U nga pheya kharini mabhulo khu gu thumisa gidangaliyana

Gu khugeya Janeiro nya 2018, avba nya kapa nya Gibhukwana nya mitshangano nya thumo ni mavbanyelo gu na ni gipandre Mabhulo nya Bhibhiliya. Ha gu kutswa gu bhula ni vathu vbavbandze basi nya gu va ninge mabhuku. Gasi gu phasa vahuweleyi gu vbindrugedza mabelelo yawe, avba nya mabhulo nya bhibhiliya khu gu thumisa dzivhidhiyu, ma ngu yeyedza edzi u nga pheyago khidzo mabhulo khu gu thumisa Bhibhiliya basi. Ina isoso so thula khiso kha hi yeli gu thumisa mabhuku tepo hi tshumayelago khu ndranga ni ndranga? Ahihi! Khu giyeyedzo, sidangaliyana si nga khala gilo nya gyadi nyo pheye khigyo mabhulo. Hi nga thumisa giyeyedzo gi landreyago tepo hi thumisago sidangaliyana:

1. Gira giwudziso gi gomogo mbeli nya gidangaliyana.

2. Yeyedza mihlamulo mwendro hlamulo nya Bhibhiliya wu manegago khu vbatshani nya gidangaliyana avba nya pajina nya wuvili. Tepo ya gu gu dzumeleya, leri ni gu bhula khu mahungu nyo khaguri ma gomogo ndrani nya gidangaliyana.

3. Ningeya gidangaliyana mune ndranga u bwe u mu kutsa gu tshala a leri esi simbe si tshadego.

4. Na wu nga si dugi khu ndrangani, yeyedza giwudziso gi gomogo avba va pwani “Nga dundrugeya” nigu tumbisa gu wuya limbe litshigu gasi guta hlamula giwudziso khu gu thumisa Bhibhiliya.

Tepo u bweleyago, indra hlamula giwudziso u bwe u tshiya gimbe gasi gu ta bhula khigyo limbe litshigu. U nga hatha giwudziso gi gomogo omu nya sayiti yathu mwendro egi gi gomogo avba nya revhista yi ningedzidwego avba nya pajina ya hwane. Tepo ya gu gu dzumeleya, yeyedza broxura Mahungu nya yadi ya Nungungulu! mwendro limbe libhuku nya gihevbulo li gomogo omu nya Dziferameta hi hevbudzago khidzo.