Khu mani Ngilozi nya yikhongolo Migeli?

Hlamulo nya Bhibhiliya

Dzi tshetshe nya dzingi dzi ngu rana Migeli kha nga “Migeli nya guage,” so wonegisa gu khatsi Jesu a di gu ranwa khu lina lolo na a si guti mafuni ni hwane nya gu ba na dzude mafuni.a Bhibhiliya yari khiyo Migeli a dwanide ni Sathane hwane nya gu Mosi na fude nigu a phaside Ngilozi mweyo gu ningeya mahungu ga muprofeti Dhaniyeli. (Dhaniyeli 10:13, 21; Judha 9) Ina Migeli gwa gu thudwa — “oyu a fanago ni Nungungulu?” — Uye a ngu yedwa khu lina leli kholu uye a gu seketeya mufumo wa Nungungulu ni gu dwana ni valala vaye — Dhaniyeli 12:1; Gutuledwa 12:7.

Wona gu khu ginani hi nga ganeyago gu Jesu Ngilozi nya yikhongolo Migeli.

• Migeli “Ngilozi nya yikhongolo.” (Judha 9) Lina “Ngilozi nya yikhongolo” gwa gu thudwa “muthangeyi nya dzi Ngilozi”. Ga dzitepo dzimbili malito yaya ma manegago omu nya Bhibhiliya gwa gu thudwa muthu moyo, isoso sa gu vega guagani gu Ngilozi mweyo yi ranwago kharato. Limwedo nya livhesi la gu ganeya gu khilo, hwane nya gu ba a wusidwe, Pfhumu Jesu “a na releya khu ndzadzini a ta rana khu lito nya ngilozi nya yikhongolo.”(1 Vatesalonika 4:16) Jesu na ni “lito nya Ngilozi nya yikhongolo” kholu uye khuye Migeli, Ngilozi nya yikhongolo.

• Migeli a ngu thangeya dzingilozi nya dzingi. “Migeli ni dzingilozi dzaye va di dwana ni nyoga nya yikhongolo,” Sathane. (Gutuledwa 12:7) Migeli na ni tshivba nya yikhongolo omu gu khalago sivangwa nya liphuvbo, kholu a gu ranwa kha nga “ndruna nya mufumo” ni “moyo nya dzingilozi nya guhegule”. (Dhaniyeli 10:13, 21; 12:1) Malina yaya ma ngu vega ma guagani gu Migeli khuye “muthangeyi nya khongolo nya Dzingilozi dzatshavbo”, guya khesi a ganedego David E. Aune, a gu gihevbuli nya Novo Testamento.

  Bhibhiliya ya gu khumbuga lina la mumbe muthu a gu na ni tshivba nya gu thangeye Dzingilozi nya dzingi. Iyo ya gu tshamuseya Jesu ndzadzini ‘ni dzingilozi dzaye nya tshivba nari khu niloni wu khondrago, avbo uye a na resago gu tsayisa’.(2 Vatesalonika 1:7, 8; Matewu 16:27) Jesu “ningidwe gu fumeya dzingilozi, wufumu ni dzitshivba”. (1 Pedro 3:21, 22) Na si si pwisisegi gu Nungungulu a emisa Jesu ni Migeli avbo nya gikhalo gya gimwegyo gasi va khala vathangeyi vavili va si pwanigo. Vbavbandze nya isoso, malina Jesu ni Migeli ma gu thula muthu wa moyo.

• Migeli “a na khuga a ema” ndrani “nya tshanisa nya yikhongolo” nya gu gima yi si manegi. (Dhaniyeli 12:1) Ga libhuku la Dhaniyeli, malito ma gu khayo gu “ema” dzitepo nya dzingi la gu thumiswa gasi gu thula pfhumu nyo khaguri yi khugago ‘yi ema’ gasi yi gira thumo nya guhathege. (Dhaniyeli 11:2-4, 21) Jesu Kristo, a ranwago kha nga “Lito la Nungungulu”, a na gira thumo nya guhathege kha nga “Pfhumu nya dzipfhumu”. Uye a na fuvisa vatshavbo valala va Nungungulu nigu bwe a vhikeya vathu vaye. (Gutuledwa 19:11-16) Jesu a na gira isoso ndrani nya “tshanisa nya yikhongolo nya gu gima yi si manegi” — Matewu 24:21, 42.