Ginani hi gi hevbulago khu silewugiso sa Jesu?

1. Tshamuseya edzi Jesu a giridego khidzo gilewugiso gyaye nyo pheye.

NGA DUNDRUGEYA khesi si giregidego guvbeyani nya myaga nya 29 matshigoni yathu, tepo Jesu a nga pheya thumo waye nyo tshumayele. Jesu na romo thumoni waye ni vapizane nyo khaguri a di ranwa gasi gu hongola mutshadhutuno Khanani, ga alidheya nyo khaguri vbafuvbi ni lidhoropa la Nazareta avbo a velegidwego Jesu. Mariya a di gu phasedzeya avbo nyo khathaleyi vapfhumba kholu uye a diri pari ya va mune ndranga. Ganiolu, tepo gi nga ba gi gimbiya gipfhitsa yi di vbeya vinyu, nigu esi si di hadzi tshonegisa vamune ndranga ni patwa wu nga ba wu tshadha.b Kha nga olu vapfhumba va nga ba vari vangi ngudzu, Mariya a di dzegeya gu embeya gyanana gyaye gu khuye: “Va mwalo [vinyu]” nyo eneye. (Joh. 2:1-3) Ginani Jesu a giridego? Uye giride gilo nyo samadzise ngudzu. A di vbindrugedza mati ma khala vinyu nya yadi. — Joh. 2:9, 10.

2-3. a) Jesu a thumiside kharini tshivba yaye nyo gire silewugiso? b) Hi nga phasega kharini khu gu hevbula khu silewugiso sa Jesu?

² Tepo a nga ba a romo thumoni waye nyo tshumayele, Jesu a giride gambe simbe silewugiso.c Uye a thumiside tshivba a nga ba ari nayo nyo gire silewugiso gasi gu phasa vathu nya vangi. Khu giyeyedzo, ga silewugiso sivili a giridego uye a hodziside 5000 vama khu gu landreya a hodzisa 4000 vama vatshavbo va gira 27 000 nya vathu gupata vanyamayi ni sanana si nga ba si romo vbale. (Mat. 14:15-21; 15:32-38) Ga siemo sesi sa sivili Jesu gambe hawulugiside vadwali nya vangi. (Mat. 14:14; 15:30, 31) Nga dundrugeya edzi gitshungu gile nya gikhongolo gi dzipwidego khidzo khu gu wona Jesu na gu hawulugisa vathu ni gu va hodzisa.

³ Muhuno, hi nga hevbula nya singi khu silewugiso esi Jesu a giridego. Avba nya ndrima yeyi, hi na bhula khedzi silewugiso soso si nga tiyisago khidzo gukhodwa gwathu. Khu gu landreya, hi na wona edzi hi nga pimedzeyago khidzo gu dzi nogisa ni gu pweya-wusiwana ogu Jesu a gu yeyedzidego tepo a nga gira silewugiso.

ESI HI NGA SI HEVBULAGO KHU JEHOVHA NI JESU

4. Silewugiso sa Jesu sa gu hi phasa gu tiyisa gukhodwa gwathu ga mani?

⁴ Silewugiso sa Jesu kha si hi hevbudze basi gu tiyisa gukhodwa gwathu gwaye, ganiolu khu Papayi waye gambe. Kholu Jehovha khuye gifefe nya nya tshivba eyi Jesu a yi thumisidego gasi gu gira silewugiso. Libhuku la Mithumo 10:38 la gu hi embeya gu khilo: “Nungungulu a di tadza khu tshivba nya Liphuvbo nya Guage Jesu wa Nazareta uye a nga gimbilago malangani yatshavbo, na gu gira silo nya sadi ni gu hawulugisa vathu vatshavbo va nga bani va gu saniswa khu Sathane, kholu Nungungulu a diri ni uye.” Dundruga gambe gu khuwe satshavbo esi Jesu a ganedego ni gu gira gupata ni silewugiso a giridego, si di gu yeyedza edzi Papayi waye a pimisago khidzo ni edzi a dzipwago khidzo. (Joh. 14:9) Hongoleni hi wona silo siraru hi nga si hevbulago khu silewugiso sa Jesu.

