GIHEVBULO 16

I thumo muni wu girwago khu vaphasedzeyi nya libandla?

Muphasedzeyi nya libandla a phasedzeyago gu kabaniseya dzilivru — Myanmari

Muphasedzeyi nya libandla a vegago ganelo yi seketedwago omu nya Bhibhiliya — Gipandre tshanganoni nya libandla

Muphasedzeyi nya libandla a gimbidzisago tshangano — Tsawa nya thumo nya lithembwe

Muphasedzeyi nya libandla a phasedzeyago gu agisa Salawu nya Mufumo — Gusayisa Salawu nya Mufumo

Bhibhiliya ya gu ganeya khu mitsawa mivili nya vama nya maKristo va gu na ni mithumo libandlani — ‘vathangeyi ni vaphasedzeyi.’ (Vafilipi 1:1) Khu giolovedzo, libandla ni libandla li na ni vandriyathu nya vangyana va li thumeyago. I thumo muni wu girwago khu vaphasedzeyi nya libandla gasi hi phasega?

Va gu phasedzeya huwo nya madhota. Vaphasedzeyi nya libandla vama nya vaphya mwendro va dandridego va tiyidego liphuvboni, va tumbegago na va gu pimisa gwadi. Avo va gu gira mithumo nya lisima yi vbwetago tshivba, eyi semana ni semana yi girwago libandlani. Isoso sa gu phasa madhota gu vega gupima gwawe thumoni nya gu hevbudze ni gu havisa dzinvuta.

Va gu gira mithumo yi phasago. Vaphasedzeyi nyo khaguri nya libandla va gu thuma kha nga vayeyedzeyi gasi gu hakha ni gu hoyozeya vatshavbo ava va vbohago mitshanganoni. Vambe va gu thuma ni mitshini nya gu khusedze malito, gu kabaniseya dzilivru, gu woneleya dzitsapawu nya libandla ni gu kabaniseya sipandre sesi sivbango nya libandla si yedego gu tshumayela umo. Avo gambe va ngu phasedzeya gusayisani nya Salawu nya Mufumo. Yimbe tepo va ngu lombwa khu madhota gu phasa ava va gumbidego. Ni wevbini thumo vaphasedzeyi nya libandla va wu hakhago, va gu wu gira na va tsakide. Liphuvbo lolo va li yeyedzago la gu gira vatshavbo libandlani va va ninga githawo. — 1 Thimoti 3:13.

Va gu ninga giyeyedzo nya gyadi kha nga vama nya maKristo. Vaphasedzeyi nya libandla va gu hathwa khu kotani nya makhalelo yawe nya yadi nya wuKristo. Tepo va vegago dziganelo mitshanganoni, va gu tiyisa gukhodwa gwathu. Khu gudziningedzeya gwawe thumoni nya gutshumayele, va gu hi kutsa gu anethu hi manega ni sighingi. Khu kotani nya gu thumisane gwadi ni madhota, vaphasedzeyi nya libandla va gu endzegedzeya gutsaka ni gupwanana libandlani. (Vaefeso 4:16) Khu gugimbiya nya tepo, anavo va ngu ninganedwa khu gu thuma kha nga madhota.

Vaphasedzeyi nya libandla vama nya gu khale kharini?
Vaphasedzeyi nya libandla va gu phasa kharini libandla gu gimbiya gwadi?