Nya wu 7: Mavbanyelo nya yadi

SO THULA GINANI

Mavbanyelo makhalelo aya muthu a hathago gu vbanya khayo. Khu giyeyedzo, ina u ngu dzi garadzeya gu tumbega ga silo satshavbo? Nya mba kanakana, u gu dzina gu hevbudza makhalelo yaya sanana sago.

U ngu dzina gu hevbudza sanana sago guti esi nya sadi ni esi nya gu vivbe. Khu giyeyedzo, si na ni lisima ngudzu gu thuma khu gu dzi garadza, khu gu tumbega ni gu khathala khu vambe. A gu makhalelo aya si kodzegago gu muthu a manega nawo na ngari gyanana.

LITSHINA NYA NAYO NYA BHIBHILIYA: “Hevbudza gyanana ndzila gi yelago gu yi landra, kholu, ambari gya gu gumba, gima kha gi na hambana nayo.” — Mavingu 22:6.

KHU GINANI SI GU NA NI LISIMA

Kha nga olu tekinolojiya yi andridego ngudzu, si gu vbwetega ngudzu gu manega ni mavbanyelo nya yadi. Mamayi nyo khaguri nyo pwani khu Karyn wari, khuye: “Mavbanyelo nya gu vivbe ma ngu manega tepo yatshavbo, omu nya telefoni mwendro omu nya komputadhori. Sanana sathu si nga sixtiri silo nyo vivbe na siri vbafuvbi gwathu.”

LITSHINA NYA NAYO NYA BHIBHILIYA: “Vathu nyo vidzwe . . . va thumisago makodzelo yawe nyo pimise gasi gu hambanisa silo nya sadi ni silo nya mba sadi.” — Vahebheru 5:14.

Gwadi gu dundrugeya khu vambe. Isoso so pata mavbanyelo nya yadi (nya nga gu ganeya gu khuwe “nyo lomba” ni “nyi bongide”) ni gu khathala khu vambe. A gu likhalelo si si vbevbugigo gu vathu va manega nalo, kholu va gu ninga lisima silo va gu naso nya nga telefoni mwendro komputadhori.

LITSHINA NYA NAYO NYA BHIBHILIYA: “Esi mu vbwetago gu khenu vathu va mi gireya, va gireyeni navo kharato.” — Luka 6:31.

GINANI U YEDEGO GU GIRA

Mavbanyelo nya yadi. Khu giyeyedzo, wugevesisi nyo khaguri wo ganeya gu khuwo vaphya nyo khaguri va ngu potsa gu hengeya malawo na va ngari sanana, khu gu ba va hevbudzidwe gwadi gu khavo mavbanyelo yoyo ma vivbide.

MAWONELO: Thumisa mahungu ya matshigwana yaya gasi gu pheya mabhulo maningano khu mavbanyelo. Khu giyeyedzo, mahungu ma gu ganeya gu khayo gu manegide wughevenga khu kotani nya gu nyenye vambe, u nga ganeya gu khuwe: “Si ngu thisa ngudzu esi vathu va girago kholu va nyenyego vambe. Wa gu pimisa gu khuwe ginani gi girago vathu va nyenya vambe?”

“Si ngu garadzeya ngudzu sanana gu hambanisa esi nya sadi ni esi nya gu vivbe, khu gu ba va si siti.” — Brandon.

Hevbudza sanana sago gu khathala khu vambe. Ambari sanana nya sidugwana si nga hevbuleya gu khiso “nyo lomba” mwendro “nyi bongide” ni gu khathala khu vambe. Libhuku li ganeyago khu gu sayisa nya sanana la ri khilo: “Tepo sanana si yago siti gu khiso si ngu gira gipandre ndrangani, xikwatuno, omu si vbanyago umo si na dzi garadzeya gu gira silo si phasago vambe, na siri esi si phasago iso basi.”

MAWONELO: Ninga sanana sago mithumo ya ndrangani, gasi si kodza guti gu khiso si na ni lisima gu thumeya vambe.

“Sa gu oloveya gu gira mithumo ya ndrangani na si ngari sanana, si na va vbevbugeya gu sayisa dzindranga dzawe tepo si na dandrago.” — Tara.