Gira Wupari Ni vathu Vatshavbo

Gasi gigaradzo gyo khugeya hayi?

Ha gu dzi hambanisa ni vathu va tago khu wulanga hi gu mba wu tsakeya, gihatheya gyathu gi na dandra. Ha gu gira wupari basi ni vathu hi va wonago na va fana ni ethu, hi na wona mapimiselo yathu, magirelo yathu nya silo, ni edzi hi dzipwago khidzo monyoni na siri iso nya tshukwana guvbindra sa vambe.

Litshina nya nayo nya Bhibhiliya

‘Tulani myonyo yanu.’ — 2 VAKORINTO 6:13.

Litshina leli nya nayo lo hi hevbudza ginani? “Monyo” wathu gu nga thudwa gudzipwa, ni lihaladzo lathu. Ha gu haladza vathu hi fanago navo basi, monyo wathu wu na bangeleya kamo vbovbo. Gasi gu hi si giri isoso gu vbwetega hi gira wupari ni wevbini muthu hi hambanidego naye khu tshonge.

Gu gira wupari ni vathu nya dzimbe dzitshonge si nga hi phasa kharini?

Tepo hi tivanago ni vambe vathu, hi na pwisisa gu khethu khu ginani va girago silo khu ndziya nyo hambane ni ethu. Nigu tepo hi yago hi vati gwadi, hi na bwe hi divala ni gu khethu avo pha yimbe tshonge. Hi na pheya gu va ninga lisima, hi bwe hi tsaka ni gu liya navo.

Nga wona giyeyedzo gya Nazaré. A diri ni gihatheya khu vathu va nga ba vata khu mambe mayigo. A gu tshumuseya esi si mu phasidego: “Nyi khade tepo nyo laphe navo ni gu thuma navo. Nyi manide vathu nyo hambane ngudzu ni esi vambe va si pimisago khavo. Tepo u girago wupari ni vathu nya mambe mayigo, u na wona gu khuwe khandri vatshavbo va fanago, khavbovbo u na va haladza u bwe u va ninga lisima.”

Esi u yedego gu gira

Dzi ninge tepo nyo bhule ni vathu nya tshonge ni lidimi nyo hambane ni lago. Adzina u nga va

Lomba va gu bhuleya sidugwana khavo.
Rana mu ta hodza mwatshavbo.
Engiseya gwadi tepo va tshamuseyago matimo yawe gasi uti esi si gu sa lisima gwawe.

Wo dzi garadzeya gu pwisisa matshango nya esi va tshanganago naso, u na pwisisa gwadi makhalelo yawe nigu isoso si na gu phasa gu khala muthu nyo fane navo.

Giyeyedzo nya lisine: Kandasamy ni Sookammah (Canadá)

“Hi dandrede Dzoni khu tepo nya gihatheya nya dzitshonge (aparteide). Vathu nya tshonge nyo hambane ni vambe va di gurumedzwa gu ya vbanya khu gyawe, isoso si yade liphuvbo nya gihatheya nya dzitshonge. Kha ha nga ba hiri vatsungu, nigu vatsungu hi di gu va nyenya kholu va di gu hi wona nga vanyalendre. Khu tepo yoyo, kha ha nga ba hi si tugula gu khethu hi diri ni gihatheya. Ganiolu, hi vbedzide hi tugula gu khethu gi di hi thapede.”

“Gasi gu sigula likhalelo lolo khu monyoni, hi di pheya gu gira wupari ni vathu nya tshonge nyo hambabne ni eyi yathu. Tepo hi nga pheya gu hagana ni vatsungu, hi di tugula gu khethu kha ha nga ba hi hambanide ngudzu navo. Hi ngu emisana ni sigaradzo nyo fane.”

“Hi manide lithomo nyo hakhe patwa nya vatsungu ndrangani gwathu khu tepo nyo laphe. Hi tivanide gwadi navo. Khu gitepwana, hi di tugula gu khethu hatshavbo hi di gu fana nigu hi diri dzipari. Khavbovbo, hi di pheya gu wona vatsungu vatshavbo khu ndziya nya yadi.”