Yeyedza gubonga vama ava Jehovha ni Jesu va va thumisago libandlani

1. Khu sevbini simbe siningwa esi Jesu a hi ningidego?

A MWALO muthu a yeyedzidego wuwadi omu mafuni nga Jesu. Tepo a nga ba a romo mafuni, uye a giride silewugiso gasi gu phasa vathu. (Luka 9:12-17) Uye a ningede giningwa nya gikhongolo gu vbindra satshavbo khu gu ningeya womi waye khethu. (Joh. 15:13) Ambari hwane nya gu ba a wusidwe khu gufani, Jesu a simamide gu yeyedza wuwadi. Kha nga a hi tumbisidego, uye a lombide Jehovha gasi a hi rumeleya liphuvbo nya guage gasi li hi hevbudza ni gu hi thaveleya. (Joh. 14:16, 17; 16:13) Uye gambe a hi ningide esi hi si vbwetago gasi gu hevbudza vathu va mafuni gwatshavbo maningano ni Bhibhiliya ni gu gira vapizane. — Mat. 28:18-20.

2. “Vama va gu na ni makodzelo” mwendro “siningwa” va khumbugwago omu ga Vaefeso 4:7, 8, vo thudwa va mani?

² Wona gimbe giyeyedzo nya gimwegyo nya giningwa gya Jesu. Mupostoli Pawulo lovide gu khuye hwane nya gu ba Jesu a hongode ndzadzini uye a ningede “vama va gu na ni makodzelo” mwendro “siningwa.” (Leri Vaefeso 4:7, 8.) Pawulo tshamusede gu khuye Jesu ningede vama vovo gasi va phasedzeya libandla khu dzindziya nyo hambane-hambane. (Efes. 1:22, 23; 4:11-13) Muhuno, “vama [vovo] va gu na ni makodzelo” mwendro “siningwa,” va gu pata vaphasedzeyi nya libandla, madhota ni vawoneleyi nya sirkwitu.a Khu lisine, vama vovo kha va vbeleya nigu va ngu gira sihoso. (Jak. 3:2) Ganiolu, Pfhumu yathu Jesu Kristo a gu thumisa vama vovo nyo hathege gasi va hi phasa.

3. Tshamuseya edzi hatshavbo hi nga phasedzeyago khidzo “vama va gu na ni makodzelo.”

³ Jesu a ningide thumo “vama [vovo] va gu na ni makodzelo,” a gu gu tiyisa libandla. (Efes. 4:12) Ganiolu, ethu hatshavbo hi nga va phasa gasi va si kodza gu gira gwadi thumo wawe. Khu giyeyedzo: Vambe gwathu hi di nga dzi ningedzeya gasi gu phasedzeya avbo nya gu vbahwe nya Salawu nya Mufumo. Vambe va ngu phasedzeya avbo nya gu phule guhodza ni gu gira yimbe mithumo nyo hambane-hambane. Khu ndziya nyo fane, hatshavbo hi nga phasedzeya vaphasedzeyi nya libandla, madhota ni vawoneleyi nya sirkwitu khesi hi ganeyago ni gu gira. Hongoleni hi wonani edzi hi nga wuyedwago khidzo khu gudzigaradza va gu girago ni edzi hi nga va yeyedzago khidzo gubonga gumogo ni Jesu, a gu oyu a nga hi ninga “vama [vava] va gu na ni makodzelo”.

VAPHASEDZEYI NYA LIBANDLA VA NGU ‘PHASEDZEYA VAMBE’

4. Vaphasedzeyi nya libandla va lizana mwaga nyo pheye va phasedzede kharini vambe?

⁴ Ga lizana mwaga nyo pheye, vandriyathu nyo khaguri va di emiswa kha nga vaphasedzeyi nya libandla. (1 Thim. 3:8) So wonegisa gu khatshi vaphasedzeyi vovo nya libandla khavo va nga ba va ‘phasedzeya vambe,’ a gu ava Pawulo a va khumbugidego omu ga 1 Vakorinto 12:28. So wonegisa gu khatshi vaphasedzeyi nya libandla va di gu gira mithumo nya lisima, gasi madhota ma si kodza gu hevbudza ni gu khataleya gwadi dzinvuta. Khu giyeyedzo, vaphasedzeyi nya libandla adzina saye va phasedzede avbo nyo gire dzikopya nya Milowo mwendro gu ya renga silo si nga ba si vbwetega gasi gu gira dzikopya.

