“U na ba uri ni eni Paradhesini”

1. Hwanenyana Jesu na si gufi, ginani uye a embedego gighevenga gile gi nga ba gi romo vbafuvbi gwaye? (Luka 23:39-43)

JESU ni sighevenga sivili si nga ba si romo vbafuvbi gwaye va di gu tshaniseka tepo va nga ba vafa vbadugwana-vbadugwana. (Luka 23:32, 33) Sighevenga sili sasivili si di gu ganeya khu ndziya nya gu vivbe khu Jesu, iso si yeyedzago gu khiso iso si di siri vapizani vaye. (Mat. 27:44; Marko 15:32) Ganiolu, moyo wawe a di vbindrugedza mawonelo. Uye a di khuye: “Jesu, nyi dundruge gikhati u na gu belago mufumoni wago.” Jesu a di mu hlamula gu khuye: “Khu lisine, nyi ngu gu embeya muhuno gu kheni: U na ba uri ni eni Paradhesini.” (Leri Luka 23:39- 43.) Gimwalo gi yeyedzago gu khigyo gighevenga gile gi dzumede mahungu maningano khu “Mufumo wa ndzadzini,” owu Jesu a wu hevbudzidego ndrani nya thumo waye nyo tshumayele. Nigu Jesu gima kha ganeya gu khuye mwama wule a di hadzi gu beya Mufumoni wa ndzadzini. (Mat. 4:17) Jesu a di gu ganeya khu Paradhesi yi na manegago avba mafuni. Khu ginani hi ganeyago isoso?

2. Ginani gi yeyedzago gu khigyo gighevenga gile gi dzi layidego gi diri Mujudha?

² Gighevenga gile gi dzi layidego adzina saye gi diri Mujudha. Igyo gi di embeya gimbe gu khigyo: “Ina uwe khu thavi Nungungulu, Olu u nga lamuledwa gu songwa naye, gani?” (Luka 23:40) Vajudha va di gu khozela Nungungulu moyo basi, ganiolu vathu va nya mayigo va di gu khodwa ga vanungungulu nya vangi. (Ekiso. 20:2, 3; 1 Kor. 8:5, 6) Nari khatshi sighevenga sesi si diri sa va nya mayigo, adzina na gi giride giwudziso kharati: “Ina uwe khu thavi vanungungulu?” Gu diga isoso, Jesu kha rumedwa ga va nya mayigo, ganiolu a di rumedwa “basi ga dzinvuta dzi dzimedego dza ndrangani ga na Israyeli.” (Mat. 15:24) Nungungulu a di gu embede Vaisrayeli gu khuye a di hadzi gu wusa ava vafudego. Gighevenga gile gi dzi layidego adzina saye gi di gu siti silo sesi, nigu malito yagyo ma gu yeyedza gu khayo igyo gi di gu dziti gu khigyo Jehovha a di hadzi gu wusa Jesu gasi gu khala Pfhumu nya Mufumo wa Nungungulu. So yeyedza gu khiso mwama yoyu a di gu tumba gu khuye Nungungulu a di hadzi gu mu wusa gambe.

3. Ginani egi gighevenga adzina saye gi pimisidego tepo Jesu a nga khumbuga Paradhesi? Tshamuseya. (Genesi 2:15)

³ Kha nga olu gighevenga gile gi dzi layidego gi nga ba giri Mujudha, igyo gi di gu hevbude maningano khu Adhamu, Evha ni Paradhesi eyi Jehovha a nga ba a va ningide. Khu kharato, gighevenga gegi adzina saye gi di gu khodwa gu khigyo Paradhesi yi khumbugidwego khu Jesu wu diri wulanga nyo mbure omu mafuni.— Leri Genesi 2:15.

4. Malito ya Jesu a embedego gighevenga gimwegyo ma gu hi kutsa gu dundrugeya khu ginani?

⁴ Malito ya Jesu a embedego gighevenga gile ma gu hi kutsa gu dundrugeya khedzi womi wu na ba wuri idzo Paradhesini. Khu lisine, hi nga hevbula gilo nyo khaguri maningano ni Paradhesi khu Mufumo wa Pfhumu Solomoni. Bhibhiliya yo ganeya gu khiyo Jesu khongolo guvbindra Solomoni. Ethu hi nga vireya gu khethu Jesu ni vale va fumago naye va vbindrugedza mafu ma khala Paradhesi nyo mbure ngudzu. (Mat. 12:42) Nigu “dzimbe dzinvuta” dzi yede guti esi dzi yedego gu gira gasi gu ninganedwa khu gu vbanya Paradhesini kala gupindruga. — Joh. 10:16

WU NA BA WU KHADE KHARINI WOMI PARADHESINI?

