUTULEDWA 4-6
“Vakhileli nya dzikavhalu dzina”
(Gutuledwa 6:2) Khavbo avbo, nyi di wona kavhalu nya guage na yi gu duga, na yi khiledwe khu muthu na pharide wulaho mandzani. A di ningwa gihugu nya wufumu, a gu phara ndzila a hongola kha nga kuzi, gasi guya pala.
Khu vamani vakhileli vana nya dzikavhalu?
Khu mani mukhileli nya kavhalu nyo age? Hlamulo wakone womo omu nya libhuku lalimwedo nya Bhibhiliya, a gu Gutuledwa, oyu khu gu gimbiya ya tepo a ganeyago khu mukhileli yoyo wa ndzadzini nga “Lito la Nungungulu.” (Gutuledwa 19:11-13) Lina lolo, Lito, la gu lumba Jesu Kristo khu gu ba a thumide kha nga muganeyi wa Nungungulu. (Johane 1:1, 14) Gimbe khu gu, uye a gu ranwa pwani “Pfhumu nya dzipfhumu; Mufumeli nya vafumeli” nigu a gu tshamusedwa nga “fakazi nya guthembege nya lisine.” (Gutuledwa 19:16) Esi sa gu yeyedza gu khiso Jesu a ngu lumbwa khu malungelo yatshavbo nyo khale Pfhumu ni mudwani nya nyimbi. Nigu, olu a tumbegidego, uye kha hagani khu wufumu nigu khandri pfhumu nyo kanganyise. Ganiolu guni giwudziso gi tumbunugago.
Khu vamani vakhileli vana nya dzikavhalu?
Mukhileli nya khavhalu phede lini lipfhumba laye? Wona gu khuwe mukhileli nyo pheye, Jesu, phede lipfhumba laye tepo a nga hakha gihugu nya wufumu. (Gutuledwa 6:2) Lini Jesu a ambagisidwego gihugu nga Pfhumu ndzadzini? Ina ambade tepo a nga gweya ndzadzini hwane nya gu wuswe khu ga vafudego? Ahihi. Bhibhiliya ya gu yeyedza gu khiyo tepo yoyo gu di pheya tepo nya guvireye. (Vahebheru 10:12, 13) Jesu a di ningeya giyeyedzo ga valandreyi vaye gi na va phasago guti tepo a na pheyago gufuma, a di khuye: Tepo khiyo a pheyago gufuma, silo tigoni si na garadza. Gu na ba guri ni dzinyimbi, madwali ni dzindzala. (Matewu 24:3, 7; Luka 21:10, 11) Sigiro sa gu yeyedza gu khiso dzitepo dzodzo nyo garadze dzi phede khu 1914, hwaninyana nya gu ba yi phede Nyimbi nya Yikhongolo nya Mafu. Bhibhiliya ya gu rana tepo yoyo nga “matshigu nya guhegise.” — 2 Thimoti 3:1-5
(Gutuledwa 6:4-6) Khavbo avbo, yi di duga yimbe kavhalu, nya gufuvile, na yi khiledwe khu muthu a nga ningwago tshivba nya guvbedze gurula tigoni, gasi vathu va songane khu gyawe. A di ningwa gambe litshari nya likhongolo. 5 Gikhati yi nga namulago gifungo nya wuraru, nyi dipwa girengo nya wuraru na gi gu khigyo: “Delu!” Khavbo avbo, yi di duga kavhalu nya gusivbale, na yi khiledwe khu muthu a nga bani ari ni gikalo mandzani. 6 Khavbo avbo, nyi dipwa lito vbakari nya sirengo sa sina, khilo: “Gipimo nya tirigu gu livba thumo nya litshigu, sipimo siraru nya mavbila gu livba thumo nya litshigu aholu u nga pati mati ni vbinyu, gambe u nga haganiseli mafura.”
Khu vamani vakhileli vana nya dzikavhalu?