5. Khu yevbini mithumo vaphasedzeyi nya libandla va girago muhuno?

⁵ Dundrugeya khu mithumo nyo khaguri nya lisima yi girwago khu vaphasedzeyi nya libandla va libandlani gwago. (1 Ped. 4:10) Avo adzina va ngu khataleya dzitsapawu nya miningelo ya libandlani, gu khataleya mabhuku, gu thuma avbo nya awudhyu-vhidhyu mitshanganoni, gu thuma kha nga vaindhikadhori ni gu lungisa-lungisa silo nyo khaguri Salawuni nya Mufumo. Yatshavbo mithumo yeyi yi na ni lisima gasi gu libandla li tsaka. (1 Kor. 14:40) Gu diga isoso, vambe vaphasedzeyi nya libandla va ngu gira sipandre avba nya Thumo ni mavbanyelo nya Wukristo ni gu vega dziganelo. Muphasedzeyi nya libandla adzina saye a nga hathwa gasi gu thuma kha nga muphasedzeyi wa muwoneleyi nya tsawa nya thumo nyo tshumayele. Nigu dzimbe dzitepo, lidhota nyo khaguri li nga rana muphasedzeyi nya libandla gasi gu ya gira liendro nyo havise.

6. Khu sevbini simbe sighelo hi gu naso nyo yeyedze gu bonga khu gudzigaradza gu girwago khu vaphasedzeyi nya libandla?

⁶ Thumo wu girwago khu vaphasedzeyi nya libandla wa gu phasa kharini libandla? Ndriyathu nya nyamayi wa Bolívia nyo pwani khu Beberlyb wari, khuye: “Nyi ngu bonga ngudzu vaphasedzeyi nya libandla kholu hi ngu mana mitshangano yi tsakisago. Khu kotani nya thumo wawe nyi nga embeleya, nyi ningeya mihlamulo, nyi engiseya dziganelo ni gu hevbula silo nya singi omu nya dzivhidhyu ni dzifotu. Avo va ngu gira satshavbo gasi hi wona mitshangano na hi vhikelegide ni gu bwe va phasa ava va gu mba si kodza guta mitshanganoni gasi va wona mitshangano khu gu thumisa videocoferência. Hwane nya mitshangano avo va ngu thangeya thumo nyo agise, gu khataleya dzitsapawu nya miningelo ni gu tiyisega gu khavo hi na ni mabhuku hi ma vbwetago. Nyi ngu va bonga ngudzu.” Leslie a vbanyago Colômbia nigu mwama waye a gu lidhota a gu ganeya gu khuye: “Mwama wangu a gu tumba giphaso gya vaphasedzeyi nya libandla gasi gu gira mithumo nya yingi. Na siri avo, uye na gu pharega ngudzu, khu kharato nyi ngu bonga ngudzu khu sighingi ni gu dziemiseya gwavo nyo vbwete gu mu phasa.” Wa gu dzipwa kharini khu vaphasedzeyi nya libandla va libandlani gwago?— 1 Thim. 3:13.

7. Hi nga yeyedza kharini gubonga vaphasedzeyi nya libandla? (Wona fotu.)

⁷ Ambari olu hi bongago gudzigaradza gu girwago khu vaphasedzeyi nya libandla, Jehovha a gu vbweta gu khuye hi yeyedza gubonga. (Kol. 3:15) Cristovão lidhota nyo khaguri la Filândia la gu yeyedza gubonga khu ndziya yeyi: “Eni nya gu rumeleya lidangaliya li gu na ni lowo ga muphasedzeyi nya libandla nyi mu embeya edzi a nyi tiyisidego khidzo mwendro gu mu embeya egi gi nyi tsakisago gwaye.” Pascal ni Jael va vbanyago Nova Caledônia va ngu oloveya gu gombeleya vaphasedzeyi nya libandla. Pascal wari, khuye: “Matshigwana yaya, hi ngari gu gombeya ngudzu khu vaphasedzeyi nya libandla hi bonga Jehovha khavo hi bwe hi mu lomba gu a simama navo a bwe a va phasa.” Jehovha a ngupwa yatshavbo milombelo yoyo nigu vatshavbo libandlani va ngu wuyedwa. — 2 Kor. 1:11.