5. Ginani gitago mapimoni gwago tepo u dundrugeyago khedzi womi wu na ba wuri idzo Paradhesini?

⁵ Ginani gitago mapimoni gwago tepo u dundrugeyago khedzi womi wu na ba wuri idzo Paradhesini? Adzina u nga dzi dundrugeya na wuri ga wulanga nyo mbure ngudzu gu fana ni lithembwe la Edheni. (Gen. 2:7-9) Uwe adzina u nga dundrugeya khu giprofeto gi khumbugidwego khu Mikeya, nya gu khigyo vathu va Nungungulu va na “khala mutsani nya uvha waye, ni mutsani nya ngure waye.” (Mik. 4:3, 4) Uwe adzina gambe u nga dundrugeya khu mavhesi ma gomogo umo nya Bhibhiliya ma ganeyago gu khayo gu na ba gu romo guhodza nya gungi. (Ndzi. 72:16; Isa. 65:21, 22) Adzina u nga dzi dundrugeya na wu romo umo nya jardim nyo mbure na wu khade, nigu vbatshani nya meza na wu gu romo guhodza nya gungi nyo tshambe. Mwendro adzina u nga dzi dundrugeya na wu vetwa khu phuvbo nya gu nungeye nya sifilori. Nigu uwe adzina saye u nga dzi dundrugeya na wu hodza gumogo ni gu vbedza tepo ni va ndrangani gwago, dzipari gu pata ni ava va na wuswago. Satshavbo sesi khandri miloro. Khu lisine, hi nga tiyisega gu khethu satshavbo sesi si na girega omu mafuni. Paradhesini ethu gambe hi na tsaka khu gu thuma.

6. Ginani hi na girago Paradhesini? (Wona fotu.)

⁶ Jehovha a hi vangide ni makodzelo nyo tsake khu thumo wathu. (Muh. 2:24) Ethu hi na ba hiri ni thumo nya wungi ndrani nya Mufumo wa Jesu nya mili myaga. Vale va na vbulugago tshanisa nya yikhongolo ni dzimiliyoni nya vathu va na wuswago, va na vbweta sombo nyo ambale, guhodza ni wulanga nyo vbanye. Gasi gu va ninga silo sesi, ethu hi yede gu gira thumo nya wu khongolo nya gu tsakise. Gu fana ni Adhamu ni Evha va nga ba va gira thumo nya gu lime, ethu hi na ba hi yede gu tsaka khu gu gira thumo nyo vbindrugedze mafu ma khala paradhesi. Dundrugeya gambe khedzi hi na tsakago khidzo khu gu hevbudza dzimiliyoni nya vathu va na wuswago, va gu mbati silo nya singi khu Jehovha ni makungo yaye ni gu phasa sithumi nyo tumbege si vbanyidego na ma si gu vbohi matshigu ya Jesu gu hevbula esi si dugeledego hwane nya gu ba si fude.

7. Ginani hi nga tiyisegago khigyo, nigu khu ginani?

⁷ Hi nga tiyisega gu khethu tepo hi na ba hiri Paradhesini ethu hi na vbanya khu gurula, hi manega ni satshavbo hi si vbwetago nigu silo si na ba si sasamedzidwe gwadi. Khu ginani? Kholu Jehovha tepo yatshavbo a gu hi ninga siyeyedzo nya edzi womi wu na ba wuri idzo vbavbatshi nya mufumo wa gyanana gyaye. Hi nga wona isoso, avba nya matimo ma ganeyago khu mufumo va Pfhumu Solomoni.

MUFUMO WA PFHUMU SOLOMONI WU NGA HI NINGA MAHEMANYANA NYA EDZI HI NA VBANYAGO KHIDZO PARADHESINI

8. Malito hi ma manago umo ga Ndzimo 37:10, 11, 29 ma tadzisegide kharini hwane nya gu ba Pfhumu Dhavhidhe a ma lovide? (Wona “Siwudziso sa valeri” umo nya mukhedziseyi wowu.)

