Vbwetedzeya Guti Lisine

Gasi gigaradzo gyo khugeya hayi?

Gutala nya dzitepo gihatheya gyo khugeya omu nya malipha. Nga wona siyeyedzo sesi si landreyago:

Vapatrawu nyo khaguri va dzinide va khodwa gu khavo vanyamayi va mwalo khana nyo gire mithumo yi lombago wumeseri nyo khaguri, tshivba, ni wugengeyi nyo khaguri.
Vathu nya litigo nyo khaguri va ga lipheya vathu va tago khu limbe litigo khu gu khavo vo va beya mithumo yawe. Ndrani nya nayo nya vanazi, vaJudha va di singedzwa. Ganiolu ga tepo yeyi va di singedzwa gu pwani va di thesa economia ya Alemanha. Sigiro sesi sa sivili si giride gu vaJudha va tshaniseka khu gihatheya va nga ba va giredwa.
Vathu nyo khaguri vo pimisa gu khavo ni wevbini a gu na ni wulima nyo khaguri kha tsaki guvbanyani.

Vathu va khodwago mitsheketo nya ga eyi, va ngu tala gu manega ni siyeyedzo nyo khaguri gasi gu seketeya malipha yawe. Nigu vo pimisa gu khavo ni wevbini a gu mba dzumeleyana ni mapimo yawe a di dhadhavala.

Litshina nya nayo nya Bhibhiliya

“Monyo wa muthu nya mapimo, wa guvbweta guti.” — MAVINGU 15:14.

Litshina leli nya nayo lo hi hevbudza ginani? Ho mba pheya khu gu vbweta guti lisine, hi na gira silo khu ndziya nyo vivbe. Ho khodwa mitsheketo, hi si pheyi khu gu vbweta lisine, hi na tutumeya gu ganeya guvivba khu vathu gutshamba na gu romo.

Ina Bhibhiliya yi ngu hi hevbudza gu manega ni gihatheya?

Vathu nya vangi vari khavo Bhibhiliya yi ngu kutsa vathu gu manega ni gihatheya. Ahati iyo Bhibhiliya yari khiyo ginani?

Vathu vatshavbo vo dugeya wulanga wumowo: Nungungulu “tumbulugiside mahundzu yatshavbo nya vathu.” — Mithumo 17:26.
Nungungulu mwalo gihatheya: “Nungungulu kha hatheli vathu, gambe kha khedzi mafumbo, a gu tsakiswa khu muthu ni muthu a mu ningago githawo ni gu landra ndruda Yaye.” — Mithumo 10:34, 35.
Nungungulu o khedza monyo nya muthu, kha khedzi vbavbandze gwaye: “PFHUMU Nungungulu kha woni kha nga mawonelo nya vathu. Muthu a gu wona iso sa vbavbandze, aholu, PFHUMU Nungungulu a gu wona monyo.” — 1 Samuweli 16:7.a

a Bhibhiliya yo yeyedza gu khiyo lina la Nungungulu khu Jehovha.

Guti lisine si ngu phasa

Ha guti edzi vathu vovo va khadego khidzo khu lisine, kha hi na nga khodwa esi vambe vathu va ganeleyago khavo. Ha gu tugula gu khethu esi vathu va ganeleyago khu tsawa nyo khaguri nya vathu khandri lisine, kha hi na nga tutumeya gu khodwa esi va ganeyago.

Giyeyedzo nya lisine: Jovica (Bálcãs)

Jovica, hi ganedego khuye avbo nya dzindrima dzedzi, dandride na apwa vama va tigoni gwaye, dzinotisiya, ni dziprograma nya televhizawu na dzi gu tshepeta tsawana nyo khaguri nya vathu. Jovica wari khuye: “Nyi di va tshepeta ni gu va nyenya khu ndziya mweyo nya gu u si yi woni guvbanyani. Nigu nyi di gu dzi embeya gu kheni nyi na ni gighelo nyo va nyenye ni gu va tshepeta.”

“Ganiolu, tepo nyi nga ba nyiri wusotshwatunu, gu diri mwalo gu kheni nyi na bomba, nyi di yede gu vbanya ni gu thuma ni masotshwa nya tsawa wowo nya vathu. Khu gu gimbiya nya tepo, nyi diya nyi vati gwadi. Nyi pheya gu hevbula lidimi lawe ni dzimuzika dzawe. Nyi di pheya gu tsakiswa khu gu khala navo, nyi bwe nyi pheya gu va wona khu yimbe ndziya. Ganiolu, nyi ngu dziti gu kheni gihatheya gyangu gi nga tshuka gi wuya gambe. Khu kharato, nyo dzi garadzeya gu mba engiseya mahungu ma tshepetago vathu vovo. Gimbe gambe nyi girago gu mba sistiri dzivhidhiyu mwendro sithenga si va tshepetago. Nyi ngu dziti gu kheni gihatheya gi ngu gira muthu a zangareya ni gu nyenya vambe.”

Esi u yedego gu gira

Si nga gira vathu nya vangi va ganeya guvivba khu tsawa nyo khaguri nya vathu. Ganiolu dundruga gu khuwe khandri vatshavbo omu nya tsawa va khadego kharato.
U nga divali gu khuwe adzina khandri satshavbo u si tigo gwadi khu tsawa wowo nya vathu.
Zama gu vbwetedzeya lisine ga vathu mwendro mabhuku nyo tumbege.