5. Ginani gi kutsidego Jesu gu gira silewugiso? (Matewu 20:30-34)

⁵ Nyo pheye, Jesu ni Papayi waye va ngu hi haladza ngudzu. Tepo Jesu a nga ba a romo mafuni, uye a yeyedzide gu khuye a ngu haladza vathu khu gu thumisa tshivba yaye nyo gire silewugiso gasi gu phasa vathu va nga ba va tshaniseka. Ga giemo nyo khaguri, sikhumo sivile si mu lombide giphaso. (Leri Matewu 20:30-34.) Wona nya gu khuwe Jesu “a di va pweya,” khavbovbo a va vbanyisa. Lito li vbindrugedzidwego khu Gigreki “gu pweya”, la gu thula gu pweya-wusiwana gu khugeyago monyoni. Gu pweya-wusiwana gu khugeyago monyoni khugo gu kutsidego Jesu gu ninga gilo nyo hodze vathu a bwe a vbanyisa mwama moyo a nga ba a dwala khu sokono. (Mat. 15:32; Marko 1:41) Ethu hi nga tiyisega gu khethu Jehovha Nungungulu nya “wuhindzi nya wukhongolo,” ni gyanana gyaye va ngu hi haladza ngudzu nigu avo va ngupwa guvbisa tepo va hi wonago na hi gu tshaniseka. (Luka 1:78; 1 Ped. 5:7) Avo va virede khu maho nyo fuviye guta fuvisa satshavbo si hi vangeyago sigaradzo.

6. Nungungulu ningide tshivba Jesu nyo gire ginani?

⁶ Nya wuvili, Nungungulu a ningide tshivba Jesu nyo lulamise satshavbo sigaradzo sa vathu. Tepo Jesu a nga ba a gira silewugiso, uye a yeyedzide gu khuye uye a na lulamisa sigaradzo satshavbo esi ethu hi ngu mba si kodza gu si lulamisa. Khu giyeyedzo, uye a na ni tshivba nyo vbedze sigaradzo hi si manago khu kotani nya olu hi nga thapedwa khu gighoho. Gupata madwali ni gufa. (Mat. 9:1-6; Rom. 5:12, 18, 19) Avbo nya silewugiso saye, Jesu yeyedzide gu khuye a na hawulugisa madwali “nya mafumbo yatshavbo” ni gu wusa avo va fudego. (Mat. 4:23; Joh. 11:43, 44) Uye gambe a na ni tshivba nyo woneleye dziphuvbo nya dzikhongolo ni gu tutumisa maphuvbo nyo vbivbe. (Marko 4:37-39; Luka 8:2) Si ngu hi tiyisa ngudzu guti gu khethu Jehovha ningide tshivba yeyi gyanana gyaye.

7-8. a) Silewugiso sa Jesu sa gu hi gira hi tiyisega khu ginani? b) Gilewugiso muni u dogoreyago gu ta gi wona mafuni nya maphya?

⁷ Nya wuraru, ethu hi nga tiyisega gu khethu iso hi ganeyago khu Mufumu wa Nungungulu si na tadzisega. Silewugiso esi Jesu a giridego tepo a nga ba a romo mafuni sa gu hi hevbudza gu khiso a na gira nya singi guvbindra esi a giridego, kholu uye pfhumu nya Mufumu wa Nungungulu. Hongoleni hi wona esi si na giregago nugunugu tepo Jesu a na fumago mafuni. Ethu hi na mana womi nya wadi kholu Jesu a na vbedza madwali ni silo satshavbo si tshanisago vathu. Gima kha hi na ngafa gambe khu ndzala mwendro gu tshaniseka khu kotani nya dzimhango nya tumbunugo. (Isa. 33:24; 35:5, 6; Gutu. 21:3, 4) Ethu hi na tsaka ngudzu khu gu wona sigodwa sathu na si gu wuswa khu “marowoni.” (Joh. 5:28, 29) Gilewugiso muni u gi vireyago gu ta gi wona mafuni nya maphya?