Mukhileli yoyu a gu emeya dzinyimbi. Wona gu khuwe uye a gu duseya gurula mafuni gwatshavbo. Khu 1914, gu di pheya nyimbi nya yikhongolo. Iyo yi di landredwa khu nyimbi nya wuvili nya yikhongolo aniyo yi nga vbiyela vathu nya vangi. Vambe vathu vari khavo gu khugeya khu 1914, wa gu patwa tengo nya ava va fudego omu nya dzinyimbi dzatshavbo, wu ngu vbindra 100 dzimiliyoni nya vathu! Avba, kha gu patwi tengo nya ava va tshadego ni dziphadza basi.
Khu vamani vakhileli vana nya dzikavhalu?
“Yi di duga kavhalu nya gusivbale, na yi khiledwe khu muthu a nga bani ari ni gikalo mandzani. Khavbo avbo, nyi dipwa lito vbakari nya sirengo sa sina, khilo: ‘Gipimo nya tirigu gu livba thumo nya litshigu, sipimo siraru nya mavbila gu livba thumo nya litshigu aholu u nga pati mati ni vbinyu, gambe u nga haganiseli mafura.’” — Gutuledwa 6:5, 6.
Mukhileyi yoyu a gu emeya ndzala. Giemo gi di hadzi garadza avba nya gu Bhibhiliya khiyo deva nya tirigu wu di hadzi livbwa khu denário mweyo, gu nga ba guri tengo nyo livbe muthu a thumidego litshigu rumba! (Matewu 20:2) Khu tengo wowo, gu di gu rengwa gambe mideva miraru nya mavbila; ayo ma di gu wonedwa vbavbatshi ma gu fananisa ni tirigu. Guhodzana gogo gu di hadzi khurisa ndranga ya na mani? Lito gambe li di khilo vathu va di yede gu mba pata mafura ni vhinyu. Tepo yoyo, gasi vathu havo khavo va hodzide gwadi, silo sesi kha sa nga ba si yede gu keneleya.
(Gutuledwa 6:8) Nyi di wona kavhalu nya safarawu, na yi khiledwe khu moyo nya gupwani khu “Gufa” a na gu bangaladzwa khu Hayidhesi, litigo nya vafi. A di ningwa gipandre nya wuna nya litigo, gasi a li mwaladze khu litshari, ni ndzala, ni mitungu nya madwali ni sirengo nya likhabi.
Khu vamani vakhileli vana nya dzikavhalu?
Mukhileli nya wuna a gu emeya gufa gu vangwago khu madwali ni simbe silo. Hwaninyana nya 1914, madwali nya gu pwani gripe espanhola ma songide vathu nya vangi ngudzu. Si ngu kodzega na yi thaphede gipimo nya 500 dzimiliyoni nya vathu, sithulago gu khiso avba nya vathu vararu, moyo wakone a di gu vetwa khiyo!
Ganiolu gripe espanhola gu diri maphelo basi. Ga gu dundrugedwa gupwani gipimo nya guvbindre 300 dzimiliyoni nya vathu va fude khu varíola. Muhono, madwali nya nga sidha, tubherikulozi ni malariya, ma ngu ridha vathu nya vangi ngudzu.
Khu kharato, gani khu kotani nya dzinyimbi, dindzala mwendro madwali, gufa gu ngu fuma khu tshivba ni tshivba. Nigu, mathowo, kha mapwi khu muthu; ayo mo khala na ma hakhedzede vathu basi.
Kemba dzithomba nya liphuvbo
(Gutuledwa 4:4) Na si randrede gikhalo gegi nya wufumu, si di romo magumavili na sina sikhalo nya wufumu, avbo gu nga bani gu khade magumavili na mana madhota, ma na ambade dzingandzu nya guage ni sihugu nya wufumu, nya gugirwe khu ndralama.