⁸ Pfhumu Dhavhidhe khu gu phaswa khu liphuvbo nya guage, a lovide edzi womi wu na ba wuri idzo tepo Pfhumu nya guti ngudzu ni iyo nyo tumbege yi nga hadzi gu fuma. (Leri Ndzimo 37:10, 11, 29.) Ethu dzitepo nya dzingi hi ngu lereya vambe libhuku la Ndzimo 37:11 tepo hi ganeyago khu Paradhesi. Ethu hi na ni gighelo nya gyadi gasi gu gira isoso kholu Jesu a khumbugide lowo wowu avba nya Ganelo yaye ya Gigomoni, na gu thula gu khuye isoso si na tadzisega mindru watshigu. (Mat. 5:5) Ganiolu, malito ya Dhavhidhe ma gu yeyedza gu khayo womi wu di hadzi gu fana ni owu wa matshigoni ya Pfhumu Solomoni. Tepo Solomoni a nga ba a fuma Israyeli, vathu va Nungungulu va di gu tsakide ngudzu kholu va di gu vbanya khu gurula ni gu va di gu dugeleya ga “litigo li gogago mahwe ni wulombe.” Nungungulu a di ganeya gu khuye: “Mwa gu vegedzani milayo yangu . . . Nyi na wuyisa gurula tigoni; mu na lala na mu tengide nyamba thurugiswa khu muthu.” (Levhi 20:24; 26:3, 6) Situmbiso sesi si tadzisegide tepo Solomoni a nga khala Pfhumu Israyeli. (1 Dzik. 22:9; 29:26-28) Nigu Jehovha a tumbiside gu khuye vathu nya gu vivbe va khozeyago vambe vanungungulu va di hadzi gu mba “wonega gambe.” (Ndzi. 37:10) Khu kharato, malito ma gomogo umo ga Ndzimo 37:10, 11, 29 ma tadzisegide gale nigu ayo ma na tadzisega gambe mindru watshigu.

9. Ginani egi Pfhumugadzi ya Sabha yi ganedego maningano khu mufumo wa Pfhumu Solomoni?

⁹ Pfhumugadzi ya Sabha yi pwide na gu ganedwa khu gurula ni gu dugeleya nya litigo la Israyeli tepo Solomoni a nga ba ari Pfhumu. Uye a di endra gasi gu hongola Jerusalema aya wona khu abune edzi giemo gi nga ba gi khade khidzo. (1 Dzipf. 10:1) Hwane nya gu ba a wonide giemo nya mufumo wa Solomoni uye a di ganeya gu khuye: “Kha va nga nyi pwadzela ni sidugwana . . . Va kategide vathu vago, si kategide sithumi sesi sago, si guromo mbeli gwago gikhati gyatshavbo si yingisa guti gwago!” (1 Dzipf. 10:6-8) Ganiolu, edzi giemo gi nga ba gi romo khidzo vbavbatshi nya mufumo wa Solomoni gyo yeyedza esi Jehovha a na gireyago vathu vbavbatshi nya mufumo wa Gyanana Gyaye, Jesu.

10. Khu ginani Jesu a gu khongolo guvbindra Solomoni?

¹⁰ Jesu khongolo guvbindra Solomoni ga silo satshavbo. Solomoni a diri mwama nya mba vbeleya oyu a giredego sighoho nya si khongolo a bwe a vangeya sigaradzo vathu va Nungungulu. Ganiolu, Jesu Pfhumu nyo vbeleye yi gu mba ghoha. (Luka 1:32; Hebh. 4:14, 15) Jesu simamide na tumbegide ga Nungungulu ambari olu a nga lingwa dzitepo nya dzingi khu Sathane. Kristo a yeyedzide gu khuye gima kha na nga ghoha mwendro gu gira silo si na vegago mhangoni gutumbega nya sithumi saye. Uye Pfhumu nya yadi nigu ethu hi ngu tsaka khu gu ba ari Pfhumu yathu.

11. Khu vamani va na phasago Jesu gu fuma?

¹¹ Ava nya 144 000 va na fuma gumogo ni Jesu gasi gu khathaleya vathu ni gu tadzisa makungu ya Jehovha maningano ni mafu. (Gutu. 14:1-3) Avo va timisede sigaradzo nya singi tepo va nga ba va vbanya omu mafuni, khu kharato avo va ngu pwisisa esi vathu va si vbanyago omu mafuni. Ginani egi ava nya 144 000 va na girago?