⁸ Tepo Jesu a nga ba a gira silewugiso a di gu yeyedza gu dzi nogisa ni gu pweya-wusiwana a gu makhalelo hi yedego gu ma pimedzeya. Hongoleni hi wona siyeyedzo sivili, ganiolu gupheya hi na wona matimo ma ganeyago khu mutshadhu wu giregidego Khanani.

ESI HI NGA SI HEVBULAGO KHU LISIMA NYA GU DZI NOGISE

9. Ginani Jesu a giridego mutshadhutuno? (Joh. 2:6-10)

⁹ Leri Johane 2:6-10. Tepo yi nga vbeya vinyu mutshadhutuno, ina Jesu a di gurumedzwa gu gira gilogyo? Ahihi. Gimwalo giprofeto gimwegyo gi ganedego gu khiyo Mesiya a di hadzi gu gira gilewugiso nyo gire vinyu. Ganiolu, nga dundrugeya edzi u nga hadzi dzipwa khidzo ya gu tshuka yi vbeya vinyu mwendro gilo nya lisima mutshadhutuno gwago? Jesu a di va pweya-wusiwana kholu kha nga ba a vbweta gu khuye va mune ndraga, ngudzungudzu patwa wu nga ba wu tshadha wu thega dzitshoni khu gu ba yi vbede vinyu. Kha nga si khumbugidwego gupheyani nya ndrima yeyi, uye a di gira gilewugiso. Uye a di vbindrugedza 390 dzilitru nya mati ma khala vinyu nya yadi. Adzina saye uye giride vinyu nya yingi nyo bwe yi tshala gasi yi ta thumiswa ga sipfhitsa si nga hadzi landreya mwendro gu rengisa gasi gu mana dzitshapawu nyo phase patwa wule wu nga ba wu tshadha. Khu lisine, patwa wule wu bongide ngudzu khesi Jesu a giridego.

10. Silo muni nya lisima si gomogo umo nya matimo ma khumbugwago umo ga Johane gipimo 2? (Wona fotu.)

¹⁰ Hongoleni hi wona silo nyo khaguri nya lisima si gomogo umo nya matimo ma khumbugwago umo ga Johane gipimo 2. U tugude gu khuwe Jesu khandruye a nga theya mati umo nya dzijara? Jesu a di embeya sithumi gasi gu thedzeya mati umo nya dzijara kholu kha nga ba a vbweta gu dzi yeyedza. (Mavhesi 6 ni 7) Nigu hwane nya gu ba a vbindrugedzide mati ma khala vinyu, Jesu kha hongola uye mune a ya ningeya vinyu ga muthangeyi nya gipfhitsa. Hwane nya isoso, uye a di lomba gu sithumi si gira isoso. (Livhesi 8) Jesu kha dzi khusedza khu gu ba a giride vinyu ambari gu embeya vale va nga ba va romo mutshadhutuno gu khuye: ‘Lingani vinyu nyi nga gira.’

11. Ginani hi nga gi hevbulago khu gilewugiso gya Jesu?

¹¹ Ginani hi nga gi hevbulago khu gilewugiso gya Jesu nya gu vbindrugedzi mati ma khala vinyu? Ho hevbula khu lisima nya gu dzi nogise. Jesu kha dzi khusedza khu gilewugiso a giridego, nigu uye gima kha dzi khusedza khu satshavbo a giridego. Wulangani nya isoso, uye a di gu dzi nogisa nigu tepo yatshavbo a di gu ninga wuzundzo Papayi waye. (Joh. 5:19, 30; 8:28) Ha gu pimedzeya Jesu khu gu dzi nogisa kha hi na nga dzi khusedza khu satshavbo hi girago. Ni gevbini hi girago thumoni ga Jehovha kha hi yeli gu dzi zundza khigyo, ganiolu hi yede gu bonga Nungungulu khu lithomo hi gu nalo nya gu mu thumeyi. (Jer. 9:23, 24) Hongoleni hi ningani wuzundzo Jehovha wu mu fanekeyago. Kholu ethu gima kha hi na nga si kodza gu gira silo nya sadi nya mba phasedzedwa khu Jehovha.— 1 Kor. 1:26-31.

