U Ngo Dundruga?

Ina u leride gwadi dzindrima nya Revhista Mukhedziseyi nya mwaga wowu? Abari kharato, zama gu hlamula siwudziso si landreyago:

Hi nga wuyedwa kharini ha gu dzi ninga tepo nya gu ganeye, gu engiseya hi bwe hi pimisa maningano khu Jehovha?

Ethu hi na hunga makungu nya yadi, hi na khala vahevbudzi nya vadi, gukhodwa gwathu gu na engedzeya gu tiya nigu lihaladzo lathu khu Jehovha li na engedzeya. — w22.01, dzipaji. 30-31.

Hi nga phasega kharini khu gu hevbuleya gu tumba Jehovha ni ava uye ava emisidego gasi gu thangeya?

Olu tepo nya gu hevbuleye gu tumba ndziya eyi Nungungulu a girago khiyo silo khu gu hi si kanakaneyi sileletelo ni esi si hungwago khu madhota. Ndrani nya tshanisa nya yikhongolo, hi na ba hi dzi emisede gu engisa ambari ha gu hakha sileletelo si garadzago gu si pwisisa mwendro gu si landrisa. — w22.02, dzipaji. 4-6.

Ginani egi ngilozi yi nga vbweta gu ganeya tepo yi nga embeya Zakariya maningano ni “giwindri giri mandzani ga [mufumeli] Zorobhabheli”? (Zak. 4:8-10)

Giwoniso gegi gi di gu yeyedza ga vathu va Nungungulu gu khigyo, ambari tempele yi nga ba yi wonedwa vbavbatshi, iyo yi di hadzi gu vbeya gu vbahwa nigu yi di hadzi gu khala nga edzi Jehovha a nga ba a yi vbweta khidzo. —  w22.03, dzipaji. 16-17.

Hi nga khala kharini ‘siyeyedzo . . . avbo nyo ganeye’? (1 Thim. 4:12)

Khu gu hi ganeya khu ndziya nya yadi ni githawo thumoni gwathu nyo tshumayele, khu gu ningeya mihlamulo mitshanganoni, gu ganeya lisine ni gu potsa maganelelo nyo nyenyeze. — w22.04, dzipaji. 6-9.

Khu ginani makhalelo nya 4 sirengo (mifumo) si khumbugwago umo ga Dhaniyeli gipimo 7 hi ma manago avba nya girengo gimwegyo basi gi khumbugwago omu nya libhuku la Gutuledwa 13:1, 2?

Girengo gi khumbugwago omu ga Gutuledwa 13 kha gi emeyi basi mufumo mowo, nya nga Roma. Wulangani nya isoso, igyo gyo emeya dzatshavbo dzitshivba nya politika dzi fumedego vathu. — w22.05, paj. 9.

Hi nga yeyedza kharini gu khethu hi ngu tumba gululama ga Nungungulu?

A gu tshuka muthu nyo khaguri a hi vala, a hi khunguvanyisa mwendro gu hi ghohela, ethu hi yede gu diga likhulo, hi si vegi giviti hi bwe hi diga satshavbo mandzani ga Jehovha. Uye a na lulamisa guvivba gwatshavbo gu girwago khu gighoho. — w22.06, dzipaji. 10-11.

Ginani egi ndriyathu a girago nombelo mitshanganoni a yedego gu dundrugeya khigyo?

Nombelo kha wu yeli gu thumiswa gasi gu ninga wusingalagadzi libandla mwendro gu gira sitiviso. Ngudzu-ngudzu ha gu ba hi romo mitshanganoni kha yeli gu ganeya “malito nya mangi.” (Mat. 6:7) — w22.07, dzipaji. 24-25.

Khu ginani vale “va na gu bani va giride guvivba va na wuga[go] vaya [gulamudwatunu]”? (Joh. 5:29)

Avo kha va na nga lamudwa guya khu mithumo va giridego gale. Ganiolu, avo va na na lamudwa guya khu mavbanyelo yawe hwane nyo ba va wusidwe khu gufani. — w22.09, paj. 18.

Gilo muni nyo tsakise J. F. Rutherford a ganedego avbo nya kongresu khu Setembro nya 1922?

Avbo nya kongresu yi nga girega Cedar Point, Ohio, Estados Unidos da América, uye a di ganeya gu khuye: “Pfhumu yi ngu fuma! Mu yede gu embeya vathu vatshavbo silo sesi. Khu kharato, huweleyani, huweleyani, huweleyani, Pfhumu ni Mufumo waye!” — w22.10, dzipaji. 3-5.

Dzindziya muni nya dziraru dzi khumbugwago omu ga Isaya gipimo 30 dzi yeyedzago edzi Jehovha a hi phasago khidzo gu timiseya?

Gipimo gegi gyo yeyedza gu khigyo uye 1) a ngu engiseya ni gu hlamula milombelo yathu, 2) a gu hi ninga sileletelo nigu 3) a gu hi kategisa olu ni gu hi tumbisa gu hi kategisa mindru watshigu. — w22.11, paj. 9.

Khu ginani hi nga ganeyago gu khethu malito ma gomogo umo ga Ndzimo 37:10, 11, 29 ma tadzisegide gale nigu ayo ma na tadzisega mindru watshigu?

Malito ya Dhavhidhe ma gu yeyedza edzi womi wu nga hadzi gu fana khidzo ni owu wa matshigoni ya Pfhumu Solomoni. Jesu a ganede maningano ni paradhesi yitago omu nya livhesi 11. (Mat. 5:5; Luka 23:43) — w22.12, dzipaji. 8-10, 14.