(Gutuledwa 4:6) Mbeli nya gikhalo nya wufumu gi di romo gilo nya gufanane ni yiphwa nya mati nya gugyendze kha nga libona. Khu vbakari, avbo nya gikhalo gegi ni mudzibambe gakone si di romo sirengo sina nya gutale khu maho hwane ni mbeli.
re dzipaji. 76-77, ndri. 8
Wukhalo wa ndzadzini nya wufumu wa Jehovha
Johane a di gu dziti gu khuye vaphasi nya mhamba va di hathwa gasi gu thuma omu nya nyumba ya Nungungulu. Khu kharato, adzina samadzisidwe khesi a tshamusedego nyo khuye: “Na si randrede gikhalo gegi nya wufumu, si di romo magumavili na sina sikhalo nya wufumu, avbo gu nga bani gu khade magumavili na mana madhota, ma na ambade dzingandzu nya guage ni sihugu nya wufumu, nya gugirwe khu ndralama.” (Gutuledwa 4:4) Khu gu, vbavbandze nya vaphasi nya mamba basi, gu na ni 24 madhota ma ambagisidwego sihugu nya wufumu. Khu vamani madhota yoyo? Khavo va todzidwego va wumbago libandla nya wuKristo, va wusidwego khu gufani va bwe va ya khala omu Jehovha a va tumbisidego, ndzadzini. Ha gu dziti kharini?
re paj. 80, ndri. 19
Wukhalo wa ndzadzini nya wufumu wa Jehovha
Milowo yeyi ya gu emeya ginani? Gimbe giwoniso gi tshamusedwego khu muprofeti Ezekiyeli gi ngu hi phasa gu tugula hlamulo wakone. Ezekiyeli a di wona Jehovha na khade avba nya movha nya wufumu, na guri ni sivangwa nyo vbanye si gu ni makhalelo nyo fane ni aya ma tshamusedwego khu Johane. (Ezekiyeli 1:5-11, 22-28) Khu gu gimbiya nya tepo, Ezekiyeli gambe a di wona movha nya wufumu na yiri ni sivangwa nyo vbanye. Khu ga tepo yeyi, a gu rana sivangwa soso nyo vbanye gu khuye dzikerubhimi. (Ezekiyeli 10:9-15) Sivangwa sa sina si wonidwego khu Johane, adzina sa gu emeya dzikerubhimi nya dzingidzingi dza Nungungulu — sivangwa si gu ni giemo nyo khugege ngudzu omu nya hengeledzano ya Jehovha ya liphuvboni. Johane na sa samala khu gu wona dzikerubhimi na dzi gu emeya Jehovha, kholu avba nya malulamiselo nya nyumba ya Nungungulu matshiguni nyo pheye, gu diri ni dzikherubhimi dzimbili avba nya gifenengedzo nya ngasa nya gidzuledzedzwano, dzi nga ba dzi emeya wufumu wa Jehovha. Vbakari nya dzikerubhimi dzodzo, lito la Jehovha li di gu ningeya milayo litigo. — Ekisodha 25:22; Ndzimo 80:1.
(Gutuledwa 5:5) Limwedo nya madhota yale li di nyi degudzela, khilo: “U nga lili; kholu Nghala nya lihundzu la Judha a gu Melego wa Dhavhidhe, yi pade, yi ngu kodza gu tula libhuku ni gu namula sifungo saye satshavbo nya livbandre na sivili.”
cf paj. 36, ndri. 5-6
“Nghala nya lihundzu la Judha”
Nghala ya gu tidwa nari girengo nyo tiye hwambo. Ina u di nga khedzana khovbe ni khovbe ni ngala nya matune? Abari gu u di nga khedzeya nayo, gu diri ni vbingano khu vbakari, si thulago gu khiso iyo yi di gu segedwe. Ambari ulolo, u ndrendremedinyana khu hwanga. Wa gu ronogeyana gwadi ni nghala nya yikhongolo, si ngu garadza gu yi dundrugeya na yi gu tutuma khu gu thurugiswa khu gilwana. Bhibhiliya yi ngu ganeya khu “nghala yi gu ni tshivba guvbindra sirengo satshavbo, yi si thavigo gilo.” (Mavingu 30:30) Go thudwa gutiya hwambo ga Kristo.
Hongoleni hi ganeya khu dzindziya dziraru edzi Jesu a yeyedzidego gutiya hwambo gufana ni nghala: khu gu emeya lisine, gu seketeya gululama ni gu emisana ni guwugedwa. Hi na wona gambe gu khetu, anethu hi nga si kodza gu pimedzeya Jesu hi yeyedza gutiya hwambo— gani hi ni gutiya hwambo nya mavelego, gani ne.