12. Khu yevbini yimbe ndziya hi nga pimedzeyago khiyo gudzinogisa ga Jesu? Tshamuseya.

¹² Wona yimbe ndziya hi nga pimedzeyago khidzo gudzinogisa ga Jesu. Dundrugeya khesi: Lidhota limwedo la gu phasa muphasedzeyi moyo nya libandla gasi gu dongiseya ganelo yaye nya gu pheye ya guagani. Khu kotani nya olu a phasidwego khu Lidhota lile, ndriyathu wule a vega ganelo nya yadi libandlani nigu vatshavbo va tsakiswa khiyo. Hwane nya mitshangano, ndriyathu moyo a embeya lidhota lile khuye: ‘Ndriyathu wule a vegide ganelo nya yadi.’ Ina lidhota lile li yede gu ganeya gu khilo: ‘Lisine, ganiolu eni nyi vbedzide tepo nya yingi na nyi mu phasa gu dongiseya ganelo yile.’ Mwendro li yedi gu dzi nogisa li ganeya gu khilo ina: ‘A vegide ganelo nya yadi, eni nyi ngu dzipwa matshandza khuye.’ Tepo hi dzi nogisago ethu kha hi na nga vbweta gu zundzwa khesi hi giredego vambe. Hi ngu tsakiswa khu guti gu khethu Jehovha a ngu ninga lisima satshavbo hi girago. (Fananisa ni Matewu 6:2-4; Hebh. 13:16) Khu lisine, hi na tsakisa Jehovha tepo hi pimedzeyago edzi Jesu a yeyedzidego khidzo gu dzi nogisa. — 1 Ped. 5:6.

ESI HI NGA SI HEVBULAGO KHU LISIMA NYA GU YEYEDZI PWEYA-WUSIWANA

13. Ginani egi Jesu a gi wonidego tepo a nga vboha vbamwanyatuno nya lidhoropa la Nayimi, nigu ginani egi uye a giridego? (Luka 7:11-15)

¹³ Leri Luka 7:11-15. Dundrugeya khesi si giregidego ndrani nya thumo wa Jesu. Uye a di endra a hongola Nayimi dhoropani ga Galileya vbafuvbi ni Sunami, avbo muprofeti Elizewu a nga wusa gyanana gya muthu nyo khaguri 900 myaga hwane. (2 Dzipf. 4:32-37) Tepo Jesu a vbohago vbamwanyatuno a gu wona vathu na va gu duga khu dhoropani na va gu hongola malituno. Gi diri giemo nyo garadze ngudzu, nigu nyamayi wule a di gu fedwe khu gyanana gyaye nya gimwegyo. Ganiolu, nyamayi wule a diri mwalo enga kholu vathu nya vangi va dhoropani va diri naye gasi gu mu bangaladza. Jesu a di va emisa a bwe a gireya gilo nyo samadzise nyamayi wule, a gu wusa gyanana gyaye. Ga silewugiso siraru nya guwuswe ga ava vafudego, egi khigyo nyo pheye gi tshamusedwego gwadi umo nya dziivhangeli.

14. Gilo muni nya lisima gi gomogo umo nya matimo ma khumbugwago ga Luka gipimo 7? (Wona fotu.)

¹⁴ Wona silo nyo khaguri nya lisima hi si manago umo nya matimo nya gipimo 7 nya libhuku la Luka. Wona gu khuwe Jesu na “wone” mamayi wule a nga fedwa, uye “a di mu pwela gisiro” (Livhesi 13) Khu kharato, adzina Jesu a pwede-wusiwana mamayi wule tepo a nga mu wona na gu liya na hongola aya dzinga gyanana gyaye. Jesu kha mu pweya basi mamayi wule, uye a mu yeyedzide pweya-wusiwana. Jesu ganede khu lito nyo rule ni mamayi wule a nga fedwa a mu embeya khuye: “U nga lili.” Khu gu landreya, uye a di mu phasa. Uye a di wusa gyanana gile a bwe a gi “ningela ga mayi waye.” — Mavhesi 14, 15.

