U Ngo Dundruga?

Ina u leride gwadi dzindrima nya Revhista Mukhedziseyi nya mwaga wowu? Abari kharato, zama gu hlamula siwudziso si landreyago:

Sa gu thula ginani gu ‘vbindrugedza mapimo yanu’? (Rom. 12:2)

Sa gu thula gu mba gira basi silo nya sadi. Sa gu pata gambe gu dzi gevisisa edzi hi gu idzo khu ndrani ni gu gira gu vbindrugedza gu vbwetegago gasi gu hi engisa milayo ya Jehovha khavba hi si kodzago khavbo. — w23.01, dzipaj. 8-9.

U nga khala kharini muthu nyo dinganiseye tepo u wonago sigiro nya litigo leli?

Ethu hi ngu vega gupima avba nya sigiro nya litigo leli si tadzisago giprofeto nya Bhibhiliya. Wulangani nyo dhumbe gu khethu gyo tadzisega giprofeto, a gu silo si na hi hambanisago, hi yede gu dzi seketeya avba nya mahungu ma dusidwego khu hengeledzano ya Jehovha. (1 Kor. 1:10) — w23.02, paj. 16.

Gu hambana muni gu gomogo avbo nya gu bhabhatiswe ga Jesu ni gu bhabhatiswa ga valandreyi vaye?

Kha si nga ba si vbwetega gu Jesu a dzi hendzeledza ga Jehovha kholu uye a dugede khavba nya lihundzo li nga ba li giride gidzumeledzwano ni Nungungulu. Uye a di gu vbelede nigu gima kha ghoha. Kha sa nga ba si vbwetega gu Jesu a dzi laya khu sighoho saye. — w23.03, paj. 5.

Hi nga phasa kharini vambe gu hlamula mitshanganoni?

Hi nga ninga lithomo vambe gasi va ningeya mihlamulo yawe khu gu hi ningeya mihlamulo nyo role. Hi nga gira isoso khu gu potsa gu ganeya silo nya singi. Kholu wa gu hlamula yatshavbo paragrafu, vambe kha va na nga mana gilo nyo hlamule. — w23.04, paj. 23.

‘Ndziya nya Guage’ yi khumbugwago omu ga Isaya 35:8 ya gu thula ginani?

Ndziya yeyi nya gu fananise ya gu thula ndziya eyi Vajudha va nga yi thumisa gukhugeya Bhabhiloni kala tigoni gwawe nya mavelego. Muhuno ke ya gu thula ginani? Hwane nya myaga nya yingi na wu si vbohi mwaga nya 1919, ma di girwa malulamiselo nya gu vbindrugedzeye ni gu ghandla Dzibhibhiliya gumogo ni mambe mabhuku. Vathu va Nungungulu va gu gimbiya omu nya “Ndzila nya guage,” yi va yisago paradhesini nya liphuvbo omu va na manago makategwa ndrani nya Mufumo wa Nungungulu. — w23.05, dzipaj. 15-19.

Wusingalagadzi wu gomogo omu ga Mavingu gipimo 9 wa gu ganeya khu vanyamayi muni nyo fananise?

Libhuku la Mavingu la gu ganeya khu “nyamayi nya gipumbu,” a ranago vathu “phalani nya vafi.” Nigu nyamayi a emeyago “guti nya lisine,” a gu rana vathu ‘ndziyani nya mapimo’ ni gu mana womi nyo tsakise. (Mav. 9:1, 6, 13, 18) — w23.06, dzipaj. 22-24.

Nungungulu yeyedzide kharini gudzinogisa ni pweya-wusiwana tepo a nga ninga wusingalagadzi Loti?

Jehovha a di embeya Loti gasi gu fuluga khu Sodhoma aya sihala sigomoni. Tepo Loti a nga lomba gu thaveya Zowari, Jehovha a di mu dzumeleya. — w23.07, paj. 21.

Mwangadzi a nga gira ginani mwama waye a gu ba a sixitiri pornografia?

Uye kha yeli gu dzipwa nandru. Simama gu hidzimeya ga Jehovha khu gu gombeya, gu hevbula ni gu dundrugeya khesi u hevbudego. U nga phasa pari yago nya wugadzi gu potsa gu khaleya gu thumisa mitshini mwendro gu manega ga malanga si na mu vbevbugeyago gu sixitiri pornografia. — w23.08, dzipaj. 14-17.

Tepo hi girwago siwudziso maningano khu gukhodwa gwathu hi nga khala kharini vathu nyo dzi vbevbugise?

Siwudziso hi girwago, si na hi phasa guti esi vambe va pimisago khethu ni esi va khathalago khiso. Ha gu gira isoso, hi na ba hi dongide gu hlamula muthu nyo khaguri khu ndziya nyo vbevbuge. — w23.09, paj. 17.

Hi nga hevbula ginani khu giyeyedzo gya Mariya maningano ni gu mana tshivba?

Tepo Mariya a nga tugula gu khuye a di hadzi gu khala mamayi wa Mesiya, uye a tiyisidwe khu vambe. Ngilozi Gabriyeli ni Elizabheti va tiyiside Mariya khu gu thumisa Milowo. — w23.10, paj. 15.

Jehovha a gu hlamula kharini milombelo yathu?

Jehovha a gu tumbisa gu engiseya milombelo yathu nigu a gu wona edzi iyo yi gimbeleyanago khidzo ni makungo yaye. (Jer. 29:12) Jehovha a ngu hlamula milombelo nyo fane khu dzindziya nyo hambane, ganiolu tepo yatshavbo a na hi phasa. — w23.11, dzipaj. 21-22.

Varoma 5:2 wa gu ganeya khu “gutumba,” ganiolu khu ginani ugo gu khumbugwago gambe omu nya livhesi 4?

Muthu tepo apwago mahungu nya yadi, a nga mana lithomo nya gu mane gutumba nya gu vbanye paradhesini mafuni. Ganiolu, tepo a tshanganago ni sigaradzo, a si timiseya a bwe a dzipwa na tsakedwa khu Nungungulu, khu lisine gutumba gwaye gwa gu dandra gu bwe gu khala nya lisine. — w23.12, dzipaj. 12-13.