MADHOTA MA NGU THUMA “KHU GUDZIGARADZA”

8. Khu ginani Pawulo a ganedego gu khuye madhota ya lizana mwaga nyo pheye ma di gu thuma “khu gudzigaradza”? (1 Vatesalonika 5:12, 13)

⁸ Madhota ya lizana mwaga nyo pheye, ma thumide khu gu dzigaradza gasi phasedzeya libandla. (Leri 1 Vatesalonika 5:12, 13; 1 Thim. 5:17) Avo va thangede libandla khu gu gimbidzisa mitshangano ni gu hungeya makungo libandla. Avo gambe va ningide wusingalagadzi vandriyawe gasi va manega ni gukhodwa nyo tiye. (1 Tes. 2:11, 12; 2 Thim. 4:2) Wulangani nya isoso, vama vava va di yede gu thuma khu gu dzigaradza gasi gu sayisa dzindranga dzawe ni gu simama gu manega ni wupari nya wadi ni Jehovha. — 1 Thim. 3:2, 4; Tit. 1:6-9.

9. Khu yevbini mithumo nyo khaguri madhota ma girago muhuno?

⁹ Muhuno wa tshigu madhota ma pharegide. Ayo vatshumayeli. (2 Thim. 4:5) Ayo ma ngu hi vegeya giyeyedzo nya gyadi khu gu tshumayela khu sighingi, gu sasamedza thumo nyo tshumayele gipandreni gwathu ni gu hi trenari gasi gu khala vatshumayeli nya vadi. Ayo gambe ma ngu thuma kha nga valamuli nyo lulame nigu ma gu na ni wuwadi. Tepo Mukristo a girago gighoho nya gikhongolo, madhota ma gu mu phasa gu wusedza wupari waye ni Jehovha. Khu tepo yayimweyo ayo ma gu phasedzeya gu agisa libandla. (1 Kor. 5:12, 13; Gal. 6:1) Gu vbindra satshavbo, madhota ma gu tidwa kha nga vahavisi. (1 Ped. 5:1-3) Avo va gu dongiseya dziganelo dzawe na va gu dzi seketeya avbo nya Bhibhiliya, va dzi garadzeya guti vatshavbo libandlani ni gu gira maendro nya wuhavisi. Mambe madhota ma ngu phasedzeya avbo nya gu vbahwe ni gu lungisa Dzisalawu nya Mufumo, gu dongiseya dzikongreso ni dziasembleya, gu patega avba nya Dzikometi dzi bhudzisanago ni dziospitali, ni gu wuseya ava va baxaridego ospitali. Madhota ma ngu thuma ngudzu gasi gu hi phasa.

10. Khu sevbini simbe sighelo hi gu naso nyo yeyedze gubonga khu gudzigaradza gu girwago khu madhota?

¹⁰ Jehovha a ganede gu khuye vahavisi va di hadzi gu hi khataleya gwadi nigu a mwalo a na ‘thavago ambari gu ndrendremela.’ (Jer. 23:4) Edzi khidzo a dzipwidego khidzo Johanna ndriyathu nya nyamayi wa Finlândia tepo mamayi waye a nga tshangana ni madwali nya makhongolo. Uye wari, khuye: “Si di gu nyi garadzeya gu bhuleya vambe edzi nyi nga ba nyi dzipwa khidzo. Ambari ulolo, lidhota limwedo nyi nga ba nyi si liti gwadi li nyi engisede gwadi, li gombeya ni eni li bwe li nyi tiyisegisa gu khilo Jehovha a ngu nyi haladza. Kha nyi ngo dundruga gwadi satshavbo a nyi embedego, ganiolu nyi ngu dundruga gu kheni kha nya nga thava gambe. Nyi ngu khodwa gu kheni Jehovha a di mu rumeya gasi gu ta nyi phasa khu tepo yakone.” Madhota ya libandlani gwago ma gu phaside kharini?