15. Ginani hi nga gi hevbulago khu gilewugiso gya Jesu?

¹⁵ Ginani hi nga gi hevbulago khu gilewugiso gya Jesu nya gu wuse gyanana gya nyamayi nyo khaguri? Ha gu hevbula gu yeyedza pweya-wusiwana ga avo va nga fedwa khu sigodwa sawe. Lisine gu khethu hi mwalo makodzelo nyo wuse avo va fudego gufana ni Jesu. Ganiolu, gu fana ni Jesu ethu hi nga khala na hi dongide gasi gu yeyedza pweya-wusiwana ava va fedwego khu sigodwa sawe. Hi nga gira isoso khu gu ganeya mwendro gu gira silo si nga va phasago ni gu va thaveleya.d (Mav. 17:17; 2 Kor. 1:3, 4; 1 Ped. 3:8) Ni sevbini u girago mwendro gu ganeya si nga va tiyisa ni gu va thaveleya ngudzu.

16. Kha nga si yeyedzwago avba nya fotu, ginani u gi hevbulago khu giyeyedzo gya mamayi nyo khaguri a nga fedwa khu gyanana gyaye?

¹⁶ Wona giyeyedzo gegi. Ga myaga yi nga vbindra, tepo ndriyathu moyo nya nyamayi a nga ba a embeleya mitshanganoni nya libandla a di wona mamayi moyo na liya. Ndzimo yoyo yi di gu ganeya khu guwuswa ga ava va fudego, nigu mamayi yoyo a di ngari gu fedwa khu gyanana gyaye nya gyagadzana. Ndriyathu nya nyamayi tepo a nga wona mamayi wule, a di ya mu abrasari a bwe a vbedzisa gu embeleya ndzimo naye. Mamayi wule a ganede gu khuye: “Eni nyi di dzipwa na nyi gu haladzwa ngudzu khu vandriyango.” Uye a tsakide ngudzu khu gu ba a hongode mitshanganoni ga litshigu lile. Uye a di ganeya gambe gu khuye: “Salawuni nya Mufumo khumo hi nga manago umo giphaso hi gi vbwetago.” Hi nga tiyisega gu khethu Jehovha a ngu wona ni gu ninga lisima ni gevbini hi girago gasi gu yeyedza pweya-wusiwana vale va fedwego khu sigodwa sawe, “avo mihefemulo yawe yi khuvekidego.” — Ndzi. 34:18.

TIYISA GUKHODWA GWAGO

17. Ginani hi gi hevbudego avba nya ndrima yeyi?

¹⁷ Ethu hi nga tiyiswa ngudzu tepo hi hevbulago khu matimo nya Bhibhiliya ma ganeyago khu silewugiso sa Jesu. Iso si ngu hi hevbudza gu wona gu khethu Jehovha ni Jesu va ngu hi haladza ngudzu nigu Jesu a na ni tshivba nya gu lulamise sigaradzo nya vathu. Nigu ethu hi nga tumba situmbiso ni makategwa hi na resedwago khu Mufumo wa Nungungulu. Tepo hi hevbulago khu matimo yaya, hi nga dundrugeya khedzi hi nga pimedzeyago khidzo makhalelo ya Jesu. Adzina saye u nga gira longoloko nya gu gire gihevbulo nya muthu enga, mwendro gu gira wukhozeyi nya ndranga gasi gu hevbula khu simbe silewugiso esi Jesu a giridego. Wona esi u si hevbulago u bwe u bhuleya vambe esi u si hevbudego. Wa gu gira isoso, u na si kodza gu manega ni mabhulo nya mangi ma tiyisago vambe.— Rom. 1:11, 12.

18. Ginani hi na bhulago khigyo avba nya ndrima yi landreyago?

¹⁸ Nari vbafuvbi ni gu vbedza thumo waye nyo tshumayele, Jesu giride gilewugiso nya wuraru nya gu wuse vathu khu gufani. Ganiolu, gilewugiso gegi gi di gu hambanide ni simbe. Kholu a di wusa pari yaye nya gu golege ngudzu. Ginani hi nga gi hevbulago khu matimo ma ganeyago khu gilewugiso egi Jesu a giridego? Nigu hi nga tiyisa kharini gutumba gwathu khu gu wuswa ga ava va fudego? Ndrima yi landreyago yi na hlamula siwudziso sesi.