Khu ginani si gu na ni lisima guti gu khethu womo Muvangi?

U na tsaka ngudzu

BHIBHILIYA YO GANEYA GU KHIYO: “[Nungungulu a di] mi ninga ndzadzi a bwe a mi gira mu fuma ngudzu, a mi ninga guhodza nya gungi, a mi ninga gutsaka nya gukhongolo.” — Mithumo 14:17.

SO THULA GINANI: Satshavbo hi dzi buzago khiso muhuno mafuni momu siningwa sa Nungungulu. U na tsaka u bwe u bonga ngudzu khu guti gu khuwe siningwa sesi so yeyedza gu khiso Muvangi a ngu khatala ngudzu khuwe.

U na mana wusingalagadzi nya wadi

BHIBHILIYA YO GANEYA GU KHIYO: “U na guti gululama ni lisine, ni gu hevbula dzindzila dzatshavbo nya dzadi dzi vbwetegago.” — Mavingu 2:9.

SO THULA GINANI: Kha nga olu Nungungulu a gu Muvangi, a ngu siti gwati esi u si vbwetago gasi u tsaka. Tepo u hevbulago Bhibhiliya, u nati silo nya singi si na gu phasago womini gwago.

U na mana mihlamulo nya siwudziso sago

BHIBHILIYA YO GANEYA GU KHIYO: “[U na thava] Pfhumu Nungungulu gumogo ni gu Mu pima.” — Mavingu 2:5.

SO THULA GINANI: Guti gu khuwe Muvangi womo si na gu phasa gu mana mihlamulo nya siwudziso nya lisima, nya nga: “Khu yavbini makungo nya womi? Khu ginani hi tshanisekago? Ginani gi giregago tepo hi fago?” U na mana mihlamulo nya siwudziso sesi omu nya Bhibhiliya.

U na mana gutumba khu wumindru

BHIBHILIYA YO GANEYA GU KHIYO: “Kheni nyi matigo gwadi makungo nyi gu [nawo] khu enu, a ngu ganela Pfhumu Nungungulu; makungo yangu khya gu mi kategisa nasiri gu mi reselani dzimhango, makungo nya gu mi ningeni gitumbo ga matshigu ma nga gutago.” — Jeremiya 29:11.

SO THULA GINANI: Nungungulu a gu tumbisa gu khuye, mindru wa tshigu, a na fuvisa wuvivbi watshavbo, gu tshaniseka ni gufa. Tepo u tumbago situmbiso sa Nungungulu, gutumba gwago khu wumindru gu na gu phasa gu gutiya hwambo u emisana ni sigaradzo sa tshigu ni tshigu.