GINANI EGI AVA VA TODZIDWEGO VA NA GIRAGO?

12. I thumo muni Jehovha a nigidego ava nya 144 000?

¹² Jesu ni ava nya 144 000 va na ni thumo nya wungi ngudzu gasi gu gira guvbindra esi si giridwego khu Solomoni. Pfhumu Solomoni a di gu khathalede dzimiliyoni nya vathu ga litigo nyo khaguri. Ganiolu, vale va na fumago avbo nya Mufumo wa Nungungulu va na phasedzeya avbo nya gu khathaleye mazanazana nya vathu mafuni gwatshavbo. Jehovha a ningide ava nya 144 000 lithomo leli nya likhongolo.

13. I thumo muni nya lisima ava va na fumago ni Jesu va na girago?

¹³ Gu fana ni Jesu, ava nya 144 000 va na thuma kha nga dzipfhumu ni vaprista. (Gutu. 5:10) Tepo Vaisrayeli va nga ba va engisa Nayo wa Mosi, vaprista va di gu phasedzeya vathu gu simama ni womi nya wadi ni wupari nyo tiye ni Jehovha. Nayo “khandri giwonelo nya guvbelele ni gutiya nya silo nya lisine,” khu kharato si ngu vbevbuga gu ganeya khethu ava va na fumago ni Jesu va na phasa vathu va Nungungulu gu simama ni womi nya wadi ni wupari nyo tiye ni Jehovha. (Hebh. 10:1) Olu ethu kha hi dziti edzi dzipfhumu ni vaprista va na manegago khidzo ni mabhulo ni vale va na hathwago gasi gu thangeya omu mafuni. Ni gevbini egi Jehovha a hungago, ethu hi nga tiyisega gu khethu Paradhesi yitago vale va na thangeyago omu mafuni va na hakha sileletelo va si vbwetago. — Gutu. 21:3, 4.

GINANI ESI “DZIMBE DZINVUTA” DZI YEDEGO GU GIRA GASI GU NINGANEDWA KHU GU VBANYA PARADHESINI?

14. Gupwanana muni gu gomogo ga “dzimbe dzinvuta” ni “tshambi dugwana”?

¹⁴ Jesu a ranide ava va na fumago naye khuye “tshambi dugwana.” (Luka 12:32) Uye gambe ganede khu tsawa nya wuvili uwo a nga wu rana kha nga “dzimbe dzinvuta.” Mitsawa yeyi ya mivili, yi na wumba tshambi mowo. (Joh. 10:16) Yatshavbo mitsawa yeyi ya mivili, ya gu thuma gumogo muhuno nigu yi na thuma gumogo mindru watshigu tepo mafu ma na vbindrugedzwago ma khala Paradhesi. Khu lisine, kala iyoyo “tshambi dugwana” wu na ba wu romo ndzadzini nigu ava nya “dzimbe dzinvuta” va na ba vari ni gutumba nya gu vbanye womi nyo tsakise avba mafuni kala gupindruga. Ganiolu, somo simbe silo esi “dzimbe dzinvuta” dzi yedego gu gira olu gasi gu ninganedwa khu gu vbanya Paradhesi.

15. a) “Dzimbe dzinvuta” dza gu thuma kharini ni vandriye va Kristo? b) U nga pimedzeya kharini giyeyedzo gya ndriyathu a gomogo lojani? (Wona fotu.)

¹⁵ Gighevenga gi dzi layidego gi fude na gi si mani lithomo nya gu yeyedze gu khigyo gi ngu bonga khesi Kristo a gi giredego. Gu hambana ni igyo, ethu nya “dzimbe dzinvuta” hi na ni mathomo nya mangi olu gasi gu yeyedza edzi hi dzipwago khidzo maningano khu Jesu. Khu giyeyedzo, ethu hi ngu yeyedza lihaladzo lathu khu gu phara gwadi vandriyathu va todzidwego. Jesu a di ganeya gu khuye a di hadzi gu lamula dzinvuta guya khedzi va pharago khidzo vandriyaye. (Mat. 25:31-40) Ethu hi nga seketeya vandriye va Kristo khu gu va phasa gu tshumayela ni gu gira vapizane. (Mat. 28:18-20) Isoso khiso si hi girago hi vbweta gu thumisa sihevbudzo nya Bhibhiliya hi ningwago, nya nga libhuku Vbanya nu tsakide kala gupindruga! Abari gu kha wu gimbidziseye gihevbulo nya Bhibhiliya muthu nyo khaguri, khu ginani u gu mba dzi vegeya misuwo nya gu manege ni sihevbuli nya singi nya Bhibhiliya?

