Nombelo wu nga gu phasa kharini?

Tepo Pamela a nga tugula gu khuye a diri ni madwali nya ma khongolo nya cancro, a di lomba giphaso ga vadhogodheya. Ganiolu, a di gombeya gambe ga Nungungulu a lomba gu khuye a mu ninga tshivba gasi a si kodza gu emisana ni giemo gile nyo garadze. Ina nombelo wu mu phaside?

Pamela wari, khuye: “Tepo yi nga ba nyi thumwa madwali nya cancro, dzitepo nya dzingi nyi di gu thava. Ganiolu, tepo nyi nga ba nyi gombeya ga Jehovha Nungungulu, nyi di gu dzipwa na nyi rude ni gu si kodza gu emisana ni giemo gegi nya mba vbeya tshivba. Nyi ngu gupwa guvbisa nya madwali yaya, ganiolu nombelo wu ngu nyi phasa gu vega gupima ga silo nya sadi. Vathu va gu nyi wudzisa khu mawugelo yangu, nyo va embeya gu kheni: ‘Eni kha nyi wugi gwadi, ganiolu nyi tsakide!’”

Lisine gu ethu kha hi vireyi gu khethu gudugeleya sigaradzo nya sikhongolo womini wathu gasi gu gombeya. Hatshavbo hi ngu tshangana ni sigaradzo nya sikhongolo mwendro nya sidugwana, nigu gu tala nya dzitepo hi ngu vbweta giphaso gasi hi si kodza gu emisana naso. Ina nombelo wu nga hi phasa?

Bhibhiliya yo ganeya gu khiyo: “Vega womi wago ga Pfhumu Nungungulu, uye a na gu sayisa; gima kha na dzumedzisa muthu nya gululame gu a thega vbavbatshi.” (Ndzimo 55:22) Gupwa malito yaya si ngu tiyisa ngudzu! Khu kharato, nombelo wu nga gu phasa kharini? Wa gu gombeya ga Nungungulu khu ndziya yi mu tsakisago, uye a na gu ninga satshavbo u si vbwetago gasi u emisana ni sigaradzo sago. — Wona kwadru yi gu khiyo: “Makategwa u na ma manago wa gu gombeya.”

Makategwa u na ma manago wa gu gombeya

Gurula ga mapimoni

“Gombeyani ga Nungungulu mu mu lomba gu khenu a mi thangeya ga satshavbo mu girago, mwa gu gira isoso, gurula ga Nungungulu, gu vbindrago gupwisisa gwatshavbo, gu na sayisa myonyo yanu ni mapimo yanu kha nga valandreyi va Kristo Jesu.” (Vafilipi 4:6, 7) Wa gu bhuleya Nungungulu khu sigaradzo sago, uye a na gu phasa gu u rula u bwe uti gilo nyo gire, ambari wa gu tshangana ni sigaradzo nyo thise.

Guti ga Nungungulu

“A gu ba a romo moyo wanu a vbwetago wugengeyi, a na simame gu gu lomba ga Nungungulu, kholu uye a ngu ninga wugengeyi vatshavbo khu wuhindzi nya mba vbwetedzeya gihoso gwawe.” (Jakobe 1:5) Khandri tepo yatshavbo hi hungago makungu nya yadi ha gu ba hi tshangana ni gigaradzo nyo khaguri. Ganiolu, wa gu gombeya ga Nungungulu u mu lomba guti, uye a na gu phasa gu dundruga milowo nya yadi yi gu romo omu nya Lito laye Bhibhiliya.

Tshivba ni guthaveleya

“Nyi ngu kodza gu gira silo satshavbo khu kotani ya Nungungulu a nyi ningago tshivba.” (Vafilipi 4:13) Jehovha, Nungungulu nya Tshivba Yatshavbo, a na gu ninga tshivba u yi vbwetago gasi u kodza gu timiseya mwendro gu pala sigaradzo u tshanganago naso. (Isaya 40:29) Bhibhiliya ya ri khiyo Jehovha “Nungungulu nya guthaveleye gwatshavbo.” Uye a nga hi thaveleya “ni ga gevbini gilingo.” — 2 Vakorinto 1:3, 4.

GOMBEYA GA NUNGUNGULU!

Jehovha kha gurumedzi muthu gu gombeya gwaye. Wulangani nya isoso, uye a gu hi raneya gasi gu gira isoso. (Jeremiya 29:11, 12) Ahanti wa gu pimisa gu khuwe milombelo u nga gira kha ya hlamudwa na? U nga vbeyi tshivba mwendro gu tsukuwa. Vavelegi nya lihaladzo adzina kha va phasi sanana sawe khu ndziya mwendro khu tepo eyi iso si yi vbwetago. Si nga gira gu vavelegi na va gu dziti edzi va nga lulamisago khidzo gigaradzo khu ndziya nya yadi. Lisine limwedo: vavelegi nya lihaladzo va ngu phasa sanana sawe.

Jehovha Nungungulu, Papayi nya lihaladzo gu vbindra vatshavbo va gu romo nigu uye dzi emisede gu hi phasa. Wa gu ninga lisima esi Bhibhiliya yi ganeyago khu nombelo u bwe u dzi garadzeya gu si gira, Nungungulu a na hlamula milombelo yago khu ndziya nya yadi ngudzu. — Ndzimo 34:15; Matewu 7:7-11.