Siwudziso Sa Valeri

Tepo Dhavhidhe a nga lova malito ma gu romo umo ga Ndzimo 61:8, uye a di khuye a na rungudza lina la Nungungulu “kala gupindruga,” ina isoso si di gu thula gu khiso uye kha na ngafa?

Ahihi. Esi Dhavhidhe a lovidego si diri lisine.

Wona esi uye a lovidego umo nya livhesi leli ni mambe mavhesi: “Nyi na rungudza lina lago kala gupindruga, litshigu ni litshigu nyi landrisa sisambanyo sangu.” “Nyi na gu bonga PFHUMU Nungungulu wangu, khu monyo wangu watshavbo.” “Nyi na dhumisa lina lago kala gupindruga.” — Ndzi. 61:8; 86:12; 145:1, 2.

Tepo Dhavhidhe a nga lova malito yaya, uye kha nga ba a pimisa gu khuye gima kha na ngafa. Uye a di gu dziti gu khuye Jehovha a di gu ganede gu khuye vathu va di hadzi gufa khu kotani nya gighoho, nigu gambe Dhavhidhe a di gu dziti gu khuye a diri gighohi. (Gen. 3:3, 17-19; Ndzi. 51:4, 5) Uye a di gu dziti gu khuye ambari vama va nga ba va tsakedwa khu Nungungulu nya nga Abrahama, Isaque ni Jakobe va di fude. Nigu Dhavhidhe a di gu dziti gu khuye a nuye a nafa. (Ndzi. 37:25; 39:4) Ganiolu, malito hi ma manago umo ga Ndzimo 61:8, ma di gu yeyedza gudogoreya ni gu dzi emiseya gwaye nya gu dhumise Nungungulu kala gupindruga, iso si thulago gu a mu thumeya ndrani nya womi waye.— 2 Sam. 7:12.

Dhavhidhe dzitepo nya dzingi a lovide manigano ni esi si giregidego womini gwaye, kha nga si yeyedzwago umo ga Ndzimo 18, 51, ni 52. Umo ga Ndzimo 23 Jehovha a gu tshamuseya Dhavhidhe kha nga muhavisi oyu a nigago sileletelo, tshivba ni wuthavelo. Dhavhidhe a diri muhavisi. Nigu, uye a di gu vbweta gu thumeya Nungungulu “matshigu yatshavbo nya gu vbanya [gwaye].” — Ndzi. 23:6.

Dundruga gu khuwe satshavbo esi Dhavhidhe a lovidego a di leletedwa khu Jehovha gasi gu a lova. Esi a lovidego si di gu pata siprofeto si nga hadzi gu tadzisega mindru watshigu. Khu giyeyedzo, umo ga Ndzimo 110, Dhavhidhe a lovide khu tepo khiyo muni waye a nga hadzi “khala khu nyamudye ga [Nungungulu]” ndzadzini a bwe a hakha tshivba nya yikhongolo. Gasi a yi rini? Gasi gu fuvisa valala va Nungungulu ni gu “tsayisa vathu nya mayigo” omu mafuni. Dhavhidhe a diri kokwe wa Jesu oyu a gu Mesiya, oyu a nga hadzi gu fuma gukhugeya ndzadzini a bwe a khala “muphasi nya mhamba kala gupindruga.” (Ndzi. 110:1-6) Jesu a ganede gu khuye giprofeto gi manegago umo ga Ndzimo 110 gi di hadzi gu tadzisega mindru watshigu. — Mat. 22:41-45.

Jehovha a leletede Dhavhidhe gu lova maningano khu tepo yaye ni tepo a na wuswago mindru watshigu gasi gu thumeya Jehovha kala gupindruga. Khu kharato, Ndzimo 37:10, 11, 29 yi thumisidwe ga tepo yi nga lowa nigu yi na thumiswa gambe mindru watshigu. Nigu mavhesi yaya ma tadzisegide ga dzitepo dza gale tigoni ga Israyeli, nigu ma na tadzisega mindru watshigu tepo Nungungulu a na tadzisago situmbiso saye. — Wona ndrimana 8 omu ndrima yi gu khiyo: “U na ba uri ni eni Paradhesini” umo nya Mukhedziseyi wowu.

Ndzimo 61:8 ni mambe mavhesi nyo fane ma yeyedza gu khayo Dhavhidhe a di gu vbweta gu dhumisa Jehovha, Israyeli wa gale na sifi. Nigu ayo ma gu yeyedza gu khayo Dhavhidhe a na gira isoso mindru watshigu tepo Jehovha a na mu wusago a vbanya gambe.