11. Hi nga yeyedza kharini gubonga madhota? (Wona fotu.)

¹¹ Jehovha a gu vbweta gu khuye hi yeyedza gubonga madhota khu “thumo [ma] girago.” (1 Tes. 5:12, 13) Henrietta a vbanyago Finlândia wari, khuye: “Madhota ma dzi emisede gu phasa vambe, ganiolu isoso kha si thuli gu khiso ayo ma na ni tepo nya yingi ni tshivba mwendro va mwalo sigaradzo womini wawe. Dzimbe dzitepo nyi ngu hidzimeleya lidhota nyi li embeya gu kheni: ‘U ngu dziti, uwe u lidhota nya ladi. Nyi di gu vbweta gu kheni uti isoso basi.’” Ndriyathu moyo a vbanyago Turquia nyo pwani khu Sera wari, khuye: “Madhota ma yede gu tiyiswa gasi ma simama gu gira thumo wawe. Khu kharato, hi nga va loveya malangaliya hi va rana va ta hodza ni ethu mwendro gu patega navo thumoni nyo tshumayele.” Ina lomo lidhota nyo khaguri u vbwetago gu li bonga khu thumo li girago libandlani? Vbwetedzeya dzindziya nyo yeyedze gubonga gwago. — 1 Kor. 16:18.

VAWONELEYI NYA SIRKWITU VA NGU TIYISA MABANDLA

12. Khu vavbini vambe “vama va gu na ni makodzelo” Jesu a va thumisidego gasi gu tiyisa mabandla? (1 Vatesalonika 2:7, 8)

¹² Jesu Kristo a ningide libandla “vama va gu na ni makodzelo” gasi gu thuma khu yimbe ndziya. Uye thumiside madhota ya Jerusalema gasi gu rumeya Pawulo, Bharinabha ni vambe kha nga vawoneleyi nya sirkwitu. (Mith. 11:22) Khu ginani? Gu fana ni vaphasedzeyi nya libandla ni madhota, vawoneleyi navo va na ni thumo nya gu tiyise mabandla. (Mith. 15:40, 41) Vama vava va ngu dzi hiya silo nya singi gasi gu gira thumo wowu, nigu dzimbe dzitepo va ngu vega womi waye mhangoni gasi gu hevbudza ni gu tiyisa vambe. — Leri 1 Vatesalonika 2:7, 8.

13. Khu yevbini yimbe mithumo eyi vawoneleyi nya sirkwitu va girago?

¹³ Vawoneleyi nya sirkwitu va gu endra tepo yatshavbo. Dzimbe dzitepo, va ngu endra dzikilometru nya dzingi gasi gu vboheya limbe libandla. Semana ni semana, muwoneleyi nya sirkwitu a ngu vega dziganelo nya dzingi, a gira maendro nya wu havise, a gira tshangano nya vapiyonero, nya madhota ni mitshangano nya thumo nyo tshumayele. Uye a ngu dongiseya dziganelo ni gu dongiseya dziasembleya ni dzikongresu. Uye muhevbudzi avba nya dzixikola nya vapiyonero, a ngu dongiseya tshangano nyo hathege ni vapiyonero nya sirkwitu yatshavbo, nigu gu diga isoso dzimbe dzitepo a ngu gira mithumo nya givbiredza a ningwago khu Bheteli.

14. Khu sevbini sighelo hi gu naso nya gu bonge thumo wu girwago khu vawoneleyi nya sirkwitu?

¹⁴ Mabandla ma gu wuyedwa kharini khu mithumo yi girwago khu vawoneleyi nya sirkwitu? Ndriyathu nya mwama wa Turquia, a gu ganeya esi maningano ni maendro ma girwago khu vawoneleyi nya sirkwitu: “Maendro yatshavbo va girago, ma ngu nyi kutsa gu thumisa tepo yangu gasi gu phasa vandriyangu. Nyi tide vawoneleyi nya vangi nya sirkwitu, ganiolu gima kha va yeyedza gu khavo va pharegide ngudzu mwendro kha va vbweti gu bhula ni eni.” Johanna a khumbugidwego gupheyani, thumide ni muwoneleyi nya sirkwitu thumoni nyo tshumayele, ganiolu kha va mana muthu. Uye wari, khuye: “Ambari ulolo, eni gima kha nya divala litshigu leli. Vandriyangu vavili va di gu fulugide vaya vbanya hwindzo, nigu nyi di gu va suva ngudzu. Muwoneleyi nya sirkwitu a di nyi tiyisa a bwe a nyi phasa gu wona gu kheni olu kha hi si kodzegi gu hi vbanya ni valongo vathu ni dzipari dzathu, ganiolu mafuni nya maphya, ethu hi na mana mathomo nya mangi gasi gu vbedza tepo navo.” Vawoneleyi nya vangi nya sirkwitu va ngu tsakedwa khu vale va va endreyago. — Mith. 20:37–21:1.