16. Ginani hi nga girago olu gasi gu dzi dongiseya guta vbanya vbavbatshi nya Mufumo wa Nungungulu?

¹⁶ Ethu kha hi yeli gu vireya guta vbanya Paradhesini gasi gu khala muthu oyu Jehovha a mu tsakeyago. Ethu hi na dzi garadzeya gutumbega khu maganelelo yathu, khesi hi girago ni mavbanyelo yathu yatshavbo. Nigu hi nga yeyedza gu khethu hi ngu tumbega ga Jehovha khu gu hi tumbega ga pari yathu nya wugadzi ni ga vandriyathu. Ha gu engisa Jehovha olu tigoni momu nya gu vivbe, si na ta hi vbevbugeya gu mu engisa Paradhesini. Ethu hi nga haguleya makhalelo nya yadi gasi gu yeyedza gu khethu hi dzi dongisede gu vbanya Paradhesini. Wona ndrima yi gu khiyo: “Ina u dzi emisede gu ‘hodza thomba nya mafu’?” omu nya mukhedziseyi wowu.

17. Khu ginani hi gu mba yela gu vbeya tshiva khu kotani nya sighoho hi giridego gale? Tshamuseya.

¹⁷ Hi yede gambe gu dzi garadzeya gu ema gu vbeya tshivba khu kotani nya sighoho hi giridego gale. Khu lisine, ethu gima kha hi yeli gu wona dzegiso kha nga gighelo nya gu simame hi “ghoha nya gigwenye.” (Hebh. 10:26-31) Ganiolu, hi nga tiyisega gu khethu ha gu dzi laya khu lisine khu gighoho nya gikhongolo hi giridego, hi vbweta giphaso gya Jehovha ni gu vbindrugedza mavbanyelo yathu, uye a na hi divaleya khu gu vbeleya. (Isa. 55:7; Mith. 3:19) Dundrugeya khu malito ya Jesu a embedego Vafarisi ma gu khayo: “Kholu kha nya teya gu ta rana va nya gululama, ganiolu sighohi.” (Mat. 9:13) Dzegiso wu na ni tshivba nya gu fute sighoho sathu satshavbo.

U NGA VBANYA KALA GUPINDRUGA PARADHESINI

18. Ginani u tsakeyago gu ta bhula khigyo ni gighevenga gile gi fudego vbafuvbi ga Jesu?

¹⁸ Ina u ngu dzi dundrugeya mafuni nya maphya na wu gu ganeya ni gighevenga gile gi ganedego ni Jesu? Nya mba kanakana enu mwa vavili mu di hadzi bonga khu dzegiso wa Jesu. Uwe adzina u nga wudzisa nya singi maningano ni esi si dugeledego gitepwana hwane Jesu na si gufi, ni edzi igyo gi dzipwidego khidzo tepo Jesu a nga hlamula gilombo gyagyo. Nigu adzina saye igyo gi nga gu wudzisa edzi womi wu nga ba uri idzo matshigoni nyo hegise ga mafu ya Sathane. Gu na ba guri lithomo gu hevbula Lito la Nungungulu ni vathu va fanago ni mwama yoyu. — Efes. 4:22-24.

19. Khu ginani womi wu na tsakisago Paradhesini? (Wona fotu avba nya kapa.)

¹⁹ Womi Paradhesini wu na tsakisa. Ethu tepo yatshavbo hi na vbweta guti vathu nyo khaguri hi bwe hi tsakeya thumo hi na wu girago. Gu diga satshavbo, tshigu ni tshigu hi na si kodza guti gwadi Papayi wathu wa ndzadzini hi bwe hi tsaka khesi a hi ningidego. Hi na ba hiri ni silo nya singi gasi gu hevbula khuye ni esi a si vangidego. Tepo hi na yago hi vbanya khu tepo nyo laphe, lihaladzo lathu khu Nungungulu li na engedzeya gu dandra. Ethu hi ngu bonga ngudzu Jehovha ni Jesu kholu va nga hi ninga gutumba nya gu vbanye kala gupindruga Paradhesini!