Giyeyedzo muni u nga vegeyago sanana sago?
GA VAVELEGI
Nya wu 8: Va vegeye giyeyedzo
SO THULA GINANI
Vavelegi va gu na ni giyeyedzo nya gyadi va gu vbanya khesi va si hevbulago. Khu giyeyedzo, u nga lindreyi gu gyanana gyago gi ganeya lisine nari gu a guta muthu ndrangani u si dzinigo gu bhula naye, wa gu oloveya gu gyi embeya gu khuwe: “Mu embeye gu khuwe nyi mwalo.”
“Vathu nya vangi va gu oloveya gu khavo: ‘gira esi nyi gu embeyago na siri esi nyi girago.’ Ganiolu, isoso kha si thumi ga sanana. Iso sa gu fana ni esponja, sa gu pimedzeya esi hi girago ni esi hi ganeyago, nigu kha si thavi gu hi embeya gu khiso ethu kha hi vbanyi khesi hi si hevbudzago.” — David.
LITSHINA NYA NAYO NYA BHIBHILIYA: “Uwe u tshumayelago gu khuwe “U ngabi,” u nguba?” — Varoma 2:21.
KHU GINANI SI GU NA NI LISIMA
Sanana ni vaphya va gu pimedzeya vavelegi vawe guvbindra vambe vathu gu pata ni dzipari dzawe. Esi so thula gu khiso, uwe muvelegi khuwe u gu romo ga giemo nya gyadi nya gu hevbudze sanana sago mavbanyelo nya yadi. Wa gu gira isoso, u na ba u vbanya khesi u va hevbudzago.
“U nga phindra-phindra silo sasimweso ga gyanana gyago, ganiolu gi si engisi. Ha gu tshuka hi phazama gumogo basi, hi si giri esi hi ganeyago gi na dzegeya gu si tugula. Sanana sa gu dzegeya gu vega gupima ga satshavbo hi girago, ambari ha gu dzi embeya gu khethu kha va si woni.” — Nicole.
LITSHINA NYA NAYO NYA BHIBHILIYA: “Wugengeyi wu tago khu vbatshani . . . kha wu pfhadzedzeyi.” — Jakobe 3:17.
GINANI U YEDEGO GU GIRA
Gevesisa mavbanyelo yago. Ginani u golago gu sixtiri? Ina u ngu vbanyisana gwadi ni mwama mwedro ni mwangadzi wago mwendro sanana sago? Khu vamani u oloveyago gu hagana navo? Ina u ngu khathala khu vambe? Ina u muthu u ninganedwago gu pimedzedwa khu sanana sago?
“Eni ni mwama wangu kha hi vbweti gu khethu sanana sathu si vbanya khu ndziya nyo hambane ni eyi hi vbanyago khiyo.” — Christine.
Lomba divalelo wa gu hosisa. Sanana sago si ngu dziti gu khiso kha wa vbeleya. Wa gu lomba gu divaledwa khu mwama mwendro mwangadzi wago ni sanana sago, u na vega giyeyedzo nya gyadi nya gutumbege ni gudzinogisa.
“Sanana sathu si yede gu hipwa na hi gu dzumeya sihoso sathu ni gu lomba divalelo. Ha gu mba gira isoso si na hevbula gu siha sihoso sawe.” — Robin.
“Kha nga vavelegi, sanana sathu si na ni guwegeleya nya gu hi pimedzeye, nigu hi nga si hevbudza khu giyeyedzo gyathu. Kholu tepo yatshavbo si ngu wona esi hi girago, nigu si nga hevbula silo nyo khaguri khu mavbanyelo yathu.” — Wendell.