15. a) Guya khu 3 Johane 5-8, hi nga yeyedza kharini gubonga vawoneleyi nya sirkwitu? (Wona fotu.) b) Khu ginani hi yedego gu yeyedza gubonga vagadzi va vama va thumago khu gu dzigaradza libandlani, nigu hi nga gira kharini isoso? (Wona kwadru yi gu khiyo “Yeyedza gubonga vagadzi vawe.”)

¹⁵ Mupostoli Johane kutside Ghayo gu hakha gwadi vandriyathu va nga ba va hongode gasi guya tiyisa mabandla a bwe a lova gu khuye: “Nyi ngu lomba gu kheni u va phasa khu ndziya yi na tsakisago Nungungulu.” (Leri 3 Johane 5-8.) Ethu hi nga va hakha gwadi khu gu va rana gasi guta hodza gilogyo ni ethu. Yimbe ndziya khu gu hi patega thumoni nyo tshumayele ga matshigu yoyo. Leslie, a khumbugidwego gupheyani a gu yeyedza gubonga khu dzimbe dzindziya. Uye wari, khuye: “Eni nyi ngu gombeya gasi gu Jehovha a va ninga esi va si vbwetago. Eni ni mwama wangu hi va lovede malangaliya, hi va embeya edzi maendro yawe ma hi phasago khidzo.” Dundruga gu khuwe vawoneleyi nya sirkwitu va ngu tshangana ni sigaradzo nigu va ngu garala nga ethu. Dzimbe dzitepo, va ngu dwala, va ngu garadzega khu silo nigu va ngu vbeya tshivba. Khu gu thumisa malito yathu mwendro giningwa nya gidugwana, Jehovha a nga hi thumisa gasi gu hlamula milombelo ya vawoneleyi nya sirkwitu.— Mav. 12:25.

HI NGU VBWETA VANDRIYATHU GASI GU THUMA KHA NGA “VAMA VA GU NA NI MAKODZELO”

16. Guya khu Mavingu 3:27, siwudziso muni vandriyathu va yedego gu dzi gira?

¹⁶ Mafuni gwatshavbo gu ngu vbwetega vandriyathu gasi gu thuma kha nga “vama va gu na ni makodzelo,” mwendro “siningwa.” Wa gu ba uri ndriyathu a bhabhatisidwego, ina u na ni makodzelo nyo phasedzeye? (Leri Mavingu 3:27.) Ina u na ni misuwo nya gu thume kha nga muphasedzeyi nya libandla? Wa gu ba uri muphasedzeyi nya libandla, ina u na ni misuwo nya gu thumeye vandriyago kha nga lidhota?c Ina u dzi emisede gu vbindrugedza silo nyo khaguri womini gwago gasi gu patega avba nya Xikola nya vavhangeli nya Mufumo? Xikola yoyo yi na gu trenari ni gu gu phasa gu thumiswa gwadi khu Jesu. Wa gu dzipwa na wu si dinganedwi gu gira isoso, gombeya ga Jehovha. Mu lombe gasi gu liphuvbo nya guage li gu phasa gu gira yatshavbo mithumo u na ningwago. — Luka 11:13; Mith. 20:28.

17. Vandriyathu va thumago kha nga “vama va gu na ni makodzelo,” va gu yeyedza ginani maningano khu Pfhumu yathu Jesu Kristo?

¹⁷ Vandriyathu ava Jesu a va hathidego gasi gu thuma kha nga “vama va gu na ni makodzelo,” giyeyedzo nya gu khigyo, uye nga simama gu hi khathaleya matshigoni yaya nyo hegise. (Mat. 28:20) Hi ngu bonga ngudzu khu gu ba hiri ni Pfhumu yi gu na ni lihaladzo ni wuwadi, yitigo esi hi si vbwetago ni gu hi ninga vandriyathu gasi gu hi phasa. Khu kharato, vbwetedzeya mathomo gasi gu yeyedza gubonga vandriyathu vovo nya vama va thumago khu gu dzi garadza. Nigu gima u nga divali gu bonga Jehovha, kholu khuye basi a hi ningago “satshavbo silo nya sadi ni satshavbo siningwa nyo vbeleye.” — Jak. 1:17.